ଭୁବନେଶ୍ବର: ଓଲିଉଡ ଅଭିନେତା ଅମ୍ଲାନ ଦାଶଙ୍କ ପତ୍ନୀ ମହାନଦୀରେ ଖସି ପଡିବା ଘଟଣାକୁ ଲାଗି ରହିଛି କଳ୍ପନାଜଳ୍ପନା । ଏହା ଦୁର୍ଘଟଣା ବା କୌଣସି କାରଣକୁ ନେଇ ଘଟିଥିଲା ଲୋକଙ୍କ ମନରେ ବହୁ ପ୍ରଶ୍ନ ଉଙ୍କି ମାରୁଥିବା ବେଳେ ଏହି ଚର୍ଚ୍ଚାକୁ ନେଇ ମୁହଁ ଖୋଲିଛନ୍ତି ଅମ୍ଲାନଙ୍କ ପତ୍ନୀ ଭୂମିକା ଦାଶ । ସୋସିଆଲ ମିଡିଆରେ ଭିଡିଓ ପୋଷ୍ଟ କରି ଘଟଣାର ପଛର ସତ କହିଛନ୍ତି ଭୂମିକା ।
ସେ ଭିଡିଓରେ କହିଛନ୍ତି କି, ‘ଏହା କୌଣସି କାରଣରୁ ଘଟିନାହିଁ ବରଂ ଏହା ଦୁର୍ଘଟଣା ଥିଲା । ପୂଜା ସାମଗ୍ରୀ ଗୁଡିକ ପାଣିରେ ପକାଇବାକୁ ଗଲାବେଳେ ମୁଣ୍ଡ ବୁଲାଇ ଦେଲା । ଆଉ ଯେହେତୁ ମୁଁ ଗୋଟେ ହାଇହିଲ ପିନ୍ଧିଥିଲି, ତ ଗୋଡ ଖସି ଗଲା.. ମୁଁ ପଡିଗଲି । ତେଣୁ ମୋ ସ୍ବାମୀ ଓ ପରିବାର ନାଁରେ ମିଛ ପ୍ରଚାର କରାଯାଉଛି । ଏହିସବୁ ଠିକ୍ ନୁହେଁ । ଏହା କରି ମୋ ପରିବାର ସାଙ୍ଗରେ ଆହୁରି ଖରାପ କରୁଛନ୍ତି । ଦୟାକରି ମିଛ ଖବର ପ୍ରଚାର କରନ୍ତୁ ନାହିଁ । ’
ଏହି ଘଟଣାକୁ ନେଇ ରବିବାର ଅମ୍ଲାନ କହିଥିଲେ କି, ଦୀପାବଳି ପୂଜାର ଭୋଗ ଓ ଫୁଲ ପକାଇବାକୁ ଦୁହେଁ ମହାନଦୀକୁ ଯାଇଥିଲେ । ହେଲେ ଖରାରେ ମୁଣ୍ଡ ବୁଲାଇବା ହେତୁ ସେ ନଦୀରେ ଗଳି ପଡିଥିଲେ । ପରେ ତାଙ୍କୁ ତୁରନ୍ତ ଉଦ୍ଧାର କରାଯାଇଥିଲା । ସିଡିଏ ଫେଜ୍ ୨ ପୋଲିସ ତାଙ୍କୁ ଚିକିତ୍ସା ପାଇଁ ହସ୍ପିଟାଲକୁ ପଠାଇଥିଲା । ଏବେ ସେ ସମ୍ପୂର୍ଣ୍ଣ ସୁସ୍ଥ ଅଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
