ଭୁବନେଶ୍ବର: ରାଜ୍ୟରେ ଅନିୟନ୍ତ୍ରିତ ଭାବେ ବୃଦ୍ଧି ପାଉଛି ବେଆଇନ ଖଣି କାରବାର । ଏଥିରେ ପ୍ରତ୍ୟେକ୍ଷ କିମ୍ବା ପରୋକ୍ଷ ଭାବେ ଜଡିତ ରହୁଛନ୍ତି ସଜ୍ଜା କାଟୁଥିବା ଗ୍ୟାଙ୍ଗଷ୍ଟାର । ଜେଲରେ ଥାଇ ମଧ୍ୟ ଖଣି କାରବାରକୁ କରୁଛନ୍ତି ନିୟନ୍ତ୍ରଣ । ଯାହାଫଳରେ ଖଣିଖାଦାନରୁ ହ୍ରାସ ପାଇବାରେ ଲାଗିଛି ସରକାରଙ୍କ ରାଜସ୍ବ ସଂଗ୍ରହ । ଏହା ଯୋଗୁଁ ମାଲାମାଲ୍ ହେଉଛନ୍ତି ଖଣିମାଫିଆ ।
ହେଲେ ବର୍ତ୍ତମାନ ଠାରୁ ଏହା ଉପରେ ଲଗାମ କଷିବା ପାଇଁ ଅଣ୍ଟା ଭିଡିଛି କ୍ରାଇମବ୍ରାଞ୍ଚ । ଖଣି କାରବାରରେ ମାଫିଆରାଜକୁ ବନ୍ଦ କରିବା ପାଇଁ ନିଆଯିବ ଆକ୍ସନ । ବିଭାଗୀୟ ତଦନ୍ତ ବେଳେ କ୍ରାଇମବ୍ରାଞ୍ଚ ହାତରେ ଲାଗିଛି ଏଭଳି ତଥ୍ୟ । ଯେଉଁମାନଙ୍କ ଇସାରାରେ ଚାଲୁଛି ବେଆଇନ ପଥର ଖାଦାନ ଠାରୁ ଆରମ୍ଭ କରି ଖଣିଜ ଦ୍ରବ୍ୟର ଚୋରା ଚାଲାଣ । ଏଭଳି ମାଫିଆଙ୍କୁ ସାବାଡ୍ କରିବା ପାଇଁ ଏବେ ଆକ୍ସ ମୁଡରେ ରହିଛି କ୍ରାଇମବ୍ରାଞ୍ଚ । ଏଥିରେ ଜଡିତ ଥିବା ୨୦ ଜଣ ଗ୍ୟାଙ୍ଗଷ୍ଟାରଙ୍କ ତାଲିକା ମଧ୍ୟ ପ୍ରସ୍ତୁତ କରିଛି ସ୍ପେଶାଲ ଟାସ୍କଫୋର୍ସ (ଏସଟିଏଫ) ।
ଏହି ତାଲିକା ପ୍ରଥମ ସ୍ଥାନରେ ରହିଛି ରାଜା ଆଚାର୍ଯ୍ୟ । ଯିଏକି କୋଚ୍ ବିରଞ୍ଚି ଦାସ ହତ୍ୟା ମାମଲାରେ ସଜା କାଟିବା ପରେ କିଛି ଦିନ ତଲେ ଜେଲରୁ ମୁକୁଳିଛି । ଗଞ୍ଜାମ ଟାଇଗର ଭାବେ ପରିଚିତ ଗ୍ୟାଙ୍ଗଷ୍ଟାର ବିକ୍ରମ ମଲ୍ଲିକ ଏବେ ଝାରପଡା ଜେଲରେ ସଜା କାଟୁଛି । ଯିଏକି ଏସଟିଏଫ ଦ୍ବାରା ପ୍ରସ୍ତୁତ ତାଲିକାର ଦ୍ବିତୀୟ ସ୍ଥାନରେ ରହିଛି ।
