ବୌଦ୍ଧ: ଜିଲ୍ଲାରେ ଅବ୍ୟବସ୍ଥା ଘେରରେ ଧାନମଣ୍ଡି । ଜିଲ୍ଲାରେ ଧାନକ୍ରୟ ପ୍ରକ୍ରିୟାର ଶୁଭାରମ୍ଭ ହୋଇଥିବା ବେଳେ ବିଭିନ୍ନ ଧାନମଣ୍ଡି ଓ ମାର୍କେଟ ୟାର୍ଡରେ ବ୍ୟାପକ ସମସ୍ୟା ପରିଲକ୍ଷିତ ହୋଇଛି । ଯାହାକୁ ନେଇ ଚିନ୍ତାରେ ବୌଦ୍ଧ ଜିଲ୍ଲା ଚାଷୀ ।
ଚାଷୀର ବର୍ଷକର ପରିଶ୍ରମର ଫଳ ଉତ୍ପାଦିତ ହୋଇଛି । କିନ୍ତୁ ବର୍ତ୍ତମାନ ଠାରୁ ଦଲାଲ ଓ ମଣ୍ଡି ସମସ୍ୟା ଚାଷୀଙ୍କୁ ଚିନ୍ତାରେ ପକାଇଲାଣି । ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକର ବିଭିନ୍ନ ଧାନମଣ୍ଡିରେ ଧାନକ୍ରୟର ଶୁଭାରମ୍ଭ ହୋଇଛି । ମନମୁଣ୍ଡା ଠାରେ ବୌଦ୍ଧ ଜିଲ୍ଲାପାଳ ସତ୍ୟ ରଞ୍ଜନ ସାହୁ ଅତିଥି ରୂପେ ଯୋଗ ଦେଇ ଧାନ ମଣ୍ଡିର ଶୁଭାରମ୍ଭ କରିଥିଲେ । ତେବେ ଜିଲ୍ଲାର ବିଭିନ୍ନ ସ୍ଥାନରେ ଚାଷୀ ଧାର କରଜ କରି ଧାନ ଚାଷ କରିଥିବା ବେଳେ ବର୍ତ୍ତମାନ ଗାଁ ଗାଁରେ ଦଲାଲ ସକ୍ରିୟ ହୋଇ ଉଠିଛନ୍ତି । ଚାଷୀଙ୍କ ରେଜିଷ୍ଟ୍ରେସନ, ଟୋକନ ଓ ଧାନ କିଣା ବିକା ସବୁକିଛି ଦଲାଲଙ୍କ ଦ୍ବାରା ନିୟନ୍ତ୍ରଣ ହେଉଥିବା ବେଳେ ଉଭୟ ସମବାୟ ଓ ଯୋଗାଣ ବିଭାଗ ସବୁ ଜାଣି ମଧ୍ୟ ଏସବୁକୁ ପରୋକ୍ଷରେ ପ୍ରୋତ୍ସାହିତ କରୁଥିବା ଅଭିଯୋଗ ହୋଇଛି ।
