କଟକ: ରାଜ୍ୟରେ ବଢୁଛି ସାଇବର କ୍ରାଇମ । ବିଭିନ୍ନ ସୋସିଆଲ ମିଡିଆ ତଥା ଆପ୍ ମାଧ୍ୟମରେ ସାଧାରଣ ଲୋକଙ୍କୁ ଠକିବାରେ ଲାଗିଛନ୍ତି ଠକ । ଡିଜିଟାଲ ଦୁନିଆରେ ମୋବାଇଲ ଏକ ନିତ୍ୟବ୍ୟବହାର୍ଯ୍ୟ ସାମଗ୍ରୀରେ ପରିଣତ ହୋଇଛି । ନିଜଠୁ କ୍ଷଣିଏ ମୋବାଇଲକୁ ଲୋକେ ଦୂରେଇ ରଖିପାରୁନାହାନ୍ତି । ଫଳରେ ବଢୁଛି ସାଇବର ଠକେଇ । ଯାହାକୁ ନେଇ ଲୋକଙ୍କୁ ସଚେତନ କରିବା ଆରମ୍ଭ କରିଛି କମିଶନରେଟ ପୋଲିସ ।
ବର୍ତ୍ତମାନ ବୟସ୍କ ବ୍ୟକ୍ତି ମାନେ ସୋସିଆଲ ମିଡିଆରେ କ୍ରାଇମର ବେଶି ଶିକାର ହେଉଛନ୍ତି । ବିଶେଷ ଭାବରେ ଜ୍ଞାନ ନଥିବା ହେତୁ ହ୍ୟାକର ଓ ଲୁଟେରାମାନେ ଏହାର ସୁଯୋଗ ନେଇ, ସେମାନଙ୍କ ଟଙ୍କା ଲୁଟିବାରେ ସଫଳ ହେଉଛନ୍ତି । ଏପରି ସ୍ଥଳେ କମିଶନରେଟ ପୋଲିସ ଆରମ୍ଭ କରିଛି ଏକ ଅଭିଯାନ । ସୋସିଆଲ ମିଡିଆର ସଠିକ ଓ ଭୁଲ ଦିଗକୁ ବୟସ୍କ ବ୍ୟକ୍ତିଙ୍କୁ ବୁଝେଇବା ଆରମ୍ଭ କରିଛି କମିଶନରେଟ ପୋଲିସ ।
ଆଜି ଅନୁଷ୍ଠିତ ବୈଠକରେ ବୟସ୍କ ବ୍ୟକ୍ତିମାନେ କିପରି ଏହି କ୍ରାଇମରୁ ରକ୍ଷା ପାଇପାରିବେ ସେନେଇ ଡିସିପି ଦେଇଛନ୍ତି ଗୁରୁମନ୍ତ୍ର । କିପରି ବରିଷ୍ଠ ନାଗରିକମାନେ ସାଇବର ଠକଙ୍କ ଠାରୁ ନିରାପଦ ରହିପାରିବେ ସେନେଇ କମିଶନରେଟ ପୋଲିସ ପକ୍ଷରୁ ସଚେତନତା ବୈଠକ କରାଯାଇଛି । କୋଭିଡ କାରଣରୁ ଦୁଇ ବର୍ଷ ଏହି ସଚେତନତା କାର୍ଯ୍ୟକ୍ରମ ବିଶେଷ ଭାବରେ ହୋଇପାରିନଥିଲା । କିନ୍ତୁ ବର୍ତ୍ତମାନ ସମୟରେ ଏହି ସଚେତନତା ଦିଗ ବେଶ କ୍ଷୀପ୍ର ଗତିରେ ଆୟୋଜିତ ହେଉଅଛି ।
ଗତ କିଛିଦିନ ତଳେ ସିଡିଏ ଅଞ୍ଚଳ ରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା । ଆଉ ବରିଷ୍ଠ ନାଗରିକଙ୍କ ଉପସ୍ଥିତି ବେଶ ଅଧିକ ରହିଥିଲା । ତେବେ ବିଶେଷକରି ଯେତେବେଳେ ଫେସବୁକ, ହ୍ବାଟସପ ଆପ ବ୍ୟବହାର କରୁଛନ୍ତି ସେହି ସମୟରେ କଣ କରିବା ଆବଶ୍ୟକ ବୋଲି ପୋଲିସ ସମସ୍ତ ବୁଝାଇଛି । ଏହାସହ ବରିଷ୍ଠ ନାଗରିକମାନଙ୍କ ମତାମତ ମଧ୍ୟ ଲୋଡିଛି କମିଶନରେଟ ପୋଲିସ । ବର୍ତ୍ତମାନ ସମୟରେ ଲୋକମାନେ ଅଧିକ ସଚେତନ ରହିବା ଆବଶ୍ୟକ ରହିଛି । କିନ୍ତୁ ତାହା ବାସ୍ତବରେ ପରିଲକ୍ଷିତ ହେଉ ନାହିଁ । ସମସ୍ତେ ସୋସିଆଲ ମିଡିଆରେ ନିଜ ପସନ୍ ର ସାମଗ୍ରୀ ଅର୍ଡର କରୁଛନ୍ତି ହେଲେ ସେଇଠି ହିଁ ହ୍ୟାକର ମାନେ ରହୁଛନ୍ତି ଓ ସବୁ ବ୍ୟାଙ୍କ ଟଙ୍କା ଲୁଟିବାରେ ସଫଳ ହେଉଛନ୍ତି ।
ଯାହାକୁ ନେଇ ବୟସ୍କ ବ୍ୟକ୍ତିମାନେ ଅନେକ ଅସୁବିଧାର ସମୁଖୀନ ହେଉଛନ୍ତି । ଏପରି ସ୍ଥଳେ ଯଦି ଏପରି କୌଣସି ଘଟଣା ଘଟୁଛି ତେବେ ସଙ୍ଗେସଙ୍ଗେ ପୋଲିସର ଦ୍ବାରସ୍ଥ ହେବା ସହ ସଚେତନତା ଅବଲମ୍ବନ କରିବା ଆବଶ୍ୟକ ବୋଲି କହିଛନ୍ତି କଟକ ଡିସିପି ପିନାକ ମିଶ୍ର । ତେବେ ଆଜି ଅନୁଷ୍ଠିତ ବୈଠକରେ କଟକ ସହରର ଶତାଧିକ ବରିଷ୍ଠ ନାଗରିକ ଯୋଗଦେଇଥିଲେ । ସାଇବର କ୍ରାଇମ ସମ୍ବନ୍ଧୀୟ ଅନେକ ଦିଗ ଉପରେ ଡିସିପି ସମସ୍ତଙ୍କ ସହ ଆଲୋଚନା କରିଥିଲେ ।
ଇଟିଭି ଭାରତ, କଟକ
