ବୌଦ୍ଧ: ଜଳସେଚନ ବିଭାଗର ଉଦାସୀନତାର ଚରମ ନିଦର୍ଶନ ଦେଖିବାକୁ ମିଳିଛି । ପୋଲର ନିର୍ମାଣଶୈଳୀ ଠିକ ଭାବେ ହୋଇନଥିବାରୁ ପୋଲ ଉପରୁ ଏକ ଗୋରୁଟି ଖସି ପଡି ତା'ର ମୃତ୍ୟୁ ହୋଇଛି । ତେବେ ଘଟଣା ସ୍ଥଳରେ କୌଣସି କର୍ମଚାରୀ ନପହଞ୍ଚିବାରୁ ମୃତ ଗୋରୁର ମାଂସ ସବୁ କିଛି ଲୋକ କାଟି ନେଇଥିବା ଦେଖିବାକୁ ମିଳିଛି । ବିଭାଗୀୟ ଉଦାସୀନତା ଫଳରେ ଗୁରିବାର ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଥିଲା ।
ବୌଦ୍ଧ ଜିଲ୍ଲା ବାମଣ୍ଡା ପଞ୍ଚାୟତ ଅନ୍ତର୍ଗତ ନାଏକପଡା ଗୁମ୍ଫା ନିକଟରେ ଥିବା ଜଳସେଚନ ବିଭାଗର ପୋଲ ଉପରୁ ପଡି ଏକ ଗୋରୁର ମୃତ୍ୟୁ ହୋଇଛି । ପୋଲର ନିର୍ମାଣ ଶୈଳୀ ତଥା ମାନ ଉପରେ ସ୍ଥାନୀୟ ଲୋକେ ବାରମ୍ବାର ଅଭିଯୋଗ କଲେ ମଧ୍ୟ ବିଭାଗୀୟ ଅଧିକାରୀ କର୍ଣ୍ଣପାତ କରିନଥିବା ଅଭିଯୋଗ ହୋଇଛି । ଫଳରେ ଉକ୍ତ ସ୍ଥାନରେ ଅଧିକାଂଶ ସମୟରେ ମଣିଷ ଓ ପଶୁ ଦୁର୍ଘଟଣାର ସମ୍ମୁଖୀନ ହେଉଛନ୍ତି ।
ଗୁରୁବାର ଏକ ଗୋରୁ ଉକ୍ତ ସ୍ଥାନରେ ଖସି ପଡି ମୃତ୍ୟୁ ହୋଇଥିଲା । ତେବେ ଦୀର୍ଘ ସମୟ ପର୍ଯ୍ୟନ୍ତ କୌଣସି ବିଭାଗୀୟ କର୍ମଚାରୀ ନ ଆସିବାରୁ କିଛି ଲୋକ ଉକ୍ତ ମୃତ ଗୋରୁର ମାଂସ କାଟି ନେଇଯାଇଥିଲେ । ଏଭଳି ହୃଦୟ ବିଦାରକ ଘଟଣା ସତ୍ତ୍ବେ ଏହା ଦାୟିତ୍ବରେ ଥିବା ଯନ୍ତ୍ରୀଙ୍କୁ ଯୋଗାଯୋଗ କରିବାରୁ ସେ ତାତ୍ସଲ୍ୟ କରି ମଣିଷ ତ ମରି ନାହାନ୍ତି, ଗୋରୁଟିଏ ପାଇଁ ଏତେ ବ୍ୟସ୍ତ ହେବାରେ କିଛି ନାହିଁ ବୋଲି ଉତ୍ତର ଦେଇଥିଲେ ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