ଏଥିରେ ତୃତୀୟ ସ୍ଥାନରେ ରହିଛି ଗ୍ୟାଙ୍ଗଷ୍ଟାର ଟିଟୋ ଓରଫ୍ ସୟଦ ଉସମାନ ଅଲ୍ଲି । କେନ୍ଦ୍ରାପଡାର ସବୁଠୁ ଖତରନାକ ଗ୍ୟାଙ୍ଗଷ୍ଟାର ଟିଟୋ ଯିଏକି କି ଏବେ ଝାରପଡା ଜେଲରେ ଅଛି । ତାପଙ୍ଗ ଖଣି ଅଞ୍ଚଳରେ ବେଆଇନ ଖଣି ଖାଦାନ ଚଳାଇଥିଲା ସଞ୍ଜୟ ପାଇକରାୟ ତାଲିକାର ଚତୁର୍ଥ ସ୍ଥାନରେ ରହିଛି । ଜୁନ ମାସରେ ତାକୁ ଗିରଫ କରିଛି ଏସଟିଏଫ । ସେହିପରି ଜିତୁ ମାନସିଂ, ନିତୁ ମାନସିଂ, କାଳିଆ ବରାଳ, ତାପସ ମଙ୍ଗରାଜ ଭଳି ମୋଟ ୨୦ ଜଣ ଗ୍ୟାଙ୍ଗଷ୍ଟାରଙ୍କ ନାଁରେ ଏଫଆଇଆର ପ୍ରସ୍ତୁତ କରିଛି ଏସଟିଏଫ ।
ଯାହାର ନକଲ ଲାଗିଛି ଇଟିଭ ଟିମ ହାତରେ । ଏମାନେ ନିଜ ଅଞ୍ଚଳରେଗ୍ୟାଙ୍ଗ ରାଜ ଚଳାଇ ସ୍ଥାନୀୟ ଖଣି ଖାଦନକୁ କବଜା କରୁଥିଲେ । ବେଆଇନ ଭାବେ ଖଣିଜଦ୍ରବ୍ୟ ଲୁଟ କରି ମାଲାମାଲ୍ ହେଉଥିବାର ଜଣାପଡିଛି । ବଡସାଉଣି, କଳିଙ୍ଗ,ହଟିଆ,ଜୋଡମ୍ବା, ଚିଙ୍ଗୁଡି ଆଦି ସ୍ଥାନୀୟ ଖଣିରେ ଏମାନଙ୍କ ଗ୍ୟାଙ୍ଗରାଜ ଯୋଗୁଁ ପହଞ୍ଚି ପାରୁନଥିଲା ପୋଲିସ କି ପ୍ରଶାସନ । ମାତ୍ର ଏହା ଉପରେ ଲଗାମ କଷିବାକୁ ଯାଇଛି କ୍ରାଇମବ୍ରାଞ୍ଚ ।
ଖଣିଖାଦାନ ଅଞ୍ଚଳରେ ଏଭଳି ମାଫିଆ ରାଜ୍ ଯୋଗୁଁ ସରକାର ହରାଉଛନ୍ତି କୋଟି କୋଟି ଟଙ୍କାର ରାଜସ୍ବ । ବେଆଇନ ଖଣିଜଦ୍ରବ୍ୟ କାରବାରକୁ ନିୟନ୍ତ୍ରଣ କରିବା ଲକ୍ଷ୍ୟରେ ଆଜି ଗ୍ୟଙ୍ଗଷ୍ଟାର ଟିଟୋର ଘରେ ଚଢାଉ କରି ତାର ଦୁଇ ଭାଇଙ୍କୁ ନିଜ ହେପାଜତକୁ ନେଇଛି ଏସଟିଏଫ ଟିମ୍ ।
ଏ ସମ୍ପର୍କରେ ମତ ରଖି ଖଣିମନ୍ତ୍ରୀ ପ୍ରଫୁଲ ମଲ୍ଲିକ କହିଛନ୍ତି ଖୁବଶୀଘ୍ର ଏସବୁ ଖଣି ଖାଦାନ ଉପରେ ରୋକ ଲଗାଯିବ । ରାଜସ୍ବ ଆଦାୟ ପାଇଁ ସମସ୍ତ ପ୍ରକାର ପଦକ୍ଷେପ ନିଆଯିବ । ଅନ୍ୟପଟେ କ୍ରାଇମବ୍ରାଞ୍ଚ ଏଡିଜି କହିଛନ୍ତି ଏଫଆଇଆରକୁ ଆଧାର କରି ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ ଯିବ । ଏନେଇ ବିଭାଗୀୟ ଗୁପ୍ତ ତଥ୍ୟ ସଂଗ୍ରହ କରାଯାଉଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
