ବୌଦ୍ଧ: ପୁଅର ମୃତ୍ୟୁ ପ୍ରମାଣପତ୍ର ପାଇଁ ଧାରଣାରେ ବସିଲେ ଅସହାୟ ପିତା । ଏଭଳି ଅଭାବନୀୟ ଘଟଣା ଘଟିଛି ବୌଦ୍ଧ ଜିଲ୍ଲାର ଏକମାତ୍ର ପୌର ପରିଷଦ କାର୍ଯ୍ୟାଳୟରେ । ସୂଚନା ମୁତାବକ ବୌଦ୍ଧ ଜିଲ୍ଲା ଶଙ୍କୁଳେଇ ପଞ୍ଚାୟତ ରାଉତପଡା ଗ୍ରାମର ଜଣେ ଗରିବ ଗାଈ ଚରାଳୀଙ୍କ ମାତ୍ର ୪ ବର୍ଷର ଶିଶୁ ପୁତ୍ର ଆରେସକୁ ଗତ ପ୍ରାୟ ଦେଢମାସ ତଳେ ସାପ କାମୁଡି ଦେଇଥିଲା । ଗୁରୁତର ଅବସ୍ଥାରେ ଆରେସକୁ ବୌଦ୍ଧ ମୁଖ୍ୟ ଡାକ୍ତରଖାନାକୁ ଅଣାଯାଉଥିବା ସମୟରେ ବାଟରେ ତାଙ୍କର ମୃତ୍ୟୁ ଘଟିଥିଲା।
ମୃତଦେହ ବ୍ୟବଛେଦ ପରେ ମୃତକଙ୍କ ପିତା ମୃତ୍ୟୁ ପ୍ରମାଣପତ୍ର ପାଇଁ ବୌଦ୍ଧଗଡ ଏନଏସି କାର୍ଯ୍ୟାଳୟରେ ଆବେଦନ କରିଥିଲେ । କିନ୍ତୁ ସେଠାରେ ମୃତକଙ୍କ ପିତାଙ୍କୁ ଏକ ହଜାର ଟଙ୍କା ଲାଞ୍ଚ ମଗାଯାଇଥିବା ଅଭିଯୋଗ ହୋଇଛି । ସେ ଏଥିପାଇଁ ପାଞ୍ଚ ଶହ ଟଙ୍କା ଦେଇଥିଲେ ମଧ୍ୟ ମୃତ୍ୟୁ ପ୍ରମାଣପତ୍ର ନପାଇବାରୁ ଶୁକ୍ରବାର ବାଧ୍ୟ ହୋଇ ଏନଏସି କାର୍ଯ୍ୟାଳୟ ଭିତରେ ଧାରଣାରେ ବସିଥିଲେ ।
ତେବେ କାଗଜପତ୍ରରେ ମୃତକଙ୍କ ନା’ କୁନେଇ ସମସ୍ୟା ଯୋଗୁଁ ଏଭଳି ଅଭାବନୀୟ ପରିସ୍ଥିତି ସୃଷ୍ଟି ହୋଇଥିବା ଜଣାପଡିଛି । ସୋମବାର ଦିନ ଏହି ସମସ୍ୟାର ସମାଧାନ ହେବ ବୋଲି ମୃତକଙ୍କ ପରିବାରକୁ ପ୍ରତିଶ୍ରୁତି ଦିଆଯାଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
