ଭୁବନେଶ୍ୱର: ରାଜଧାନୀ ଭୁବନେଶ୍ୱର, ପୁଣି ରାଜ୍ୟର ମନ୍ଦିରମାଳିନୀ ସହର ଦେଶର ପ୍ରଥମ ସ୍ମାର୍ଟ ସିଟି । ଶିକ୍ଷା, ସ୍ୱାସ୍ଥ୍ୟ, ଗମନାଗମନ, ପର୍ଯ୍ୟଟନ, ପ୍ରଯୁକ୍ତି ବିଦ୍ୟା, କଳା ସଂସ୍କୃତିର ଅନେକ ସମ୍ଭାର ନେଇ ବଢୁଥିବା ସହର ହେଉଛି ଭୁବନେଶ୍ୱର । ସେଥିପାଇଁ ଏହି ସହରକୁ ରାଜ୍ୟ ତଥା ରାଜ୍ୟ ବାହାରୁ ବିଭିନ୍ନ ବର୍ଗର ଲୋକ ପ୍ରତିଦିନ ଛୁଟି ଆସିଥାନ୍ତି । ଯେଉଁଥି ପାଇଁ ସହରର ବିକାଶ ଦୃତଗତିରେ ବୃଦ୍ଧି ପାଇବା ସହ ସବୁକ୍ଷେତ୍ରରେ ପରିର୍ବତ୍ତନ ଘଟୁଛି । ମନ୍ଦିର ମାଳିନୀ ସହରରୁ ସ୍ମାର୍ଟ ସିଟି ଆଡକୁ ବଢୁଛି ଭୁବନେଶ୍ୱର, ଯଦ୍ୱାରା ସବୁକ୍ଷେତ୍ରରେ ସ୍ମାର୍ଟ ହେଉଛି ସହର । କିନ୍ତୁ ସ୍ମାର୍ଟ ହେଇପାରୁନି ସହରର ସୁରକ୍ଷା ବ୍ୟବସ୍ଥା ।
ପ୍ରତିଦିନ ଏଠି ଘଟୁଛି ଘଟଣା । ଦୁର୍ଘଟଣା ଏହାସହ ସ୍ମାର୍ଟ ସିଟିରେ ବଢିଚାଲିଛି ଚୋରି, ଡକାୟତି, ହତ୍ୟା ଓ ମହିଳାଙ୍କୁ ଅସଦାଚରଣ । ଦୀର୍ଘ ଦିନରୁ ଘଟିଥିବା ଘଟଣାରେ ପୋଲିସକୁ ସଫଳତା ମିଳିନଥିବା ବେଳେ ଦିନକୁ ଦିନ ଘଟି ଚାଲିଛି ନୂଆ ନୂଆ ଘଟଣା ଯାହା ପୋଲିସର ଦକ୍ଷତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଗତ ଏକମାସ ମଧ୍ୟରେ ସହରରେ ମାତ୍ରାଧିକ ଭାବେ ବଢିଚାଲିଛି ଲୁଣ୍ଠନ ଯାହାର ଶିକାର ହୋଇଛନ୍ତି ବରିଷ୍ଠ ନାଗରିକ, ବ୍ୟବସାୟୀ, ମହିଳା, ସାଧାରଣ ନାଗରିକ ଓ ଅବସରପ୍ରାପ୍ତ ସୈନିକ । ସବୁ ଘଟଣାର ପୋଲିସ ତଦନ୍ତ କରୁଥିଲେ ମଧ୍ୟ ଅପରାଧିଙ୍କ ଆଗରେ ସ୍ମାର୍ଟ ସିଟିର ଲଢୁଆ ପୋଲିସ ଅସହାୟ ।
ଘଟଣା ନଂ1
ଭୁବନେଶ୍ୱରର ଗୁରୁତ୍ବପୂର୍ଣ୍ଣସ୍ଥାନ କୁହାଯାଉଥିବା ଚନ୍ଦ୍ରଶେଖରପୁର ଅଞ୍ଚଳରେ ରୁହନ୍ତି ପ୍ରତିରକ୍ଷା ବିଭାଗରୁ ଅବସର ନେଇଥିବା ସେନା କର୍ମଚାରୀ । ଏହି ଅଫିସରଙ୍କ ଘରେ ଦୁର୍ବୃତ୍ତ ପଶି ଲୁଟିନେଇଛନ୍ତି ଲକ୍ଷାଧିକ ଟଙ୍କାର ସମ୍ପତ୍ତି । ଏହି ଡକାୟତ ଘଟଣାର ସମସ୍ତ କାରନାମା ସିସିଟିଭିରେ କଏଦ ହୋଇଥିଲେ ମଧ୍ୟ ବର୍ତ୍ତମାନ ସୁଦ୍ଧା ପୋଲିସ ହାତ ଖାଲି ।
ଘଟଣା ନଂ2
