ଭୁବନେଶ୍ବର: କେନ୍ଦ୍ରର ସ୍ବାସ୍ଥ୍ୟ ଯୋଜନା ‘ଆୟୁଷ୍ମାନ ଭାରତ’କୁ ରାଜ୍ୟରେ ଲାଗୁ କରିବା ପାଇଁ ଆରମ୍ଭ ହୋଇଛି କସରତ । ଏନେଇ ଆୟୁଷ୍ମାନ ଯୋଜନାର ସିଇଓ ଡ଼ଃ ଇନ୍ଦୁଭୂଷଣ ଓ ତାଙ୍କ ଟିମ୍ ଓଡିଶା ଆସି ରାଜ୍ୟ ସରକାରଙ୍କ ସହ ଆଲୋଚନା କରିଥିଲେ । ଯାହାର 24 ଘଣ୍ଟା ପରେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡ଼ଃ ହର୍ଷବର୍ଦ୍ଧନ ରାଜ୍ୟ ସରକାରଙ୍କୁ ଚିଠି ଲେଖି ରାଜ୍ୟରେ ଯୋଜନା ଲାଗୁ କରିବା ପାଇଁ ଅନୁରୋଧ କରିଛନ୍ତି ।
କେନ୍ଦ୍ର ସ୍ବାସ୍ଥ୍ୟମନ୍ତ୍ରୀଙ୍କ ଅନୁଯାୟୀ ଏହି ଯୋଜନାର ଲାଭ ରାଜ୍ୟର ପ୍ରତିଟି ପରିବାରକୁ ମିଳିବା ଦରକାର । ଆୟୁଷ୍ମାନ ଯୋଜନା ଅନୁଯାୟୀ ଦେଶର 10 କୋଟି 74 ଲକ୍ଷ ପରିବାର ଉପକୃତ ହୋଇପାରିବେ । ପ୍ରତି ପରିବାରକୁ ବାର୍ଷିକ ବୀମା ଆକାରରେ 5 ଲକ୍ଷ ଟଙ୍କା ଦିଆଯିବ । ତେବେ ଆସନ୍ତା ଅକ୍ଟୋବରରୁ ରାଜ୍ୟରେ ଏହି ଯୋଜନା କାର୍ଯ୍ୟକାରୀ କରିବା ପାଇଁ ମାର୍ଗ ପ୍ରଶସ୍ତ ହେଉଥିବା ସୂଚନା ଦେଇଛନ୍ତି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ।
ଏନେଇ ରାଜ୍ୟ ସରକାରଙ୍କ ସହ ଟେଲିଫୋନ ଯୋଗେ ଆଲୋଚନା ସରିଛି ବୋଲି ମଧ୍ୟ ସ୍ପଷ୍ଟ କରିଛନ୍ତି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡ଼ଃ ହର୍ଷବର୍ଦ୍ଧନ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
