ବୌଦ୍ଧ: ପ୍ରେମିକାକୁ ହତ୍ୟା କରି ପ୍ରେମିକ ଗିରଫ । ହତ୍ୟାକାଣ୍ଡର 5 ଦିନ ପରେ ଅଭିଯୁକ୍ତକୁ ଗିରଫ କରିଛି ପୋଲିସ । ଅବୈଧ ସମ୍ପର୍କକୁ ନେଇ ହତ୍ୟାକାଣ୍ଡ ହୋଇଥିବା ସୂଚନା ଦେଇଛି ପୋଲିସ ।
ସେପଟେ ଜଣେ ମାନସିକ ଭିନ୍ନକ୍ଷମ ଯୁବତୀକୁ ଅବୈଧ ସମ୍ପର୍କ ରଖି ଗର୍ଭବତୀ କରି ଜଣେ ବ୍ୟକ୍ତି ଫେରାର ହୋଇଥିବାରୁ ପିଡୀତା ଙ୍କ ମାଁ ଜିଲ୍ଲାପାଳ ଓ ଏସପିଙ୍କୁ ଭେଟି ନ୍ୟାୟ ପାଇଁ ଗୁହାରି କରିଛନ୍ତି ।
ଅବୈଧ ସମ୍ପର୍କ ହେଲା କାଳ । ଦୁଇ ଦୁଇଟି ପରିବାର ଏବେ ଯନ୍ତ୍ରଣା ଓ ଦୁଃଖରେ ରହିଛନ୍ତି । ଗତ ରବିବାର ବୌଦ୍ଧ ଥାନା ଅନ୍ତର୍ଗତ ବୀରନରସିଂପୁର ଗ୍ରାମର କେନାଲ ହୁଡାରୁ ଯୁବତୀଙ୍କ ମୃତଦେହ ଉଦ୍ଧାର ହୋଇଥିଲା । ଗୁରୁବାର ଏହି ଘଟଣାର ହତ୍ୟାକାରୀକୁ ବୌଦ୍ଧ ପୋଲିସ ଗିରଫ କରିବାରେ ସଫଳ ହୋଇଛି । ବୀରନରସିଂପୁର ଗ୍ରାମର ଜଣେ ଯୁବକ ମୃତ ଯୁବତୀଙ୍କ ସହ ପ୍ରାୟ ଛ ବର୍ଷ ଧରି ଅନୈତିକ ସଂପର୍କ ରଖି ଆସୁଥିଲେ । ତେବେ ଗତ କିଛି ମାସ ପୂର୍ବରୁ ଉକ୍ତ ଯୁବକଙ୍କ ବିବାହ ପରେ ଗର୍ଭଧାରଣକୁ କେନ୍ଦ୍ର କରି ଦୁହିଁଙ୍କ ମଧ୍ୟରେ ତିକ୍ତତା ହତ୍ୟାକାଣ୍ଡରେ ରୂପାନ୍ତରିତ ହୋଇଥିଲା । ଏ ସମ୍ପର୍କରେ ବୌଦ୍ଧ ପୋଲିସ ସମ୍ପୃକ୍ତ ହତ୍ୟାକାରୀକୁ ଗୁରୁବାର ସନ୍ଧ୍ୟାରେ ଗିରଫ କରିଥିବା ନେଇ ଆଜି ସାମ୍ବାଦିକ ସମ୍ମିଳନୀରେ ବିସ୍ତୃତ ସୂଚନା ଦେଇଛି ।
ସେପଟେ ଜଣେ ମାନସିକ ଭିନ୍ନକ୍ଷମ ଯୁବତୀଙ୍କୁ ବିଭିନ୍ନ ପ୍ରଲୋଭନ ଦେଖାଇ ଜଣେ ବିବାହିତ ପୁରୁଷ ଗର୍ଭବତୀ କରିବା ପରେ ଫେରାର ହୋଇଛି । ଏ ନେଇ ବଘିଆପଡା ଫାଣ୍ଡି ଓ ବୌଦ୍ଧ ଥାନାରେ ଅଭିଯୋଗ ହୋଇଥିବା ବେଳେ ପିଡୀତା ଙ୍କୁ ନ୍ୟାୟ ପ୍ରଦାନ ପାଇଁ ତାଙ୍କ ମାଁ ବୌଦ୍ଧ ଜିଲ୍ଲାପାଳ ଓ ଏସପିଙ୍କ ନିକଟରେ ଗୁହାରୀ କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
