କଟକ: ଡିସେମ୍ବର 12, 2019, ଆଜିକୁ ଠିକ୍ ଦୁଇ ମାସ ତଳେ ଭାଇଚାରାର ସହରରେ ଖେଳି ଯାଇଥିଲା ଚାଞ୍ଚଲ୍ୟ । ରାତି ଅଧରେ ହୋଇଥିଲା ମର୍ଡର, ସେ ପୁଣି ଡବଲ ମର୍ଡର । ଏକୁଟିଆ ରହୁଥିବା ବୃଦ୍ଧ ଦମ୍ପତିଙ୍କୁ ଅତିନିର୍ମମ ଭାବେ କରାଯାଇଥିଲା ହତ୍ୟା । ସେ ଘଟଣାକୁ ଏହାରି ଭିତରେ 2ମାସ ପୁରିଛି,ହେଲେ ଏବେ ବି ଅଭିଯୁକ୍ତଙ୍କ ଟେର୍ ପାଇନି ପୋଲିସ ।
ରହସ୍ୟ ଘେରରେ ନୂଆ ବଜାର ବେଲେଶ୍ବର ମର୍ଡର ମିଷ୍ଟ୍ରି । ଘଟଣାକୁ 2 ମାସ ପୁରିଲାଣି ତଥାପି ପୋଲିସ ହାତ ଖାଲି । ରାତି ଅଧରେ କିଏ,କାହିଁକି ବୃଦ୍ଧ ଦମ୍ପତିଙ୍କୁ ହତ୍ୟା କଲା ? ଏ ପ୍ରଶ୍ନ ଏବେ ପ୍ରଶ୍ନ ହୋଇରହିଯାଇଛି । ପୋଲିସ ଆଖିରେ ଧୂଳି ଦେଇ ଖୁଲମଖୁଲା ବୁଲୁଛି ହତ୍ୟାକାରୀ । ଯାହାକି ପୋଲିସର ପାରିବାପଣିଆ ଉପରେ ଉଠାଇଛି ବଡ ପ୍ରଶ୍ନ ?
ତେବେ ଏହି ହତ୍ୟାକାଣ୍ଡ ଯୋଗୁଁ ହଠାତ୍ ଶାନ୍ତ ସହରଟା ଅଶାନ୍ତ ହୋଇପଡିଥିଲା । ଅଧରାତିରେ ରକ୍ତ ରଞ୍ଜିତ ହୋଇଥିଲା ଶ୍ରୀନାଥ ସାମଲଙ୍କ ବାସଭବନ । ବନ୍ଦ ଘରେ ଘଟିଥିଲା ଦୁଇଦୁଇଟି ମର୍ଡର । କେହି ଦୁର୍ବୃତ୍ତ ଅତି ନିର୍ମମ ଭାବେ ଶ୍ରୀନାଥ ସାମଲ ଓ ପତ୍ନୀ ବିଦୁ ସାମଲଙ୍କୁ ହତ୍ୟା କରିଥିଲା । ଏଯାଏଁ କମିଶନରେଟ ପୋଲିସ ଅପରାଧୀର କୌଣସି ଟେର୍ ପାଇନଥିବାବେଳେ ସେ ନିଶ୍ଚୟ ହାତ ମୁଠାକୁ ଆସିବ ବୋଲି କହିଛନ୍ତି କଟକ ଡିସିପି ଅଖିଳେଶ୍ବର ସିଂହ ।
ଏହି ଡବଲ ମର୍ଡର ପଛରେ କାହାର ରହିଛି ହାତ । ସଭ୍ୟ ସମାଜ ଭିତରେ ଲୁଚି ରହିଥିବା ସେଇ ମୁଖାଧାରୀ ସଇତାନ କିଏ ? ଯିଏ ରଚିଥିଲା ଏଭଳି ଭୟାନକ ଷଡଯନ୍ତ୍ର । ତେବେ ବୃଦ୍ଧ ଦମ୍ପତିଙ୍କ ହତ୍ୟାକାରୀ ହାତରେ କେବେ ହ୍ୟାଣ୍ଡକପ ପଡିବ ତାହାକୁ ସମସ୍ତଙ୍କ ଅପେକ୍ଷା ।
କଟକରୁ ପ୍ରଭୁ କଲ୍ୟାଣ ପାଲ୍, ଇଟିଭି ଭାରତ
