ଭୁବନେଶ୍ବର: ଗତ ମେ ମାସରେ ରାଜ୍ୟର ଉପକୂଳରେ ଫନି ତାଣ୍ଡବରେ ବହୁ କ୍ଷତିଗ୍ରସ୍ତ ହୋଇଥିଲେ ରାଜଧାନୀ ଭୁବନେଶ୍ବରର ଉଠା ଦୋକାନୀ । ଉଠା ଦୋକାନୀଙ୍କ ଏମିତି ଦୁର୍ଦ୍ଦଶା ଦେଖି ରାଜ୍ୟ ସରକାର ସେମାନଙ୍କୁ ୧୦ହଜାର ଟଙ୍କାର ଆର୍ଥିକ ସହାୟତା ମିଳିବା ନେଇ ଖୋଦ ମୁଖ୍ୟମନ୍ତ୍ରୀ ଘୋଷଣା କରିଥିଲେ। ତେବେ ଘୋଷଣାକୁ ଏକ ମାସ ବିତିଯାଇଥିଲେ ମଧ୍ୟ ଏ ପର୍ଯ୍ୟନ୍ତ ଉଠା ଦୋକାନୀଙ୍କୁ ସରକାରୀ ସହାୟତା ମିଳିପାରିଲା ନାହିଁ ।
କିଛି ଦୋକାନୀଙ୍କ ଅଭିଯୋଗ ଦୋକାନ ପିଛା ୧ ହଜାର ଟଙ୍କା ହାତଗୁଞ୍ଜା ଦେଲେ ଟଙ୍କା ମିଳିବ ବୋଲି ଅଭିଯୋଗ ହେଉଛି । ହେଲେ ବିଏମସି ଅଧିକାରୀଙ୍କ କହିବା କଥା ହେଲା କାଗଜପତ୍ର ଯାଞ୍ଚ ଚାଲିଛି , ଖୁବଶୀଘ୍ର କ୍ଷତିଗ୍ରସ୍ତଙ୍କୁ ମିଳିବ ସହାୟତା ଟଙ୍କା । ମିଳିଥିବା ସୂଚନା ଅନୁସାରେ ୨୦୧୫-୧୬ ମସିହାରେ ହୋଇଥିବା ସର୍ଭେ ରିପୋର୍ଟ ଆଧାରରେ ବ୍ୟବସାୟୀଙ୍କୁ ସହାୟତା ପ୍ରଦାନ କରାଯିବ । ଏଠି ପ୍ରଶ୍ନ ଉଠୁଛି ଯଦି ୪ ବର୍ଷ ତଳର ସର୍ଭେ ରିପୋର୍ଟକୁ ଭିତ୍ତି କରି ସହାୟତା ପ୍ରଦାନ କରାଯିବ, ତେବେ ୨୦୧୫-୧୬ ମସିହା ପରେ ଯେଉଁମାନେ ନୂଆ କରି ଉଠାଦୋକାନ କରିଛନ୍ତି, ସେମାନଙ୍କର କଣ କ୍ଷତି ହୋଇନାହିଁ? ସରକାରଙ୍କ ଏପରି ନିଷ୍ପତ୍ତିକୁ ଅନେକ ବ୍ୟବସାୟୀ ଗ୍ରହଣ କରିବା ସ୍ଥିତିରେ ନାହାଁନ୍ତି ।
ବିଶ୍ବସ୍ଥ ସୂତ୍ରରୁ ମିଳିଥିବା ସୂଚନା ଅନୁସାରେ ଆଉ କିଛିଦିନ ପରେ ବିଏମସି ନିର୍ବାଚନ ହେବ । ବିଏମସି ଯୋଜନା କରିଛି ଯେ, ନିର୍ବାଚନ ପୂର୍ବରୁ ଏହି ଟଙ୍କା ବ୍ୟବସାୟୀଙ୍କୁ ଦେଇ ସରକାର ନିଜ ସପକ୍ଷରେ ଭୋଟ ବ୍ୟାଙ୍କକୁ ସୁନିଶ୍ଚିତ କରିବା ପାଇଁ ଚାହୁଁଛନ୍ତି ।
ଅନ୍ୟପକ୍ଷରେ ଅଭିଯୋଗକୁ ଖଣ୍ଡନ କରିଛନ୍ତି ବିଏମସି ଅଧିକାରୀ । ପୌର ନିର୍ବାଚନ ନେଇ ଟଙ୍କା ପାଇବାରେ ବିଳମ୍ବ ଅଭିଯୋଗ ସମ୍ପୂର୍ଣ୍ଣ ଭିତ୍ତିହୀନ । ଫନି କ୍ଷତିଗ୍ରସ୍ତ ଉଠା ଦୋକାନୀଙ୍କ ଚିହ୍ନଟ ପ୍ରକ୍ରିୟା ଜାରି ରହିଛି । ବିଭାଗୀୟ ମଞ୍ଜୁରୀ ମିଳିଲା ପରେ କ୍ଷତିଗ୍ରସ୍ତଙ୍କ ବ୍ୟାଙ୍କ ଆକାଉଣ୍ଟରେ ଟଙ୍କା ଆସିବ ବୋଲି ବିଏମସି ଡେପୁଟି କମିଶନର ଶ୍ରୀମନ୍ତ ମିଶ୍ର କହିଛନ୍ତି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
