ଭୁବନେଶ୍ବର: ନିର୍ବାଚନ ନୁହେଁ ଦଳୀୟ ପ୍ରାର୍ଥୀ ଚୟନ କରିବାକୁ ନେଇ ସରଗରମ ହୋଇଉଠିଛି ରାଜଧାନୀ ଉପକଣ୍ଠସ୍ଥ ଜୟଦେବ ସଂରକ୍ଷିତ ବିଧାନସଭା ଆସନ । ଏଠାରେ ନିର୍ବାଚନ ହେବା ପୂର୍ବରୁ ଉଣାଅଧିକେ ସବୁ ଦଳରେ ଦେଖାଦେଇଛି ଗୋଷ୍ଠୀ କନ୍ଦଳ । ବିଭିନ୍ନ ଦଳର ଆଶାୟୀଙ୍କ ପାଇଁ ଏବେ କଣ୍ଟା ସାଜିଛନ୍ତି ଦଳୀୟ ବିଦ୍ରୋହୀ । ଅନ୍ୟପଟେ ସ୍ବାଧିନ ପ୍ରାର୍ଥୀଙ୍କୁ ନେଇ ମଧ୍ୟ ଆଶାୟୀଙ୍କ ଚିନ୍ତା ବଢିବାରେ ଲାଗିଛି । ନିର୍ବାଚନ ସମୟରେ ଦଳରେ ସୃଷ୍ଟି ହୋଇଥିବା ଏଭଳି ପରିସ୍ଥିତିର ମୁକାବିଲା କରିବା ସବୁ ଦଳ ପାଇଁ କାଠିକର ପାଠ ହୋଇପଡିଛି ।
ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି ଏଥର ଦୁଇ ପ୍ରମୁଖ ଦଳ ନିର୍ବାଚନମଣ୍ଡଳୀରେ ତାଙ୍କର ପ୍ରାର୍ଥୀତ୍ବରେ କରିଛନ୍ତି ପରିବର୍ତ୍ତନ । ଗତ 2014 ନିର୍ବାଚନରେ ବିଜେଡି ପ୍ରାର୍ଥୀ ଭାବେ ନିର୍ବାଚନ ଲଢିଥିଲେ ଦଳର ବରିଷ୍ଠ ନେତା ତଥା ଅର୍ଥମନ୍ତ୍ରୀ ଶଶୀଭୂଷଣ । ମାତ୍ର ଏଥର ପୂର୍ବତନ ବିଧାୟକ ଅରବିନ୍ଦ ଢାଲିଙ୍କୁ ପ୍ରାର୍ଥୀ କରିଛି ବିଜେଡି । ମାତ୍ର ତାଙ୍କୁ ଦଳର ଅନ୍ୟ ଏକ ଗୋଷ୍ଠୀ ପ୍ରାର୍ଥୀ ଭାବେ ଗ୍ରହଣ କରିବା ଅସ୍ଥାରେ ନାହାନ୍ତି ।
ସମାନ ଅବସ୍ଥା ଦେଖିବାକୁ ମିଳିଛି ବିଜେପିରେ ଗତ ଥର ଏଠାରୁ ସ୍ବାଧିନ ଭାବେ ନିର୍ବାଚନ ଲଢିଥିବା ନରେନ୍ଦ୍ରନାଥ ନାୟକଙ୍କୁ ଏଥର ପ୍ରାର୍ଥୀ କରିଛି ବିଜେପି । ଯାହାକୁ ନେଇ ଦଳରେ ଦେଖାଦେଇଛି ଅସନ୍ତୋଷ । ଗତଥର ଦଳୀୟ ପ୍ରାର୍ଥୀ ଭାବେ ନିର୍ବାଚନ ଲଢିଥିବା ବସନ୍ତ ନାୟକଙ୍କୁ ଏଥର ମିଳିନାହିଁ ଟିକେଟ । ନରେନ୍ଦ୍ରଙ୍କ ପ୍ରାର୍ଥୀତ୍ବ ବିରୋଧ କରିଛନ୍ତି ବସନ୍ତ । ଯାହା ବର୍ତ୍ତମାନ ବିଜେପି ପାଇଁ ସୃଷ୍ଟି କରିଛି ସମସ୍ୟା ।
2019 ମୁକାବିଲା ଆରମ୍ଭ ହେବା ପୂର୍ବରୁ ନିର୍ବାଚନୀ ରେସ୍ରୁ ବାଦ ପଡିଛି କଂଗ୍ରେସ । ଏଠାରୁ ସୁକାନ୍ତ ତିଆଡିଙ୍କୁ ପ୍ରାର୍ଥୀ କରିଥିଲା । ମାତ୍ର ଯାଞ୍ଚ ବେଳେ ନାକଚ ହୋଇଯାଇଛି ତାଙ୍କର ପ୍ରାର୍ଥୀପତ୍ର । ଏଠି କାହାକୁ ସମର୍ଥନ ତାହା ବର୍ତ୍ତମାନ ରହସ୍ୟାବୃତ୍ତ ରହିଛି । ଅନ୍ୟପଟେ ଆମ ସଙ୍ଗଠନ ସମର୍ଥିତ ସ୍ବାଧୀନ ପ୍ରାର୍ଥୀ ନବକିଶୋର ମଲ୍ଲିକ ଏଥର ନିର୍ଣ୍ଣାୟକ ଭୂମିକାରେ ଅବତୀର୍ଣ୍ଣ ହେବେ ବୋଲି କୁହାଯାଉଛି । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି ସ୍ବାଧୀନ ପ୍ରାର୍ଥୀ ନବଙ୍କୁ ବିଭିନ୍ନ ବିଦ୍ରୋହୀ ଗୋଷ୍ଠୀ ସମର୍ଥନ କରିବା ନେଇ ସମ୍ଭାବନା ଦେଖାଦେଇଛି ।
2009ରେ ଏହି ନିର୍ବାଚନମଣ୍ଡଳୀ ଗଠିତ ହୋଇଥିଲା। ସେବେଠାରୁ ଏହା ବିଜେଡିର ଗଡ ଭାବେ ପରିଚିତ। ଏଥରର ମୁକାବିଲା ମୁଖ୍ୟତ ବିଜେଡି-ବିଜେପି ମଧ୍ୟରେ ହେବାକୁ ଯାଉଛି । ଚଳିତ ନିର୍ବାଚନରେ ବିଜେଡି ଏଠାରେ ହ୍ୟାଟ୍ରିକ ମାରୁଛି ନାଁ ଅନ୍ୟ ଦଳ ଏହି ଗଡରେ ଧସେଇ ପଶିବାରେ ସକ୍ଷମ ହେଉଛି ତାହା ନିର୍ବାଚନୀ ଫଳାଫଳରୁ ସ୍ପଷ୍ଟ ହୋଇଯିବ।
ଭୁବନେଶ୍ବରରୁ ସଞ୍ଜୀବ ରାୟ, ଈଟିଭି ଭାରତ
