ଭୁବନେଶ୍ବର: ଅସହ୍ୟ ଗରମକୁ ବୁଲୁନି ପଙ୍ଖା । ରାତିର କିଟିକିଟି ଅନ୍ଧାରକୁ ଜଳୁନି ବଲ୍ବ । ବିଞ୍ଚଣା ପବନ ପାଲଟିଛି ଏକମାତ୍ର ସାହା । ଡେଡଲାଇନ ସରିବା ପରେ ବି ଶତ ପ୍ରତିଶତ ମିଳିନି ବିଦ୍ୟୁତ । ଦିନେ 2 ଦିନ ପରେ ଲାଇଟ ଆସିବ କହି ଗରିବ ବସ୍ତି ବାସିନ୍ଦାକୁ ଭୁଲେଇ ଚାଲିଛନ୍ତି ବିଭାଗୀୟ କର୍ମଚାରୀ ।
ଫନି ଯିବାର 10 ଦିନ ପରେ ବି ବିନା ବିଦ୍ୟୁତରେ ରାଜଧାନୀର ବହୁ ଅଞ୍ଚଳ । 12 ତାରିଖ ସୁଦ୍ଧା ସବୁ ଅଞ୍ଚଳକୁ ବିଦ୍ୟୁତ ଯୋଗାଣ ପ୍ରତିଶ୍ରୁତିକୁ ପୂରଣ କରିପାରିନାହିଁ ଶକ୍ତି ବିଭାଗ । ଏପଟେ ବିଦ୍ୟୁତ କରଣରେ ନିୟୋଜିତ କର୍ମଚାରୀଙ୍କ କହିବା ଅନୁଯାୟୀ ସରକାର ଖାଲି କହିଦେଲେ ହେବ ନାହିଁ ଅନେକ ସମସ୍ୟା ରହୁଛି । ପୂରା ଭୁବନେଶ୍ବର ବିଦ୍ୟୁତ ପାଇବାକୁ ଆହୁରି 15 ଦିନ ଲାଗିବ ।
ଧିମେଇଯାଇଛି ବିଦ୍ୟୁତ ବିଭାଗର ପ୍ରୟାସ । ଏବେ ବି ବିଭିନ୍ନ ସ୍ଥାନରେ ଚାଲିଛି କାମ । ଏହାର ସ୍ଥିତି ପରଖିବା ପାଇଁ ଆମ ଟିମ ରାଜଧାନୀର ବିଭିନ୍ନ ଅଞ୍ଚଳ ଯାଇ ଅନୁଧ୍ୟାନ କରିଛନ୍ତି ।
ଭୁବନେଶ୍ବରର କଳିଙ୍ଗ ଷ୍ଟୁଡିଓ ଛକ ଉପରେ ସରିନି ଖୁଣ୍ଟି ପୋତା । ଏହା ପରେ ତାର ଟଣାଯିବ । ସମାନ ସ୍ଥିତି ଭରତପୁର ଅଞ୍ଚଳରେ । ଏଠି ବିଭିନ୍ନ ସାହି ଓ ବସ୍ତି ଅଞ୍ଚଳରେ ଲୋକେ କର୍ମଚାରୀଙ୍କୁ ସହଯୋଗ କରି ଖୁଣ୍ଟି ପୋତୁଛନ୍ତି । ଏଠାରେ ଏବେ ବି ବିଦ୍ୟୁତ ତାର ଉପରୁ ଲୋଟି ପଡିଥିବା ଗଛକୁ ସଫା କରାଯାଇନାହିଁ । ଏହା ପରେ ଇଟିଭି କ୍ୟାମେରା ପହଞ୍ଚିଥିଲା ସୁନ୍ଦରପଦା ଅଞ୍ଚଳରେ । ବହୁ ଦିନ ଧରି ବିଜୁଳି ନ ଆସିବାରୁ ଲୋକେ ଏଠାରେ ତାତି ଉଠିଲେଣି । ସ୍ଥାନୀୟ ନୂଆସହି ଅଞ୍ଚଳରେ ଏବେ କାମ ଆରମ୍ଭ ହେଉଛି । କେବେ ସଂଯୋଗ ମିଳିବ ତାହା କେହି କହି ପାରୁ ନାହାଁନ୍ତି । ସେହିପରି ସମାନ ସ୍ଥିତି କପିଳେଶ୍ବର ଓ ଶିଶୁପାଳଗଡ଼ରେ । ଏଠାରେ ଏବେବି ଜାରି ରହିଛି କାମ ।
ଏ ସମ୍ପର୍କରେ ସ୍ଥାନୀୟ ଲୋକଙ୍କ କହିବା ଅନୁଯାୟୀ, ‘ସରକାର କହି ଦେଲେ ଶତ ପ୍ରତିଶତ ବିଜୁଳି ସଂଯୋଗ ହୋଇଛି, ଏବେ ଆମେ ଅନ୍ଧାରରେ ହଇରାଣ ହେଉଛୁ ।
ଭୁବନେଶ୍ବରରରୁ ଜ୍ଞାନଦର୍ଶୀ ସାହୁ, ଈଟିଭି ଭାରତ