ଉତ୍କଳ ବିଶ୍ୱବିଦ୍ୟାଳୟର ସାମ୍ବାଦିକତା ବିଭାଗର ଜଣେ ଛାତ୍ରୀ ମଧ୍ୟାହ୍ନ ୧୨ଟାରେ ଭିଏସଏସ ନଗର ସ୍କୁଲ ନିକଟରେ ଏକୁଟିଆ ଅଟୋକୁ ଅପେକ୍ଷା କରିଥିଲେ । ସେହି ସମୟରେ ନିକଟସ୍ଥ ଗଳିରୁ ବାହାରି ଦୁଇ ଯୁବକ ଛାତ୍ରୀଙ୍କ ଠାରୁ ଲୁଟ ଉଦ୍ୟମ କରିଥିଲେ । ଠେଲାପେଲା ମଧ୍ୟରେ ଯୁବତୀଙ୍କ ମୋବାଇଲ ଫୋନ ଲୁଟି ନେଇଥିଲେ ଲୁଟେରା। ଏନେଇ ଯୁବତୀ ଜଣକ ସହିଦନଗର ଥାନାରେ ଅଭିଯୋଗ କରିଥିଲେ ମଧ୍ୟ ପୋଲିସ ଲୁଟେରାଙ୍କ କୌଣସି ସୁରାକ ପାଇନି ।
ଅଧିକ ପଢନ୍ତୁ:15 ବର୍ଷରେ ବୈଶାଖୀ ବାଣିଜ୍ୟ ମେଳା
ଘଟଣା ନଂ3
ନୟାପଲ୍ଲୀ ଥାନା ଅଧିନରେ ଥିବା ଏକ ସୁନା ଦୋକାନର ମାଲିକଙ୍କ ଠାରୁ ଗତ ଗୁରୁବାର ରାତିରେ ଲୁଟ କରିଛନ୍ତି ଲକ୍ଷାଧିକ ଟଙ୍କା । ସୂଚନା ଅନୁସାରେ ରାତିରେ ସୁନା ଦୋକାନର ମାଲିକ ଦୋକାନ ବନ୍ଦ କରୁଥିବା ବେଳେ ହଠାତ୍ ଆସିଥିଲେ ଡକାୟତ ଦଳ ଆଉ ଲୁଟି ନେଇଥିଲେ ଏକ ବ୍ୟାଗ ଯେଉଁଥିରେ ମୋଟ 32 ଲକ୍ଷ ଟଙ୍କାର ସୁନା ଓ ଟଙ୍କା ଥିଲା । ସୁନା ମାଲିକ ଥାନାରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିପାରି ନାହିଁ ।
ଘଟଣା ନଂ4
ମାର୍ଚ୍ଚ 27 ସୋମବାର ଚନ୍ଦ୍ରଶେଖରପୁର ଥାନା ଅଧିନରେ ହୋଇଥିଲା ଏକ ବଡଧରଣର ଲୁଟ । ନୀଳାଦ୍ରି ବିହାର ସେକ୍ଟର ୨ ଅଞ୍ଚଳରେ ରହୁଥିବା ମୟୂରଭଞ୍ଜ ସମକୁଲର ପଦ୍ମଲୋଚନ ମହନ୍ତଙ୍କ ଘରେ ଲୁଟେରା ପଶି ସଫା କରି ଦେଇଛନ୍ତି ୫ ଲକ୍ଷ ଟଙ୍କା ସହ ଅଢେଇ ଲକ୍ଷ ଟଙ୍କା ମୂଲ୍ୟର ସୁନାଗହଣା । ଲୁଟର ଶିକାର ହୋଇଥିବା ପଦ୍ମଲୋଚନ ପୋଲିସ ନିକଟରେ ଅଭିଯୋଗ କରିଥିଲେ ମଧ୍ୟ ଲୁଟେରାଙ୍କୁ ଧରିବାରେ ସକ୍ଷମ ହୋଇନାହିଁ ପୋଲିସ । ଖାଲି ଏତିକି ନୁହେଁ ମର୍ଣିଂୱାର୍କରେ ଯାଉଥିବା ମହିଳା ବୟୋଜ୍ୟଷ୍ଠ ଲୋକଙ୍କୁ ବି ଛାଡୁନାହାଁନ୍ତି ଲୁଟେରା ।
ଏମିତି ପ୍ରତିଦିନ ରାଜଧାନୀରେ ଲୁଟ ହେଉଥିଲେ ମଧ୍ୟ ପୋଲିସ ଅସହାୟ ହୋଇପଡିଛି । କେବଳ ହେଲମେଣ୍ଟ ଚେକିଂ ସହ ଭିଭିଆଇପିଙ୍କୁ ସୁରକ୍ଷା ଦେବାରେ କମିଶନରେଟ ପୋଲିସ ବ୍ୟସ୍ତ ଥିବାବେଳେ ଜନସାଧାରଣଙ୍କ ଧନ ଜୀବନ ଏବେ ବିପନ୍ନରେ ।
ଭୁବନେଶ୍ୱରରୁ ବିକାଶ ଦାସ, ଇଟିଭି ଭାରତ
