ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦୁଇଟି ବିଧାନସଭା ସିଟରେ ନିର୍ବାଚନ ଲଢିବା ଓ ଜାଲ ଚିଠିକୁ ନେଇ ଚାଲିଥିବା ଆରୋପ ପ୍ରତ୍ୟାରୋପରେ ପରେ ଖାରବେଳ ନଗର ଥାନା ପୋଲିସର ନୋଟିସ ପାଇ ଆଜି ବିଜେପି ମୁଖପାତ୍ର ଗୋଲକ ମହାପାତ୍ର ନିଜ ଉତ୍ତର ରଖିଛନ୍ତି ।
ସୂଚନା ଅନୁସାରେ ଏକ ସାମ୍ବାଦିକ ସମ୍ମିଳନୀରେ ବିଜେପି ଉପସଭାପତି ସମୀର ମହାନ୍ତି, ଦଳର ମୁଖପାତ୍ର ଗୋଲକ ମହାପାତ୍ର ଓ ବିଜେପି ଯୁବ ସଭାପତି ଟଙ୍କଧର ତ୍ରିପାଠୀଏକ ଚିଠି ଦେଖାଇ ସରକାରଙ୍କ ଉପରେ ବର୍ଷିଥିଲେ । ଅଭିଯୋଗ କରିଥିଲେ ଗୁଇନ୍ଦା ଚିଠି ଆଧାରରେ ମୁଖ୍ୟମନ୍ତ୍ରୀ ଦୁଇଟି ଆସନରୁ ନିର୍ବାଚନ ଲଢିବା ପାଇଁ ନିଷ୍ପତ୍ତି ନେଇଛନ୍ତି । ଏହି ଚିଠିକୁ ନେଇ ରାଜନୀତି ତେଜିଥିବାବେଳେ ପୋଲିସ ଡିଜି ମିଛ ବୋଲି କହିଥିଲେ, ପରେ ଖାରବେଳ ନଗର ଥାନାରେ ଏକ ମାମଲା ହୋଇଥିଲା।ପୋଲିସ କମିଶନର ଏହି ଚିଠି କେଉଁଠୁ ଆସିଲା ତାହାର ତଦନ୍ତ ହେବ ବୋଲି କହିଥିଲେ ।
ସେହିକ୍ରମରେ ପୋଲିସ ଏହି ତିନି ନେତାଙ୍କୁ ନୋଟିସ ଦେଇଥିଲା , ଆଜି ଗୋଲକ ମହାପାତ୍ର ତାଙ୍କ ଓକିଲଙ୍କ ସହ ଖାରବେଳ ନଗର ଥାନରେ ହାଜର ହୋଇ ନିଜ ପକ୍ଷ ରଖିଛନ୍ତି । ଗୋଲକଙ୍କ ଓକିଲ ସୂଚନା ଦେଇ କହିଛନ୍ତି ଯେ ଏହି ଚିଠି ଅଫିସିଆଲ ସୁତ୍ରୁରୁ ନୁହେଁ ବରଂ ଏକ ନିର୍ଦ୍ଦିଷ୍ଟ ନମ୍ବରରୁ ଆସିଥିଲା । ଯାହାକି ଏବେବି ଅନେକ ୱେବସାଇଟରେ ଉପଲବ୍ଧ ହେଉଥିବାବେଳେ ଏବେବି ସୋସିଆଲ ମିଡିଆରେ ଘୁରି ବୁଲୁଛି। ଏହି ମାମଲାରେ ଅନ୍ୟତମ ନେତା ଟଙ୍କଧର ତ୍ରିପାଠୀଆସନ୍ତାକାଲି ଖାରବେଳ ନଗର ଥାନାରେ ହାଜର ହେବେ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
