ବୌଦ୍ଧ: ପ୍ରସ୍ତାବିତ ନୂତନ ପଥର ଖାଦାନ ଲିଜ୍ ଓ ପୁରୁଣା କ୍ରସରକୁ ସ୍ଥାନୀୟ ଜନସାଧାରଣ ଓ ନିର୍ବାଚିତ ଜନପ୍ରତିନିଧିଙ୍କ ତୀବ୍ର ବିରୋଧ । ବୌଦ୍ଧ ଜିଲ୍ଲାର ହରଭଙ୍ଗା ତହସିଲ ଅନ୍ତର୍ଗତ ଛତରଙ୍ଗ ପଞ୍ଚାୟତର ବାଇଁଶପଡା ଓ ଖରଭୂଇଁ ଅଞ୍ଚଳରେ ନୂତନ ପଥର ଖାଦାନ ଲିଜ ପ୍ରଦାନକୁ ତୀବ୍ର ବିରୋଧ କରାଯାଇଛି ।
ଶୁକ୍ରବାର ଏନେଇ ହରଭଙ୍ଗା ତହସିଲ କାର୍ଯ୍ୟାଳୟଠାରେ ଜନଶୁଣାଣି ଆୟୋଜନ କରାଯାଇଥିଲା, କିନ୍ତୁ ସେଠାରେ ଛତରଙ୍ଗ ପଞ୍ଚାୟତର ସରପଞ୍ଚ, 9 ନମ୍ବର ଜିଲ୍ଲା ପରିଷଦ ସଭ୍ୟ ଓ ଅଞ୍ଚଳବାସୀ ପହଞ୍ଚି ଏହି ନୂତନ ଖାଦାନ ଲିଜ ଓ ପୁରୁଣା ଥିବା 3ଟି ପଥର କ୍ରସରକୁ ବନ୍ଦ କରିବା ନିମନ୍ତେ ନିଜର ପକ୍ଷ ରଖିଥିଲେ । ସ୍ଥାନୀୟ ସରଳ ତଥା ନିରୀହ ଲୋକଙ୍କ ଜମିକୁ ଚଞ୍ଚକତା କରି ସେଠାରେ ପଥର କ୍ରସର କରାଯାଇଥିବା ବେଳେ ଚର୍ମରୋଗଠାରୁ ଆରମ୍ଭ କରି ପାନୀୟ ଜଳ ଦୂଷିତ ହୋଇଥିଲା । ଫଳରେ ଶହଶହ ସଂଖ୍ୟାରେ କିଡନୀ ରୋଗୀଙ୍କ ମୃତ୍ୟୁ ହୋଇଥିବା ସୂଚନା ମିଳିଛି ।
ତେବେ ଏନେଇ ସ୍ଥାନୀୟ ଲୋକମାନେ ଗୁହାରୀ କଲେ ଓଲଟା ସେମାନଙ୍କୁ ପୋଲିସର ଭୟ ଦେଖା ଯାଇଥିବା ସେମାନେ ଅଭିଯୋଗ କରିଛନ୍ତି । ପୂର୍ବରୁ ଏ ସମ୍ପର୍କରେ ସ୍ଥାନୀୟ ଜନ ପ୍ରତିନିଧି ମାନେ ବାରମ୍ବାର ଜିଲ୍ଲା ପ୍ରଶାସନ ନିକଟରେ ଅଭିଯୋଗ କରିଥିଲେ ମଧ୍ୟ ପୁଣି କେଉଁ କାରଣରୁ ନୂତନ ପଥର ଖାଦାନ ଲିଜ୍ ପାଇଁ ଜନ ଶୁଣାଣି କରାଯାଉଛି ତାହା ଚର୍ଚ୍ଚାର ବିଷୟ ପାଲଟିଛି । ତେବେ ଅଞ୍ଚଳର ଦୁଃଖ ନବୁଝି ଯଦି ଏଭଳି କାର୍ଯ୍ୟ ଜାରି ରହେ ତାହାଲେ ଆଗାମୀ ଦିନରେ ଅଞ୍ଚଳବାସୀ ରାଜରାସ୍ତାକୁ ଓହ୍ଲାଇବେ ବୋଲି ଜିଲ୍ଲା ପରିଷଦ ସଭ୍ୟ ଅବକାଶ ସାହୁ ସୂଚନା ଦେଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
