ବୌଦ୍ଧ: ଜିଲ୍ଲାରେ କୋରୋନା ସ୍ଥିତି ଅତ୍ୟନ୍ତ ଉଦବେଗ ଜନକ ହୋଇ ଚାଲିଥିବା ବେଳେ ଆଗକୁ ଆସୁଥିବା ଦଶହରା ପର୍ବ ପାଳନ ନେଇ ସୃଷ୍ଟି ହୋଇଛି ଆଶା ଆଶଙ୍କା । ଜିଲ୍ଲାରେ ଗୋଟିଏ ପଟେ କୋରୋନା ସଂକ୍ରମଣ ଅଣାୟତ୍ତ ହେବାରେ ଲାଗିଥିବା ବେଳେ ଏମିତିରେ ଜିଲ୍ଲାରେ କୋଭିଡ କଟକଣା ମଧ୍ୟରେ ଦଶହରା ପାଳନ ପାଇଁ ଅନୁମତି ପ୍ରଦାନ କରିବାକୁ ଦାବି ହୋଇଛି ।
ସୋମବାର ଜିଲ୍ଲାର ବିଭିନ୍ନ ସ୍ଥାନରୁ 45 ନୂଆ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଜିଲ୍ଲାରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା 1461ରେ ପହଞ୍ଚିଛି । ଏନେଇ ଜିଲ୍ଲାରେ ସ୍ଥିତି ଅସମ୍ଭାଳ ହେବାରେ ଲାଗିଥିବା ବେଳେ ଅନ୍ୟପଟେ ବୌଦ୍ଧ କୋଭିଡ ହେଲଥ ସେଣ୍ଟରରେ କାର୍ଯ୍ୟକ୍ଷମ ହୋଇଛି ଆଇସିୟୁ ଭେଣ୍ଟିଲେଟର । ସେପଟେ ପାର୍ବଣ ଋତୁ କିଭଳି ହେବ ସେନେଇ ଅନେକ କଳ୍ପନା ଜଳ୍ପନା ଲାଗି ରହିଛି । ଦଶହରାକୁ ନେଇ ଜିଲ୍ଲାରେ ଚଳିତ ବର୍ଷ ଉତ୍ସାହ ଥିଲା ଭଳି ମନେ ହେଉନାହିଁ । ଅଧିକାଂଶ ପୂଜା ମଣ୍ଡପ ଗୁଡିକରେ କିଭଳି ବିଧି ବିଧାନ ପାଳନ ହେବ ସେନେଇ ଚିନ୍ତାରେ ବିଭିନ୍ନ ପୂଜା କମିଟି ।
ଜିଲ୍ଲାର ବୌଦ୍ଧ ସହର ବ୍ୟତୀତ ପୁରୁଣାକଟକ, ଚାରିଛକ, ବାଉଁଶୁଣୀ, ମନମୁଣ୍ଡା, ପଲସାଗୋରା ଓ କଣ୍ଟାମାଳ ଭଳି ସ୍ଥାନ ଗୁଡିକରେ ପୂଜା କମିଟି ଗୁଡିକ ପ୍ରଶାସନର ନିଷ୍ପତ୍ତି ଅପେକ୍ଷାରେ ରହିଛନ୍ତି । ସୋମବାର ଏନେଇ ବୌଦ୍ଧ ଜିଲ୍ଲାପାଳ ଲଲାଟେନ୍ଦୁ ମିଶ୍ରଙ୍କୁ ଏକ ଦାବିପତ୍ର ମାଧ୍ୟମରେ କୋଭିଡ କଟକଣା ମଧ୍ୟରେ ପୂଜା ମଣ୍ଡପଗୁଡିକୁ ଅନୁମତି ପ୍ରଦାନ ପାଇଁ ଅନୁରୋଧ କରାଯାଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
