ବୌଦ୍ଧ: ଦିନିକିଆ ବୌଦ୍ଧ ଜିଲ୍ଲା ଗସ୍ତରେ ବିଶ୍ବ ହିନ୍ଦୁ ପରିଷଦର(Working President of the Vishwa Hindu Parishad) ଅଧ୍ୟକ୍ଷ ଡ଼ ପ୍ରବୀଣ ଭାଇ ତୋଗାଡିଆ । ହିନ୍ଦୁତ୍ବର ରକ୍ଷା ତଥା ହିନ୍ଦୁ ମାନଙ୍କ ସାମାଜିକ ଓ ଅର୍ଥନୈତିକ ଅଭିବୃଦ୍ଧି ପାଇଁ ସେ ଆହ୍ବାନ ଦେଇଛନ୍ତି । ଆଜି(ରବିବାର) ପ୍ରଥମ ଦିନରେ ସେ ରକ୍ସା ଠାରେ ଆୟୋଜିତ ହିନ୍ଦୁ ଚିନ୍ତନ ମହାସଭାରେ ଯୋଗ ଦେଇଥିଲେ ।
ଏହାପରେ ଅପରାହ୍ନରେ ବୌଦ୍ଧ ସ୍ଥିତ ପଥପ୍ରାନ୍ତ କେନ୍ଦ୍ର ଠାରେ ବୁଦ୍ଧିଜୀବୀ ଫୋରମ ପକ୍ଷରୁ ପ୍ରବୀଣ ଭାଇଙ୍କୁ ସ୍ବାଗତ କରାଯାଇଥିଲା । ସେଠାରେ ତୋଗାଡିଆ ହିନ୍ଦୁତ୍ବ ଉପରେ ଆଲୋଚନା କରିବା ସହିତ ଲୋକଙ୍କ ଜୀବନ ଜୀବିକା, ସ୍ବାସ୍ଥ୍ୟ ସେବା, ନ୍ୟାୟ ପ୍ରଦାନ, ଏକ ମୁଠା ଚାଉଳ ଯୋଜନା କିଭଳି ବ୍ୟବସ୍ଥିତ ହୋଇପାରିବ ସେ ସମ୍ପର୍କରେ ସୂଚନା ଦେଇଥିଲେ । ଏହାଛଡା ଆସନ୍ତା ମେ 26 ତାରିଖରୁ ହିନ୍ଦୁ ରୋଜଗାର ଯୋଜନା ସମ୍ପର୍କରେ ମଧ୍ୟ ସେ ସୂଚନା ଦେଇଥିଲେ । ତୋଗାଡିଆଙ୍କ ଗସ୍ତକୁ ଦୃଷ୍ଟିରେ ରଖି ବୌଦ୍ଧ ପୋଲିସ ପକ୍ଷରୁ ବ୍ୟାପକ ସୁରକ୍ଷାର ବନ୍ଦୋବସ୍ତ କରାଯାଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
