କଟକ: ଏସସିବି ସମ୍ପ୍ରସାରଣ ପାଇଁ ପୁଣି ଆରମ୍ଭ ହେଲା ଉଛେଦ ପ୍ରକ୍ରିୟା । ତାଳଦଣ୍ଡା କେନାଲ ପାର୍ଶ୍ଵରୁ ପିଲିଗ୍ରୀମ ରୋଡ଼ରେ ଥିବା ସମସ୍ତ ଜବର ଦଖଲ ଉଚ୍ଛେଦ କରିବାକୁ ବ୍ଲୁ ପ୍ରିଣ୍ଟ ଶେଷ । ପ୍ରଥମ ପର୍ଯ୍ୟାୟରେ ଆଜି 3 ଟି ମନ୍ଦିରକୁ ଭାଙ୍ଗିଛି ଜିଲ୍ଲା ପ୍ରଶାସନ ଓ ସିଏମସି । ତେବେ ଏହାକୁ ନେଇ ସ୍ଥାନୀୟ ଅଞ୍ଚଳରେ ଦେଖା ଦେଇଛି ସମାନ୍ୟ ଉତ୍ତେଜନା । କାରଣ 50 ବର୍ଷରୁ ଉର୍ଦ୍ଧ୍ବ ସମୟ ଧରି ଏହି ମନ୍ଦିର ସ୍ଥାନୀୟ ବାସିନ୍ଦାଙ୍କ ଭାବାବେଗ ସହ ଥିଲା ଜଡିତ । ହେଲେ ଆଜି ତାହା ମାଟିରେ ମିଶିଛି । ଭକ୍ତ ଓ ଶ୍ରଦ୍ଧାଳୁଙ୍କ ମଧ୍ୟରେ ଗଭୀର ଦୁଃଖ ଦେଖିବାକୁ ମିଳିଛି ।
ଏସସିବି ସମ୍ପ୍ରସାରଣ ପାଇଁ ପୁଣି ଆରମ୍ଭ ହେଲା ଉଛେଦ ପ୍ରକ୍ରିୟା କାଲି ଥିଲା ମହାଶିବରାତ୍ରି । ଭକ୍ତ କରିଥିଲେ ଓଷା-ବ୍ରତ । ଠାକୁରଙ୍କୁ ପାଖରୁ ପାଇ କୋଟି ଜନ୍ମର ପୁଣ୍ୟ ଅର୍ଜନ କରିବା ପାଇଁ ଉଜାଗାର ରହି ପାଲିଥିଲେ ଜାଗର । ହେଲେ ସକାଳ ହେଉ ହେଉ ସବୁ ଖୁସି ମାଟିରେ ମିଶି ଯାଇଥିଲା । ମହାଦୀପ ନଲିଭୁଣୁ ମନ୍ଦିର ଆଗରେ ଦଣ୍ଡାୟମାନ ହୋଇଥିଲା ଜେସିବି ମେସିନ । ପ୍ରସାସନର ଗୋଟିଏ ଇସାରାରେ ମାଟିରେ ମିଶିଗଲା ମହାଦେବଙ୍କ ମନ୍ଦିର । ମହାଦେବଙ୍କ ସାମ୍ନାରେ ଥିବା ବୃଷବ ମଧ୍ୟ ନିରୁପାୟ ହୋଇଗଲେ । ଦେଖୁ ଦେଖୁ ମାଟିରେ ମିଶିଥିଲା ମାଲ ଗୋଦାମ ପାଖ ପିଲିଗ୍ରୀମ ରୋଡ଼ରେ ଥିବା 3 ଟି ମନ୍ଦିର । ଯାହା 50 ବର୍ଷରୁ ଉର୍ଦ୍ଧ୍ବ ସମୟ ଧରି ସ୍ଥାନୀୟ ବାସିନ୍ଦାଙ୍କ ଭାବାବେଗ ସହ ଜଡିତ ଥିଲା । ତେବେ ଏହି ମନ୍ଦିର ଭାଙ୍ଗିବା ଦୃଶ୍ୟକୁ ସହି ପାରି ନଥିଲେ ବାସିନ୍ଦା । ତେବେ ଶେଷରେ ନିରାଶ ହୋଇ ନିରବ ଦ୍ରଷ୍ଟା ସାଜିଥିଲେ ବସ୍ତି ବାସିନ୍ଦା ।ଅନ୍ୟପଟେ ରାଜ୍ୟ ସରକାରଙ୍କ ଏସିବି ମେଡିକାଲକୁ ଏମ୍ସ ପ୍ଲସ କରିବା ଯୋଜନାକୁ ଖୁବ ଶୀଘ୍ର ସମ୍ପାଦନ ଦିଗରେ ଲାଗି ପଡିଛି ଜିଲ୍ଲା ପ୍ରଶାସନ । ପ୍ରଥମେ ମନ୍ଦିର ଏହାପରେ ବସ୍ତିକୁ ଉଚ୍ଛେଦ କରି ସେମାନଙ୍କୁ ଥଇଥାନ କରିବାକୁ ଲକ୍ଷ ରଖାଯାଇଛି । ତେବେ ମନ୍ଦିରର ଥଇଥାନ ପାଇଁ କିଛି ଯୋଜନା ନାହିଁ । କିନ୍ତୁ, ବସ୍ତି ଉଚ୍ଛେଦ ପରେ ସେମାନଙ୍କୁ ଚିହ୍ନଟ ହୋଇଥିବା ସ୍ଥାନରେ ଅବସ୍ଥାପତି କରିବା ପରେ ପୁଣି ଆରମ୍ଭ ହେବ ନିର୍ମାଣ କାମ । ତେବେ ସ୍ଥାନାନ୍ତରିତ ପରେ ବସ୍ତି ବାସୀନ୍ଦା କୌଣସି ଦୁଃଖ ଦେଖିବେନି ବୋଲି କହିଛନ୍ତି ସିଏମସି ଡେପୁଟି କମିଶନର । ଗୋଟିଏ ପଟେ ବିଶ୍ବାସ ଓ ଅନ୍ୟପଟେ ବିକାଶ । ସରକାରଙ୍କ ସ୍ବପ୍ନ ଆଗରେ ଭକ୍ତଙ୍କ ଭକ୍ତି ମଧ୍ୟ ତୁଚ୍ଛ । ଯାହା ଏହି ଉଚ୍ଛେଦରୁ ସ୍ପଷ୍ଟ ବାରି ହୋଇପଡୁଛି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
