କଟକ: ଶିକ୍ଷୟିତ୍ରୀଙ୍କୁ ମରଣାନ୍ତକ ଆକ୍ରମଣ କରି ଯୁବକ ଅଟକ। ଶିକ୍ଷୟିତ୍ରୀ ଜଣକ କଟକ ଜିଲ୍ଲା ନିଆଳୀ ଆମ୍ବପଡା ସରକାରୀ ବିଦ୍ୟାଳୟର ସୁଚିସ୍ମିତା ମୁଦୁଲି ବୋଲି ଜଣାପଡିଛି। ଆକ୍ରମଣ କରି ଫେରାର ହେଉଥିବା ବେଳେ ଅଭିଯୁକ୍ତକୁ କାବୁ କରିଥିଲେ ସ୍ଥାନୀୟ ଲୋକେ । ତେବେ ଏକତରଫା ପ୍ରେମକୁ ନେଇ ଏଭଳି କାଣ୍ଡ ହୋଇଥିବା ସନ୍ଦେହ କରାଯାଉଛି ।
ସୂଚନା ମୁତାବକ, ଶିକ୍ଷୟିତ୍ରୀ ଜଣଙ୍କ ସୋମବାର ଛାତ୍ରଛାତ୍ରୀଙ୍କୁ ପାଠ ପଢ଼ାଉଥିବା ବେଳେ ଅଭିଯୁକ୍ତ ବିଭୂତି ମହାନ୍ତି ଶ୍ରେଣୀ ଗୃହରେ ପଶି କଟୁରୀରେ ଆକ୍ରମଣ କରିଥିଲା। ଅଭିଯୁକ୍ତ ଜଣକ ଶିକ୍ଷୟତ୍ରୀଙ୍କ ମୁଣ୍ଡର ପଛଭାଗ, ପିଠି ଓ ଅଣ୍ଟାକୁ ଏକାଧିକ ଥର ଆକ୍ରମଣ କରିଥିବା ଫଳରେ ସେ ଗୁରୁତର ଆହତ ହୋଇଥିଲେ । ତେବେ ଗୁରୁତର ଅବସ୍ଥାରେ ତାଙ୍କୁ କଟକ ବଡ ମେଡିକାଲରେ ଭର୍ତ୍ତି କରାଯାଇଛି ।
ସେପଟେ ଅଭିଯୁକ୍ତ ବିଭୂତି ମହାନ୍ତି ଆକ୍ରମଣ ପରେ ଭୂବନେଶ୍ବର ଅଭିମୁଖେ ଫେରାର ହେବାକୁ ଉଦ୍ୟମ କରିଥିଲା । କିନ୍ତୁ ସ୍ଥାନୀୟ ଲୋକେ ତାକୁ କାବୁ କରି ଚାରିଛକ ପୁଲିସକୁ ହସ୍ତାନ୍ତର କରିଥିଲେ । ତେବେ ଅଭିଯୁକ୍ତ ବିଭୂତି ମହାନ୍ତିକୁ ଚାରିଛକ ପୋଲିସ ଅଟକ ରଖି ପଚରାଉଚରା ଜାରି ରଖିଥିବା ଜଣାପଡିଛି ।
କଟକରୁ ନାରାୟଣ ସାହୁ, ଇଟିଭି ଭାରତ
