ବୌଦ୍ଧ: ବିପଦଶଙ୍କୁଳ ଅବସ୍ଥାରେ ନୌକା ଯାତ୍ରା । ଉଛୁଳା ନଦୀରେ ଜୀବନକୁ ବାଜି ଲଗାଇ ନଦୀର ଏପଟରୁ ସେପଟକୁ ସେପଟରୁ ଏପଟକୁ ଯାତାୟତ କରୁଛନ୍ତି ବୌଦ୍ଧବାସୀ । ଜିଲ୍ଲାର ବିଭିନ୍ନ ନଦୀରେ ଏବେ ବନ୍ୟା ପାଣି ପ୍ରବାହିତ ହେଉଥିବା ବେଳେ ଅତ୍ୟନ୍ତ ବିପଦ ଶଙ୍କୁଳ ଅବସ୍ଥାରେ ଲୋକେ ନୌକାଯାତ୍ରା କରୁଛନ୍ତି । ବୌଦ୍ଧ ଜିଲ୍ଲାର ମହାନଦୀ ସମେତ ତେଲନଦୀ, ବାଘନଦୀ, ସାଲୁଙ୍କୀନଦୀରେ ବନ୍ୟା ପାଣି ପ୍ରଖର ସ୍ରୋତରେ ପ୍ରବାହିତ ହେଉଛି । ତେବେ ଲୋକେ ଗମନାଗମନର ଅନ୍ୟ ଉପାୟ ନଥିବାରୁ ବାଧ୍ୟ ହୋଇ ଜୀବନକୁ ବାଜି ଲଗାଇ ବିପଦପୂର୍ଣ୍ଣ ଭାବରେ ଦେଶୀ କାଠ ଡଙ୍ଗାରେ ଯାତାୟାତ କରୁଛନ୍ତି । ବିଶେଷ କରି ମନମୁଣ୍ଡା ଠାରୁ ହରଭଙ୍ଗା ପର୍ଯ୍ୟନ୍ତ ପ୍ରବାହିତ ମହାନଦୀର ବିଭିନ୍ନ ନଦୀଘାଟରେ ଏଭଳି ଦୃଶ୍ୟ ଦେଖିବାକୁ ମିଳିଛି ।
ଏପରିକି ବୌଦ୍ଧ ସହରର ମର୍ଜାକୁଦ ଦ୍ବୀପକୁ ସଂଯୋଗ ପାଇଁ ଏକ ସେତୁ ନିର୍ମାଣଧୀନ ରହିଥିବା ବେଳେ ଦ୍ବୀପାଞ୍ଚଳବାସୀ ବାଧ୍ୟ ହୋଇ ପ୍ରତ୍ୟେକ ଦିନ ମହାନଦୀରେ ଏଭଳି ବିପଦପୂର୍ଣ୍ଣ ନୌକା ଯାତ୍ରା କରିଥାନ୍ତି । ସରକାର ଦ୍ବୀପାଞ୍ଚଳବାସୀଙ୍କ ପାଇଁ ସରକାରୀ ବୋଟର ବ୍ୟବସ୍ଥା କରିଥିଲେ ମଧ୍ୟ ସେମାନେ ଏହାର ସେବା ଠିକରେ ପାଉନାହାନ୍ତି । ସେପଟେ ଗତ ପ୍ରାୟ ସପ୍ତାହେ ହେଲା କୁଶଙ୍ଗ ପଞ୍ଚାୟତର ଅଭୟାରଣ୍ୟ ମଧ୍ୟରେ ଥିବା ମାରଡା ଗ୍ରାମବାସୀ ଅତ୍ୟନ୍ତ ଦୟନୀୟ ଅବସ୍ଥାରେ ରହିଛନ୍ତି । ମାରଡାକୁ ସିଧାସଳଖ ଯାତାୟତ ପାଇଁ କୌଣସି ସୁବିଧା ନଥିବାରୁ ସେମାନେ ବାଧ୍ୟ ହୋଇ କୁମ୍ଭୀର ଚଳପ୍ରଚଳ ଅଞ୍ଚଳରେ ବାଉଁଶରେ ଭେଳା ବାନ୍ଧି ଉଦଣ୍ଡୀ ନାଳରେ ଯାତାୟାତ କରୁଥିବା ଅଭିଯୋଗ ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
