ବୌଦ୍ଧ: ଭାଇରାଲ ଭିଡିଓର ସାଇଡ ଇଫେକ୍ଟ । ବୌଦ୍ଧରେ ଘଟିଛି ବିରଳ ଘଟଣା । ପୋଲିସ ଅଫିସରଙ୍କ ନିଲମ୍ବନ ଆଦେଶ ପ୍ରତ୍ୟାହୃତ କରିବାକୁ ବୌଦ୍ଧ ଆଦର୍ଶ ଥାନା ଘେରିଛନ୍ତି ସ୍ଥାନୀୟ ଲୋକେ । ପୋଲିସ ଅଭିଯୋଗ ଗ୍ରହଣ କରୁନି, ପୋଲିସ ନ୍ୟାୟ ଦେବାରେ ବିଫଳ, ଥାନାକୁ ଦୌଡିଦୌଡି ନୟାନ୍ତ, ଏମିତି ଅନେକ ଅଭିଯୋଗ ସାଧାରଣ ଲୋକଙ୍କ ପକ୍ଷରୁ ହୋଇଥାଏ । ଅନେକ ଘଟଣା ଅଭିଯୋଗରେ ସତ୍ୟତା ମଧ୍ୟ ସାମ୍ନାକୁ ଆସିଥାଏ । ତେବେ ବୌଦ୍ଧର ଏହି ଘଟଣା ଏପରି ଅଭିଯୋଗକୁ ଭୁଲ ପ୍ରମାଣିତ କରିଛି ।
ନିକଟରେ କିଛି ଦଶମ ଶ୍ରେଣୀ ଛାତ୍ରୀଙ୍କୁ ଅସାମାଜିକ ଯୁବକ ଅସଦାଚରଣ କରିଥିଲେ । ଏହାପରେ ପୋଲିସ ସେହି ଯୁବକଙ୍କୁ ସର୍ବସମ୍ମୁଖରେ ମାଡ ମାରିବାର ଭିଡିଓ ଭାଇରାଲ ହୋଇଥିଲା । ପରେ ସେହି ଘଟଣାରେ 4ଜଣ ପୋଲିସ କର୍ମଚାରୀଙ୍କୁ ନିଲମ୍ବିତ କରାଯାଇଥିଲା । ବୌଦ୍ଧ ପୋଲିସର ଏହି ଭାଇରାଲ ଭିଡିଓ ଘଟଣା ଏବେ ରୋଚକ ମୋଡ ନେଇଛି । ନିଲମ୍ବିତ ପୋଲିସ କର୍ମଚାରୀଙ୍କ ସପକ୍ଷରେ ଯୁକ୍ତି ବାଢିଛନ୍ତି ସ୍ଥାନୀୟ ଅଭିଭାବକ ।
ଏନେଇ ବୌଦ୍ଧ ଆଦର୍ଶ ଥାନାକୁ ଛାତ୍ରଛାତ୍ରୀଙ୍କ ଅଭିଭାବକ ଓ ଅଞ୍ଚଳବାସୀ ମିଳିତ ହୋଇ ଘେରାଉ କରିଛନ୍ତି । ପୋଲିସ କର୍ମଚାରୀଙ୍କ ନିଲମ୍ବନକୁ ଏକ ପାଖିଆ ଭାବେ ବିଚାର କରାଯାଇ, ନିଷ୍ପତ୍ତି ନିଆଯାଇଛି ବୋଲି ସେମାନେ ଅଭିଯୋଗ କରିଛନ୍ତି । ଭୁଲ ନିଷ୍ପତ୍ତି ନିଆଯାଇ ସେମାନଙ୍କୁ ଦଣ୍ଡିତ କରାଯାଇଥିବା ଅଭିଭାବକ ମତ କହିଛନ୍ତି । ଏହାର ପୁନର୍ବିଚାର ସହ ନିରପେକ୍ଷ ତଦନ୍ତ ପାଇଁ ସେମାନେ ଦାବି କରିଛନ୍ତି । ଏନେଇ ବୌଦ୍ଧ ଆରକ୍ଷୀ ଅଧୀକ୍ଷକଙ୍କ ଉଦ୍ଦେଶ୍ୟରେ ଏକ ଦାବିପତ୍ର ବୌଦ୍ଧ ଥାନାଅଧିକାରୀଙ୍କୁ ପ୍ରଦାନ କରିଛନ୍ତି । ଏଥିସହିତ ଛାତ୍ରୀଙ୍କ ସୁରକ୍ଷା ପାଇଁ ବ୍ୟବସ୍ଥା କରିବାକୁ ଅବିଭାବକ ମାନେ ଦାବି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
