କଟକ: କଟକ-ବାରବାଟୀ ବିଧାୟକ ମହମ୍ମଦ ମୋକିମଙ୍କୁ କଟକ ମେୟରଙ୍କ କଡା ଟାର୍ଗେଟ । ବିଧାୟକ ନେତାଜୀ ବସ ଟର୍ମିନାଲ ଉଦଘାଟନୀ ସମାରୋହରେ ଯୋଗ ନଦେବାକୁ ନେଇ ଗଣମାଧ୍ୟମକୁ ଦେଇଥିବା ବାର୍ତ୍ତାକୁ ନେଇ ବର୍ଷିଲେ ମେୟର ସୁବାସ ସିଂ । ମୋକିମ ଗଣମାଧ୍ୟମକୁ ବିଭ୍ରାନ୍ତିକର ମନ୍ତବ୍ୟ ଦେଉଥିବା କହିଛନ୍ତି ମେୟର ।
ଆଉ ମଧ୍ୟ ମୋକିମଙ୍କ ଉପରେ ସଙ୍ଗୀନ ଅଭିଯୋଗ ଆଣିଛନ୍ତି ମେୟର । ସେ କହିଛନ୍ତି ଯେ, ମୋକିମ ରାଜ୍ୟବାସୀ ତଥା କଟକ ବାସିନ୍ଦାଙ୍କୁ ଭୂଆଁ ବୁଲାଉଛନ୍ତି । ନେତାଜୀ ଟର୍ମିନାଲ ବସଷ୍ଟାଣ୍ଡ ଠିକାଦାରୀକୁ ହାତେଇବାକୁ ମୋକିମଙ୍କ ବ୍ୟବସାୟିକ ସହଯୋଗୀ ପୀୟୂଷ ମହାନ୍ତି ଚକ୍ରାନ୍ତ କରିଥିଲେ । ହେଲେ ଠିକାଦାରୀ ନ ମିଳିବାରୁ ଏଭଳି ଅପ୍ରପଚାର କରୁଛନ୍ତି ବୋଲି କହିଛନ୍ତି ମେୟର । କଟକର ବିକାଶକୁ ମୋକିମ ଦେଖି ସହି ପାରୁନଥିବା କହିଛନ୍ତି ମେୟର । ଓଡିଶା ସରକାରଙ୍କ ନିୟନ୍ତ୍ରଣାଧିନ ବିଭାଗ ଓବିସିସି ଦ୍ୱାରା ବସ ଟର୍ମିନାଲ କାର୍ଯ୍ୟ ହେଉଥିବା ସେ ସୂଚନା ଦେଇଛନ୍ତି ।
ତେବେ ଗତକାଲି(ଶନିବାର) ନେତାଜୀ ବସ ଟର୍ମିନାଲର ଉଦଘାଟନୀ ଉତ୍ସବରେ ଯୋଗ ଦେବାକୁ ସିଧାସଳଖ ମନା କରିଥିଲେ ବିଧାୟକ ମହମ୍ମଦ ମୋକିମ । ଏଥିସହ ସରକାରଙ୍କୁ ମଧ୍ୟ କଡା ଟାର୍ଗେଟ କରିଥିଲେ । କଟକ ବାସିନ୍ଦାଙ୍କ ବଦଳରେ କେଉଁ କାରଣରୁ ତାମିଲନାଡୁ ଠିକା ସଂସ୍ଥା ଓ ଶ୍ରମିକ ବସଷ୍ଟାଣ୍ଡରେ କାମ କରୁଛନ୍ତି ବୋଲି ପ୍ରଶ୍ନ କରିଥିଲେ ମୋକିମ । ସବୁ ପ୍ରକଳ୍ପଗୁଡିକୁ ଅଧାପନ୍ତରିଆ ଭାବେ କାମ କରି କଣ ପାଇଁ ତରବରିଆ ଭାବେ ଆରମ୍ଭ କରାଯାଉଛି ବୋଲି ମଧ୍ୟ ପ୍ରଶ୍ନ କରିଥିଲେ ।
ଏହାମଧ୍ୟ ପଢନ୍ତୁ.. ଓଡିଆଙ୍କୁ ଅଣଦେଖା, ନେତାଜୀ ବସ ଟର୍ମିନାଲ ଲୋକାର୍ପଣରେ ସାମିଲ ହେବେନି ମୋକିମ
ତେବେ ନେତାଜୀ ବସ ଟର୍ମିନାଲ କାର୍ଯ୍ୟକୁ ନେଇ ବିବାଦ ଜୋର ଧରିଛି । ରାଜ୍ୟ ବାହାର ଲୋକେ ଏହି କାର୍ଯ୍ୟରେ ନିୟୋଜିତ ଥିବା ନେଇ ଅଭିଯୋଗ ସାମ୍ନାକୁ ଆସିଛି । ଯାହାକୁ ମୋକିମ ଜୋରଦାର ବିରୋଧ କରିଛନ୍ତି । ସ୍ଥାନୀୟ ବାସିନ୍ଦାଙ୍କୁ ଅଣଦେଖା କରି ରାଜ୍ୟ ବାହାର ଲୋକେ କାମ କରିବାକୁ ନିନ୍ଦନୀୟ କଥା କହିଛନ୍ତି ମୋକିମ ।
ଏହାମଧ୍ୟ ପଢନ୍ତୁ.. ନେତାଜୀ ବସ୍ ଟର୍ମିନାଲ ଲୋକାର୍ପିତ, ଓଡ଼ିଶାର ଗୌରବ ବୃଦ୍ଧି କରିବ କହିଲେ ମୁଖ୍ୟମନ୍ତ୍ରୀ
ଅନ୍ୟପଟେ ଅତ୍ୟାଧୁନିକ ନେତାଜୀ ବସ ଟର୍ମିନାଲର ଗତକାଲି(ଶନିବାର) ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହାପରେ ଆଜିକୁ ନୂଆ ବସଷ୍ଟାଣ୍ଡରୁ ଗାଡି ଗଡିଛି । ତେବେ ଏହି ଟର୍ମିନାଲରେ 52ଟି ଦୂରଗାମୀ ରାତ୍ରିକାଳୀନ ବସ ରହିବାର ବ୍ୟବସ୍ଥା କରାଯାଇଛି । ଏଥିସହ 20ଟି ମୋ ବସ ସହ ପାଖାପାଖି 200 ବସ ରହିପାରିବ ।
ଇଟିଭି ଭାରତ, କଟକ
