କଟକ: ପଶ୍ଚିମବଙ୍ଗ ଇଗ୍ରାର ଖାଡିକୁଲ ଅଞ୍ଚଳରେ ବାଣ ବିସ୍ଫୋରଣ ଘଟଣା । ଓଡ଼ିଶାରେ ଚିକିତ୍ସିତ ହେଉଛି ବାଣ ବିସ୍ଫୋରଣର ଆହତ ମୁଖ୍ୟ ଅଭିଯୁକ୍ତ ଭାନୁ ବାଗ। କଟକର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ଅଭିଯୁକ୍ତ ଭାନୁକୁ ଗିରଫ କଲା ଇଗ୍ରା ପୋଲିସ । ଗତ 16 ତାରିଖରେ ରାତି 2ଟା ସମୟରେ ସେ ହସ୍ପିଟାଲରେ ଭର୍ତ୍ତି ହୋଇଥିଲେ । ବାଣ ବିସ୍ଫୋରଣରେ ତାର ଶରୀର 80 ପ୍ରତିଶତ ଜଳିଯାଇଛି । ଅଭିଯୁକ୍ତ ଜଣଙ୍କ ହସ୍ପିଟାଲରେ ଭର୍ତ୍ତି ହେବା ପୂର୍ବରୁ ପ୍ରକୃତ ପରିଚୟ ଲୁଚାଇଥିଲା । ସେ ବାଲେଶ୍ବରର ବାସିନ୍ଦା ହୋଇଥିବା କହିଥିବା ବେଳେ ଗ୍ୟାସ୍ ଟାଙ୍କି ଫାଟି ଏଭଳି ହୋଇଥିବା କହିଥିଲା ଭାନୁ ବାଗ । ସେ ବାଲେଶ୍ଵରର ବାସିନ୍ଦା ହୋଇଥିବା ଏକ ଆଧାର କାର୍ଡ ଦେଖାଇ ହସ୍ପିଟାଲରେ ଭର୍ତ୍ତି ହୋଇଥିଲେ, ଯାହା ସମ୍ପୂର୍ଣ୍ଣ ରୂପେ ମିଥ୍ୟା । ଭାନୁ ବାଗ ବଦଳରେ ସେ ଅନ୍ୟ ନାଁ ରେ ମେଡିକାଲରେ ଭର୍ତ୍ତି ହୋଇଥିଲା ।
ତେବେ ଅଭିଯୁକ୍ତର ଅବସ୍ଥା ଗୁରୁତର ଥିବାରୁ ପ୍ରଥମେ ତାଙ୍କୁ ଚିକିତ୍ସା କରିବା ପାଇଁ କହିଥିଲେ ତାଙ୍କ ସମ୍ପର୍କୀୟ । ଏହାପରେ ସ୍ଥାନୀୟ ଥାନାରେ ସୂଚନା ଦେବା ପାଇଁ ରୋଗୀର ସମ୍ପର୍କୀୟ କହିଥିଲେ । ତେବେ ଏହି ଘଟଣାରେ ଆଉ କେହି ଆହତ ହୋଇ ନାହାନ୍ତି କେବଳ ସେ ଆହତ ବୋଲି ଡାକ୍ତରଙ୍କୁ କହିଥିଲା ଭାନୁ ବାଗ । ହସ୍ପିଟାଲର ମୁଖ୍ୟଙ୍କ କହିବା ଅନୁସାରେ, ବୁଧବାର ଆମେ ସ୍ଥାନୀୟ ଥାନାକୁ ଘଟଣା ସମ୍ପର୍କରେ ଜଣାଇଥିଲା । ଖବର ପାଇବା ପରେ ଆଜି(ଗୁରୁବାର) କଲିକତାରୁ ଇଗ୍ରା ପୋଲିସ ଆସି ତଦନ୍ତ ଆରମ୍ଭ କରି ଅଭିଯୁକ୍ତକୁ ଗିରଫ କରିଛି । ରୋଗୀ ଗୁରୁତର ଥିବାରୁ ପୋଲିସର ଅଜ୍ଞାତରେ ଚିକିତ୍ସା କରାଯାଇଥିଲା । ବର୍ତ୍ତମାନ ସ୍ଥାନୀୟ ଥାନାର ଅବଗତିରେ ଭାନୁର ଚିକିତ୍ସା ଜାରି ରହିଛି ।
ଏହା ମଧ୍ୟ ପଢନ୍ତୁ-Explosion in WB: ବାଣ କାରଖାନାରେ ଭୟଙ୍କର ବିସ୍ଫୋରଣ, 7 ମୃତ
ଗତ ମଙ୍ଗଳବାର ଦିନ ପଶ୍ଚିମବଙ୍ଗ ପୂର୍ବ-ମେଦିନୀପୁର ଜିଲ୍ଲା ଅନ୍ତର୍ଗତ ଇଗ୍ରାର ଖାଡିକୁଲ ଅଞ୍ଚଳରେ ଏକ ବାଣ କାରଖାନାରେ ଭୟଙ୍କର ବିସ୍ଫୋରଣ ହୋଇଥିଲା । ଏହି ଘଟଣାରେ 9 ଜଣଙ୍କର ମୃତ୍ୟୁ ହୋଇଥିଲା । ଏକାଧିକ ଆହତ ମଧ୍ୟ ହୋଇଥିଲେ । ସ୍ଥାନୀୟ ପୋଲିସ, ଅଗ୍ନିଶମ ବାହିନୀ ଓ ଅନ୍ୟ ଜରୁରୀ ବିଭାଗ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ଏହାପରେ ଏହି ଘଟଣାର ତଦନ୍ତ ଆରମ୍ଭ ହୋଇଥିଲା । ବେଆଇନ ବାଣ କାରଖାନାରେ ବିସ୍ଫୋରଣ ନେଇ ମୁଖ୍ୟ ଅଭିଯୁକ୍ତକୁ ଭାନୁ ବାଗ୍କୁ କଟକରୁ ଆଜି ଗିରଫ କରିଛି ପୋଲିସ ।
ଇଟିଭି ଭାରତ, କଟକ
