ବୌଦ୍ଧ: ଦିନେ ତାଙ୍କ ଦାସକାଠିଆ ବାଣ୍ଟୁଥିଲା ସଚେତନତାର ବାର୍ତ୍ତା । ଗାଁ ଗହଳିରେ ଲୋକଙ୍କୁ ମ୍ୟାଲେରିଆ, ଡେଙ୍ଗୁ, ଏଡସ୍ ଭଳି ରୋଗ ସମ୍ପର୍କରେ ସଚେତନ କରାଇବା ପାଇଁ ତାଙ୍କ ଦାସକାଠିଆ ପାଲଟିଥିବା ଅନନ୍ୟ ମାଧ୍ୟମ । ହେଲେ ସମୟ ବଦଳିଛି, ଆଉ ତାଙ୍କ ଦାସକାଠିଆ ନିରବି ଯାଇଛି । କାରଣ ଦାସକାଠିଆ ବଜେଇବା ପାଇଁ ତାଙ୍କ ଦେହରେ ଆଉ ବଳ ନାହିଁ । ପକ୍ଷାଘାତରେ ଆକ୍ରାନ୍ତ ହୋଇ ଜୀବନ ହୋଇପଡିଛି ଦୁର୍ବିସହ ।
ଆମେ କହୁଛୁ ବୌଦ୍ଧ ଜିଲ୍ଲା ବଢିଗାଁ ପଞ୍ଚାୟତ ଅନ୍ତର୍ଗତ ସାଲିଗାଁର ଷାଠିଏ ବର୍ଷୀୟ ନେତ୍ରାନନ୍ଦ ସାହୁଙ୍କ କଥା । ଆଗରୁ ପାଲା ଓ ଦାସକାଠିଆ ମାଧ୍ୟମରେ ଲୋକଙ୍କୁ ସଚେତନ କରୁଥିବା ମଣିଷଟି ଆଜି ରୋଗରେ ପୀଡିତ । ନା ଦେହରେ ଆଉ ବଳ ଅଛି, ନା ସମ୍ବଳ । ଏକମାତ୍ର ସାହାରା ପାଲଟିଛନ୍ତି ପତ୍ନୀ ।
ଦିନେ ସରକାରଙ୍କ ବିଭିନ୍ନ ସଚେତନତା କାର୍ଯ୍ୟକ୍ରମ(ଡେଙ୍ଗୁ, ମ୍ୟାଲେରିଆ, ଏଡସ, ଶିଶୁକନ୍ୟା ସୁରକ୍ଷା, ପାଇଖାନା ବ୍ୟବହାର)କୁ ଦାସକାଠିଆ ମାଧ୍ୟମରେ କେବଳ ବୌଦ୍ଧ ଜିଲ୍ଲାରେ ନୁହେଁ ରାଜ୍ୟର ଅନେକ ଜିଲ୍ଲାରେ ପରିବେଷଣ କରି ଉଚ୍ଚ ପ୍ରଶଂସିତ ହେବା ସହ ଅନେକ ସମ୍ବର୍ଦ୍ଧନା ପାଇଥିଲେ ସେ ।
ହେଲେ ପ୍ରାୟ ଦୁଇ ବର୍ଷ ତଳେ ସେ ପକ୍ଷାଘାତରେ ଆକ୍ରାନ୍ତ ହୋଇ କୌଣସି କାର୍ଯ୍ୟ କରିବାକୁ ଅକ୍ଷମ ହୋଇଯାଇଛନ୍ତି । ଦୈନନ୍ଦିନ କାର୍ଯ୍ୟ ପାଇଁ ଏକମାତ୍ର ସାହାରା ପାଲଟିଥିବା ପତ୍ନୀଙ୍କ ଉପରେ ନିର୍ଭରଶୀଳ । ଘରେ କେହି ରୋଜଗାର କ୍ଷମ ବ୍ୟକ୍ତି ନଥିବାରୁ ମାଗିଯାଚି ଆଣିଲେ ପେଟ ପୁରୁଛି । ଏପରି ସ୍ଥିତିରେ ସରକାରୀ ସବୁ ଯୋଜନା ତାଙ୍କ ପାଇଁ ବାଟ ଭୁଲି ଯାଇଛି । ଏହି ଦମ୍ପତିକୁ ସରକାରୀ ସ୍ତରରେ ସାହାଯ୍ୟ ସହଯୋଗ ଯୋଗାଇବା ପାଇଁ ସାଧାରଣରେ ଦାବି ହୋଇଛି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
