ବୌଦ୍ଧ: ମଣ୍ଡିରୁ ଉଠି ପାରୁନି ଚାଷୀଙ୍କ ଧାନ । ଫଳରେ ବୌଦ୍ଧ ଜିଲ୍ଲାର ପ୍ରାୟ ଧାନମଣ୍ଡିରେ ଲାଗି ରହିଛି ଚାଷୀ ଅସନ୍ତୋଷ । ଜିଲ୍ଲାର ସମୁଦାୟ 42 ଗୋଟି ସମବାୟ ସମିତିର ଟାର୍ଗେଟ ସରିବାକୁ ବସିଥିବା ବେଳେ ଗରିବ ଚାଷୀ ଏବେ ଧାନ କେଉଁଠି ବିକ୍ରି କରିବ ସେନେଇ ଚିନ୍ତାରେ ରହିଛନ୍ତି । ଆଜି(ବୁଧବାର) ଭାରତୀୟ କିଷାନ ସଂଘ ପକ୍ଷରୁ ଜିଲ୍ଲାର ବିଭିନ୍ନ ମଣ୍ଡିରୁ ବେପାରୀ ଓ ଦଲାଲଙ୍କ ଧାନକିଣା ଯାଇଥିବା ବେଳେ ପ୍ରକୃତ ଚାଷୀର ଧାନକିଣା ଯାଇନଥିବା ଅଭିଯୋଗ କରାଯାଇଛି ।
ଜିଲ୍ଲାର ଚାଷୀ ଜିଲ୍ଲାପାଳଙ୍କ କାର୍ଯ୍ୟାଳୟ ଓ ଯୋଗାଣ ଅଧିକାରୀଙ୍କ କାର୍ଯ୍ୟାଳୟ ଘେରାଉ ସହ ରାଜରାସ୍ତା ଅବରୋଧ କରାଯାଉଛି । କିନ୍ତୁ କେବେ ଚାଷୀଙ୍କ ଧାନକ୍ରୟ ସମ୍ପୂର୍ଣ୍ଣ ହେବ ସେନେଇ କୌଣସି ସ୍ପଷ୍ଟ ସୂଚନା ମିଳିପାରି ନାହିଁ । ସେପଟେ ବୁଧବାର ଜିଲ୍ଲା ଯୋଗାଣ ବିଭାଗ ଓ ସମବାୟ ବିଭାଗ ମିଳିତ ଭାବେ ଆଗାମୀ ରବିଧାନ କ୍ରୟ ନେଇ ପ୍ରସ୍ତୁତି ଆରମ୍ଭ କରିଛନ୍ତି । ଏନେଇ ସମସ୍ତ ସମବାୟ ସମିତିର ସମ୍ପାଦକଙ୍କୁ ତାଲିମ ପ୍ରଦାନ କରାଯାଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି,ଇଟିଭି ଭାରତ
