ବୌଦ୍ଧ: ଦାବି ପୂରଣ ନହେଲେ ଆନ୍ଦୋଳନକୁ ଓହ୍ଲାଇବ ଜିଲ୍ଲା ନାଗରିକ କମିଟି । ଜିଲ୍ଲାର ବିଭିନ୍ନ ସମସ୍ୟାକୁ ନେଇ ପ୍ରଥମେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯିବ ବୋଲି ସୂଚନା ମିଳିଛି । ବୌଦ୍ଧ ଜିଲ୍ଲାର ଏକମାତ୍ର ଏନଏସିକୁ ମ୍ୟୁନିସିପାଲଟିରେ ପରିଣତ ପାଇଁ ଦୀର୍ଘବର୍ଷ ହେଲା ଦାବି ହୋଇଆସୁଛି ।
୧୯୬୧ ମସିହାରେ ପ୍ରତିଷ୍ଠା ହୋଇଥିବା ‘‘ବୌଦ୍ଧ ଗଡ ପୌର ପରିଷଦ’’ ମ୍ୟୁନିସିପାଲଟିରେ ପରିଣତ ପାଇଁ ସମସ୍ତ ଯୋଗ୍ୟତା ହାସଲ କରିଥିବା ସତ୍ତ୍ୱେ ରାଜନୈତିକ ଇଛାଶକ୍ତି ଅଭାବରୁ ଏନେଇ କୌଣସି ଅଗ୍ରଗତି ଘଟିପାରୁ ନାହିଁ । ସେହିପରି ବୌଦ୍ଧ ଜିଲ୍ଲା ଦକ୍ଷିଣାଞ୍ଚଳ ରାଜସ୍ୱ ଆୟୁକ୍ତଙ୍କ ଠାରୁ ସମ୍ବଲପୁରସ୍ଥିତ ଉତ୍ତରାଞ୍ଚଳ ରାଜସ୍ୱ ଆୟୁକ୍ତଙ୍କ ଅଧିନକୁ ଆଣିବା ପାଇଁ ସମସ୍ତ ପ୍ରଶାସନିକ ପଦକ୍ଷେପ ଚୂଡାନ୍ତ ହୋଇଥିଲେ ମଧ୍ୟ ଏହାର କୌଣସି ଅଗ୍ରଗତି ଘଟୁନାହିଁ । ଫଳରେ ଦିନକୁ ଦିନ ଜନଅସନ୍ତୋଷ ବୃଦ୍ଧି ପାଇବାରେ ଲାଗିଛି ।
ସେପଟେ ଜିଲ୍ଲାର ବିଶ୍ୱ ପ୍ରସିଦ୍ଧ ଐତିହାସିକ ସ୍ମାରକ ସ୍ଥଳୀ ଚାରିଶମ୍ଭୁର ହରିହର ମନ୍ଦିରର ବିକାଶ ପାଇଁ ଦୁଇ ବର୍ଷ ପୂର୍ବରୁ ପ୍ରଧାନମନ୍ତ୍ରୀ ଘୋଷଣା କରିଥିବା ୪ କୋଟି ଟଙ୍କାର ପ୍ୟାକେଜ କେବଳ ଘୋଷଣାରେ ରହିଯାଇଛି । ତେଣୁ ଏଭଳି ସମସ୍ୟାକୁ ନେଇ ଜିଲ୍ଲା ନାଗରିକ କମିଟି ପକ୍ଷରୁ ଗଭୀର ଉଦବେଗ ପ୍ରକାଶ କରାଯାଇଛି । ଏନେଇ ଆସନ୍ତା ୧୦ ତାରିଖରେ ନାଗରିକ କମିଟି ପକ୍ଷରୁ ବୌଦ୍ଧ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯିବ ବୋଲି ସୂଚନା ମିଳିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
