କଟକ: ପିଲାକଳିକୁ କେନ୍ଦ୍ର କରି ଆଠଗଡ ଥାନା ଅନ୍ତର୍ଗତ ନୂଆବନ୍ଧ ଗ୍ରାମରେ ଘଟିଛି ଗୋଷ୍ଠୀ ସଂଘର୍ଷ । ଗୋଟିଏ ପକ୍ଷର ଆକ୍ରମଣରେ ଅନ୍ୟପକ୍ଷର 5 ଜଣ ଲୋକ ଆହତ ହୋଇଛନ୍ତି । ଆହତଙ୍କ ମଧ୍ୟରେ ଏକ ନାବାଳକ ସହ 3ଜଣ ମହିଳା ଓ ଜଣେ ପୁରୁଷ ଅଛନ୍ତି । ସମସ୍ତ ଆହତଙ୍କୁ ଆଠଗଡ ମେଡିକାଲରେ ଭର୍ତ୍ତି କରାଯାଇଛି ।
ଭିଡିଓ ସୌଜନ୍ୟ: ସମ୍ବାଦଦାତା, କଟକ
ସୂଚନା ଅନୁଯାୟୀ, ପିଲାକଳିକୁ କେନ୍ଦ୍ର କରି ଉକ୍ତ ଗ୍ରାମର ଦାଶରଥି ପ୍ରଧାନଙ୍କ ଘରେ ମଙ୍ଗଳବାର ରାତିରେ 15ରୁ ଊର୍ଦ୍ଧ୍ବ ବ୍ୟକ୍ତି ପଶି ମାରପିଟ୍ କରିବା ସହ ଅଶ୍ଲିଳ ଭାଷାରେ ଗାଳି ଗୁଲଜ କରିଥିଲେ । ପୁନର୍ବାର ଆଜି(ବୁଧବାର) ସକାଳେ ସେମାନେ ଆସି ଦାଶରଥିଙ୍କ ପରିବାରକୁ ମାରଣାସ୍ତ୍ରରେ ଆକ୍ରମଣ କରିଥିଲେ । ଏଥିରେ ଦାଶରଥି, ତାଙ୍କ ସ୍ତ୍ରୀ, ପୁଅ ,ଭାଉଜ ଓ ଭଉଣୀ ଆହତ ହୋଇଛନ୍ତି । ସମସ୍ତଙ୍କୁ ଆଠଗଡ ମେଡିକାଲରେ ଭର୍ତ୍ତି କରାଯାଇଛି ।ଏ ନେଇ ଅଭିଯୋଗ ପରେ ପୋଲିସ ତଦନ୍ତ ଆରମ୍ଭ କରିଛି ।
କଟକରୁ ନାରାୟଣ ସାହୁ, ଇଟିଭି ଭାରତ
