କଟକ: ବାତ୍ୟା ଅମ୍ଫାନ ପ୍ରଭାବ କଟକ ସହରରେ ଦେଖିବାକୁ ମିଳିଛି । ଏହାର ପ୍ରଭାବରେ ବୁଧବାର ସକାଳୁ କଟକ ସହରରେ ପବନ ବେଗ ବଢିବା ସହିତ ବର୍ଷା ଲାଗି ରହିଥିଲା । ଯାହାଫଳରେ ଜୀବନ ଯାତ୍ରା ଏକ ପ୍ରକାର ପ୍ରଭାବିତ ହୋଇଛି । ତେବେ ଲଗାଣ ବର୍ଷା ପୂର୍ବରୁ ପ୍ରଶାସନିକ ସ୍ତରରେ ସମସ୍ତ ପ୍ରସ୍ତୁତି ଯୋଗୁଁ କଟକରେ ସେଭଳି କୌଣସି ଜଳବନ୍ଦୀ ଦେଖିବାକୁ ମିଳିନାହିଁ । ଏହାପରେ ବି ବାତ୍ୟା ପରେ କଟକ ସହର ସ୍ଥିତି ସମୀକ୍ଷା କରିଛନ୍ତି ଖୋଦ କଟକ ଜିଲ୍ଲାପାଳ ଭବାନୀ ଶଙ୍କର ଚୟନୀ ।
ବୁଧବାର କଟକ ଖାନନଗର, ବାଦମବାଡୀ, ବ୍ରଜକବାଟି ସହିତ ସହରର ତଳି ଅଞ୍ଚଳ ଆଦି ସ୍ଥାନ ବୁଲି ଜଳବନ୍ଦୀ ସ୍ଥିତି ସମୀକ୍ଷା କରିଥିଲେ । ଅନ୍ୟପଟେ ଅମ୍ଫାନ ପ୍ରଭାବରେ କଟକ ସିଟି ହସ୍ପିଟାଲ ସାମ୍ନାରେ ଥିବା ଗଛ ପବନରେ ଉପୁଡି ପଡିଥିଲା ସେଠାରେ ଓଡ୍ରାଫ (ODRAF) ଟିମ ପହଞ୍ଚି ତୁରନ୍ତ ରାସ୍ତା ସଫା କରିଥିଲେ । ତେବେ ଏହି ବାତ୍ୟାକୁ ମୁକାବିଲା କରିବା ପାଇଁ ପ୍ରଶାସନ ସମସ୍ତ ପ୍ରକାର ପ୍ରସ୍ତୁତି କରିଥିବା ବେଳେ ସମସ୍ତ ଅଧିକାରୀଙ୍କୁ ମଧ୍ୟ ବିଭିନ୍ନ ବ୍ଲକରେ ଆଲର୍ଟ ରଖାଯାଇଥିବା କହିଛନ୍ତି କଟକ ଜିଲ୍ଲାପାଳ ।
ସେହିପରି କଟକ ଜିଲ୍ଲାର ନିଆଳି, କଣ୍ଟାପଡା ଆଦି ଅଞ୍ଚଳରୁ ୩୯୦୦ ଲୋକଙ୍କୁ ଉଦ୍ଧାର କରାଯାଇ ବାତ୍ୟା ଆଶ୍ରୟ ସ୍ଥଳୀରେ ରଖାଯାଇଛି । ସେମାନଙ୍କ ଲାଗି ସମସ୍ତ ପ୍ରକାର ଶୁଖିଲା ଓ ରନ୍ଧା ଖାଦ୍ୟର ମଧ୍ୟ ବ୍ୟବସ୍ଥା କରାଯାଇଛି । ଏପର୍ଯ୍ୟନ୍ତ ବାତ୍ୟାର ପ୍ରଭାବରେ ଗଛ ଭାଙ୍ଗି ରାସ୍ତା ବନ୍ଦ ହେବା କି କୌଣସି ଘର ଭଙ୍ଗିବା ଭଳି ରିର୍ପୋଟ ହସ୍ତଗତ ହୋଇନାହିଁ । ଏଥିସହ କୌଣସି ପ୍ରକାର ଅସୁବିଧା ହେଲେ ସଙ୍ଗେ ସଙ୍ଗେ ମୁକାବିଲା କରିବା ପାଇଁ ୨୪ ଘଣ୍ଟିଆ କଣ୍ଟ୍ରୋଲ ରୁମ ଖୋଲାଯାଇଥିବା କହିଛନ୍ତି କଟକ ଜିଲ୍ଲାପାଳ ଭାବନୀ ଶଙ୍କର ଚୟନୀ ।
କଟକରୁ ନାରାୟଣ ସାହୁ, ଇଟିଭି ଭାରତ
