ବୌଦ୍ଧ: ବୌଦ୍ଧ ସହରରେ ଏକ କୌତୁହଳ ଘଟଣା ଦେଖିବାକୁ ମିଳିଛି । ଏକ ଚାରି ବର୍ଷର ଶିଶୁ ପୁତ୍ର ନିଖୋଜ ହେବା ପୁଣି ମିଳିଯିବା ପରେ ବୌଦ୍ଧରେ ଲାଗି ରହିଛି ଚର୍ଚ୍ଚା । ମିଳିଥିବା ସୂଚନା ଅନୁଯାୟୀ ଗୁରୁବାର ସକାଳ ପ୍ରାୟ 11ଟା ବେଳେ ଏକ ଚାରି ବର୍ଷର ଶିଶୁପୁତ୍ର ବୌଦ୍ଧ ଡାକ୍ତରଖାନା ନିକଟସ୍ଥ ୫୭ ନମ୍ବର ଜାତୀୟ ରାଜପଥ ନିକଟରେ ଦୀର୍ଘ ସମୟ ଧରି ରାସ୍ତା କଡରେ ଥିଲେ ।
ହେଲେ ଶିଶୁଟି ସେମିତି ରହିଥିବାରୁ ଶିଶୁର ପାଖକୁ ଯାଇ ଜଣେ ଯୁବକ ଶିଶୁଙ୍କୁ ଘର ଓ ପରିବାର ପଚାରିଥିଲେ ହେଲେ କୌଣସି ଉତ୍ତର ନପାଇବାରୁ ଯୁବକ ଜଣଙ୍କ ଶିଶୁଙ୍କୁ ଧରି ତାଙ୍କ ପରିବାରକୁ ଖୋଜିବାକୁ ଲାଗିଲେ । ଶିଶୁକୁ ଧରି ଡାକ୍ତରଖାନା ସହ ସହରର ବିଭିନ୍ନ ସ୍ଥାନରେ ଯାଇ ଶିଶୁଟିର ପରିବାର ଖୋଜିଥିଲେ । ହେଲେ ସବୁଠୁ ନିରାଶ ହେବା ପରେ ଶିଶୁ ପୁତ୍ରକୁ ଧରି ଯୁବକ ଜଣଙ୍କ ପୋଲିସର ଦ୍ବାରସ୍ଥ ହୋଇଥିଲେ । ପୋଲିସ ମଧ୍ୟ ଶିଶୁର ପରିବାର ବର୍ଗଙ୍କୁ ଖୋଜିବାକୁ ଉଦ୍ୟମ ଆରମ୍ଭ କରିଥିଲା ।
ଅନ୍ୟପଟେ ଶିଶୁ ପୁତ୍ରର ପରିବାର ମଧ୍ୟ ସହର ସାରା ଶିଶୁକୁ ଖୋଜି ନିରାଶ ହେବା ପରେ ଥାନାକୁ ଆସିଥିଲେ । ସେତେବେଳେ ଥାନାରୁ ଜାଣିବାକୁ ପାଇଲେ ଜଣେ ଯୁବକ ଶିଶୁପୁତ୍ରକୁ ରଖିଛନ୍ତି । ପରେ ପୋଲିସ ସହଯୋଗରେ ଶିଶୁଟି ନିଜ ପରିବାର ଫେରି ପାଇଥିବା ବେଳେ ପରିବାର ମଧ୍ୟ ଯୁବକଙ୍କୁ କୃତଜ୍ଞତା ଜଣାଇ ଭାବ ବିହ୍ବଳ ହୋଇପଡିଥିଲେ । ଏହାକୁ ନେଇ ସ୍ଥାନୀୟ ଅଞ୍ଚଳରେ ଭିନ୍ନ ଭିନ୍ନ ଚର୍ଚ୍ଚା ଲାଗି ରହିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
