ବୌଦ୍ଧ: ଦୁଇ ତିନି ଦିନ ପାଣିପାଗ ପରିବର୍ତ୍ତନ ରହିବା ପରେ ପୁଣି ରାଜ୍ୟରେ ରେକର୍ଡ କରିଛି ଜିଲ୍ଲାର ତାପମାତ୍ରା । ଆକାଶରୁ ଅଗ୍ନି ବର୍ଷା ହେଉଥିବା ବେଳେ ପ୍ରବଳ ଝାଞ୍ଜି ପବନ ଯୋଗୁଁ ମଣିଷ ସହିତ ପଶୁପକ୍ଷୀ ଅସ୍ତବ୍ୟସ୍ତ ହୋଇପଡିଛନ୍ତି । ଏହି ଅନୁସାରେ ବୌଦ୍ଧ ଜିଲ୍ଲାରେ ଶୁକ୍ରବାର ଠାରୁ ପୁଣି ପ୍ରଚଣ୍ଡ ଗ୍ରୀଷ୍ମ ପ୍ରବାହ ଜାରି ରହିଛି । ଦିନ ଦଶଟା ବେଳକୁ ରାସ୍ତା ଘାଟ ଶୁନଶାନ ହୋଇଯାଉଛି । ଗୋଟିଏ ପଟରେ ଜିଲ୍ଲାର ବିଭିନ୍ନ ନଦୀନାଳ, ପୋଖରୀ ଶୁଖିଯାଉଥିବା ବେଳେ ଅନ୍ୟ ପଟରେ ଜିଲ୍ଲାର ବିଭିନ୍ନ ଜଙ୍ଗଲ ନିଆଁଲାଗି ବନ୍ୟଜନ୍ତୁଙ୍କ ପ୍ରତି ବିପଦ ସୃଷ୍ଟି ହେଉଛି ।
ଫଳରେ ଅନେକ ସମୟରେ ବନ୍ୟଜନ୍ତୁ ଜନବସତି ମୁହାଁ ହେବା ସହିତ ମଣିଷ ସହିତ ମୁହାଁମୁହିଁ ପରିସ୍ଥିତି ମଧ୍ୟ ସୃଷ୍ଟି ହେଉଛି । ଏଭଳି ଏକ ଘଟଣା ବୌଦ୍ଧ ବନଖଣ୍ଡର ସଦର ରେଞ୍ଜ ଅନ୍ତର୍ଗତ ନେନ୍ଦନ ଗ୍ରାମ ନିକଟରେ ଘଟିଛି । କେନ୍ଦୁପତ୍ର ତୋଳୁଥିବା ଜଣେ ପୁରୁଷ ଓ ଦୁଇ ଜଣ ମହିଳାଙ୍କୁ ଜଙ୍ଗଲୀ ବାରହା ଆକ୍ରମଣ କରିବା ସହିତ କାମୁଡି କ୍ଷତ ବିକ୍ଷତ କରିପକାଇଛି । ଗୁରୁତର ଆହତମାନଙ୍କୁ ବୌଦ୍ଧ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଥିବା ବେଳେ ଉକ୍ତ ଆହତଙ୍କୁ ସରକାରୀ ସହାୟତା ଯୋଗାଇ ଦେବାକୁ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
