ବୌଦ୍ଧ: ଜିଲ୍ଲାରେ ମଦ ବିରୋଧରେ ତାତିଛି ମହିଳା ସ୍ବୟଂସହାୟକ ଗୋଷ୍ଠୀ(ଏସଏସଜି) । ମଦ ବନ୍ଦ ଦାବିରେ ଗୋଟିଏ ଗୋଷ୍ଠୀ ଗ୍ରାମାଞ୍ଚଳରେ ବିରୋଧ କରିଥିବା ବେଳେ ଅନ୍ୟ ଏସଏସଜି ଗ୍ରୁପ୍ ଜିଲ୍ଲାପାଳଙ୍କ କାର୍ଯ୍ୟାଳୟରେ ବିକ୍ଷୋଭ ପ୍ରଦର୍ଶନ କରିଛି ।
ଜିଲ୍ଲାରେ ବାହାର ଲୋକଙ୍କ ଦ୍ବାରା ପ୍ରସ୍ତୁତ ବିଷାକ୍ତ ମଦ ବେପାର କଥା ବାବଦର ଉଣା ଅଧିକେ ସବୁ ରାଜନୈତିକ ଦଳର ନେତା, ବିଭାଗୀୟ ଅଧିକାରୀ ସମସ୍ତେ ଅବଗତ ଅଛନ୍ତି । ମାତ୍ର ମଦ ମାଫିଆଙ୍କ ସହ ଥିବା ସମ୍ପର୍କ ଯୋଗୁଁ ସେମାନେ ଏନେଇ ମୁହଁ ଖୋଲୁନାହାଁନ୍ତି । ଏପଟେ ଗ୍ରାମାଞ୍ଚଳରୁ ଆରମ୍ଭ ସହର ପର୍ଯ୍ୟନ୍ତ ସବୁଠି ମଦ ଯୋଗୁଁ ପରିବାର ଉଜୁଡି ଯିବାକୁ ବସିଛି । ଏଠାକାର ହରିପୁର ଗାଁରେ ଥିବା ମଦ ଭାଟିକୁ ଅନ୍ୟତ୍ର ସ୍ଥାନାନ୍ତର ପାଇଁ ବାରମ୍ବାର ମହିଳାଙ୍କ ପକ୍ଷରୁ ଦାବି ହୋଇଆସୁଛି । ହେଲେ ଏଥିପ୍ରତି କେହି କର୍ଣ୍ଣପାତ କରୁନଥିବା ଅଭିଯୋଗ ହୋଇଛି । ବିଭାଗୀୟ ଅଧିକାରୀ ସାପ ମରିବନି କି ବାଡି ଭାଙ୍ଗିବନି ନ୍ୟାୟରେ ଏ ସମ୍ପର୍କରେ ନିଜର ଉତ୍ତର ରଖୁଛନ୍ତି।
ସେହିପରି ହରଭଙ୍ଗା ବ୍ଲକ କରଡି ଗାଁର ୧୪ ଟି ମହିଳା ସ୍ବୟଂ ସହାୟକ ଗୋଷ୍ଠୀର ଶତାଧିକ ମହିଳା ବୌଦ୍ଧ ଜିଲ୍ଲାପାଳଙ୍କ ନିକଟରେ ଗାଁରେ ମଦକୁ ବନ୍ଦ କରିବାକୁ ଦାବି କରିଛନ୍ତି । ଜିଲ୍ଲାର ବିଭିନ୍ନ ସ୍ଥାନରେ ମଦଭାଟି ଖୋଲାଯିବା ସହ ମଦମାଫିଆ ଚୋରାରେ ଖୁଚୁରା ମଦ ବିକିବାକୁ ପ୍ରୋତ୍ସାହିତ କରୁଥିବା ଆଲୋଚନା ହେଉଛି । ଏ ଦିଗରେ ଜିଲ୍ଲା ପ୍ରଶାସନ କଡା ପଦକ୍ଷେପ ଗ୍ରହଣ କରିବାକୁ ବୁଦ୍ଧିଜୀବୀ ମହଲରେ ଦାବି ହୋଇଛି।
ବୌଦ୍ଧରୁ ସତ୍ୟନାରାୟଣ ପାଣି, ଈଟିଭି ଭାରତ
