ବୌଦ୍ଧ: ନକଲି ଶ୍ରମିକ କାର୍ଡର ଶିକାର ହେଲେ ଶ୍ରମିକ । ଏଭଳି ଏକ ନକଲି କାରବାର ସମ୍ପର୍କରେ ସର୍ବପ୍ରଥମେ ଦୁଇ ଦିନ ତଳେ ଇଟିଭି ଭାରତରେ ଖବର ପ୍ରସାରଣ ହୋଇଥିଲା ।
ଶହଶହ ଗରିବ ଖଟିଖିଆ ଶ୍ରମିକଙ୍କୁ ଶ୍ରମକାର୍ଡ ନାଁରେ ଠକେଇ ହୋଇଥିବା ଶନିବାର ଜିଲ୍ଲା ଶ୍ରମ ବିଭାଗ ସ୍ପଷ୍ଟ କରିଛି । ବୌଦ୍ଧ ଜିଲ୍ଲାର ବିଭିନ୍ନ ସ୍ଥାନରେ କିଛି ଲୋକ ଶ୍ରମକାର୍ଡ କରି ଦେବାକୁ କହି 700 ଟଙ୍କା କାର୍ଡ ପିଛା ଆଦାୟ କରିଥିଲେ । ନକଲି କାର୍ଡ ମଧ୍ୟ ଶ୍ରମିକମାନଙ୍କୁ ପ୍ରଦାନ କଲେ । କିନ୍ତୁ କାର୍ଡର ବୈଧତା ତଥା ଦଲାଲଙ୍କ ସମ୍ପର୍କରେ ଗତ ଦୁଇ ଦିନ ତଳେ ଇଟିଭି ଭାରତରେ ଖବର ପ୍ରସାରଣ ପରେ ସମସ୍ତେ ଚିନ୍ତାରେ ପଡିଯାଇଥିଲେ ।
ଏହାର ସତ୍ୟାସତ୍ୟ ଜାଣିବାକୁ ଶୁକ୍ରବାର କଣ୍ଟାମାଳ ବ୍ଲକର ଦେଢେଣମାଳ ଗ୍ରାମର ପନ୍ଦରରୁ ଊର୍ଦ୍ଧ୍ବ ଶ୍ରମିକ ବୌଦ୍ଧ ଶ୍ରମ ଆୟୁକ୍ତଙ୍କ କାର୍ଯ୍ୟାଳୟରେ ପହଞ୍ଚିଥିଲେ । ସେଠାରେ ଉକ୍ତ କାର୍ଡ ଗୁଡିକ ଯାଞ୍ଚ କରିବା ପରେ ଏସବୁ ଶ୍ରମିକକାର୍ଡ ନକଲି ବୋଲି ବିଭାଗ ସ୍ପଷ୍ଟ କରିଛି । ତେବେ କି ଭଳି ଓ କେଉଁ ପରିସ୍ଥିତିରେ ଏତେ ବଡ ନକଲି କାରବାର ଚାଲିଥିଲା ତାର ଉଚ୍ଚସ୍ତରୀୟ ତଦନ୍ତ କରାଯିବାକୁ ଦାବି ହୋଇଛି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
