ବୌଦ୍ଧ: ଆକାଶ ଛୁଆଁ ହୋଇଛି ପନିପରିବା ଦର । ଦର ବୃଦ୍ଧିର ମାଡ଼ ସିଧାସଳଖ ହାଣ୍ଡିଶାଳ ଉପରେ ପଡ଼ିଛି । ଅଧିକାଂଶ ପନିପରିବାର ଦର ଶହେ ଟଙ୍କା ଉପରେ ରହିଥିବା ବେଳେ ସାଧାରଣ ଖାଉଟି ବର୍ତ୍ତମାନ ଚିନ୍ତାରେ ପଡ଼ି ଯାଇଛନ୍ତି । ଜିଲ୍ଲାର ବିଭିନ୍ନ ବଜାରରେ ପରିବା ଦର ବୃଦ୍ଧିର ପ୍ରଭାବ ଦେଖିବାକୁ ମିଳିଛି । ପନିପରିବା ଦର ନିୟନ୍ତ୍ରଣ ହେବାର ନାଁ ଧରୁନି । କେବଳ ଆଳୁ ପିଆଜ ଭଳି କିଛିର ଦର ନିୟନ୍ତ୍ରଣ ମଧ୍ୟରେ ରହିଥିବା ବେଳେ ଅଧିକାଂଶ ପରିବା ଦର ଶହେ ଟଙ୍କା ଉପରେ ରହୁଛି ।
ବୌଦ୍ଧ ସଦର ମହକୁମା ସମେତ କଣ୍ଟାମାଳ, ପଲସାଗୋରା , ମନମୁଣ୍ଡା, ବାଉଁଶୁଣୀ, ବଘିଆପଡା, ତିଲେଶ୍ବର ,କୁଶଙ୍ଗ ଭଳି ପୁରୁଣା ସାପ୍ତାହିକ ହାଟରେ ପରିବା ଦରର ଗଭୀର ପ୍ରଭାବ ପଡିଛି । ଫୁଲକୋବି ଠାରୁ ନେଇ ଝୁଡୁଙ୍ଗ, ପୋଟଳ, ଭେଣ୍ଡି, କଖାରୁର ଦର ଯଥେଷ୍ଟ ଅଧିକ ରହିଥିବା ବେଳେ କଞ୍ଚା ଲଙ୍କାର ଦାମ 200 ଟଙ୍କା ଉପରେ ରହୁଛି । ଗ୍ରାହକଙ୍କୁ ସବୁଠାରୁ ବେଶୀ କନ୍ଦାଉଛି ଟମାଟୋର ଦର । ଟମାଟୋର ଦର 100 ଟଙ୍କାରୁ ଆରମ୍ଭ ହୋଇଥିବା ବେଳେ ଆଜି 180 ଟଙ୍କାରେ ପହଞ୍ଚିଛି । ସ୍ଥାନେସ୍ଥାନେ ଟମାଟୋର ଦର 200 ଟଙ୍କା ଥିବା ଗ୍ରାହକ କହିଛନ୍ତି ।
ଫଳରେ ବର୍ତ୍ତମାନ ଟମାଟୋକୁ କେଜିରେ କିମ୍ବା ଗ୍ରାମରେ ନୁହେଁ ବରଂ ଗୋଟାରେ କିଣିବାକୁ ପଡ଼ିଥିବା ବୋଲି ଗ୍ରାହକ ତାତ୍ସଲ୍ୟ କରି କହିଛନ୍ତି । ବିଭିନ୍ନ ରାଜ୍ୟରେ ବର୍ଷା ଯୋଗୁଁ ସଡକ ପଥ ଗଭୀର ଭାବରେ ପ୍ରଭାବିତ ହୋଇଥିବାରୁ ବାହାରୁ ପନିପରିବା ଆମଦାନୀ ହୋଇ ପାରୁନାହିଁ । ସେପଟେ ବର୍ତ୍ତମାନ ଜିଲ୍ଲାର ବିଭିନ୍ନ ସ୍ଥାନରେ ଉତ୍ପାଦନ ହେଉଥିବା ପନିପରିବା ଦାମ କମ ରହିଥିବା ବେଳେ ଆମଦାନୀ ହେଉଥିବା ପରିବା ଖାଇବା ଗରିବ ଲୋକଙ୍କ କଷ୍ଟ ବୋଲି ଗ୍ରାହକ କହିଛନ୍ତି । ଏହାସହ ପନିପରିବାର ଏଭଳି ଦର ବୃଦ୍ଧି ସମୟରେ ସ୍ଥାନୀୟ କରଡ, ଆମ୍ବଡା ଭଳି ସାମଗ୍ରୀର ଯଥେଷ୍ଟ ଚାହିଦା ବୃଦ୍ଧି ପାଇଛି ।
ଅଧିକ ପଢ଼ନ୍ତୁ: ଟମାଟୋ ବିକି ହେଲେ କୋଟିପତି, ମାସକରେ ରୋଜଗାର କଲେ ଦେଢ଼ କୋଟି
ସେପଟେ ଗତକାଲି(ଶନିବାର) ବାଉଁଶୁଣୀ ଥାନା ଅନ୍ତର୍ଗତ ତାଟରକିଲା ନିକଟରେ ଏକ ପରିବା ବୋଝେଇ ଗାଡ଼ି ଓଲଟି ପଡିଥିଲା । ଏଭଳି ଦର ବୃଦ୍ଧି ସମୟରେ ପରିବା ଗାଡ଼ି ଓଲଟି ଥିବାରୁ ଅଞ୍ଚଳର ଅନେକ ଲୋକ ପରିବା ଗୋଟାଇ ନେଇଥିବା ଦେଖିବାକୁ ମିଳିଥିଲା । ଜିଲ୍ଲାରେ ଶୀତଳ ଭଣ୍ଡାର ନଥିବା କରାଣରୁ ପନିପରିବା ଦର ଅହେତୁକ ବୃଦ୍ଧି ପାଇଥିବା ବୁଦ୍ଧିଜୀବୀ ମତ ପ୍ରକାଶ କରିଛନ୍ତି । ପନିପରିବା ଦର ବୃଦ୍ଧିକୁ ନେଇ ଗ୍ରାହକମାନେ ଗଭୀର ଚିନ୍ତା ପ୍ରକାଶ କରିଛନ୍ତି ।
ଇଟିଭି ଭାରତ, ବୌଦ୍ଧ
