ବୌଦ୍ଧ: ବଲାଙ୍ଗୀର-ବୌଦ୍ଧ ଦୁଇ ଜିଲ୍ଲା ମଧ୍ୟରେ ସମ୍ପର୍କର ସେତୁ ଭାବେ ହେବାକୁ ଥିବା କଣ୍ଟାମାଳର ତେଲନଦୀ ସେତୁର ନିର୍ମାଣ ସରିଛି । ହେଲେ ଜମି ଅଧିଗ୍ରହଣ ନହେବାରୁ ଅଧାରେ ଅଟକିଛି ଆପ୍ରୋଚ ରୋଡ କାମ । ବହୁ ପ୍ରତୀକ୍ଷିତ ଏହି ବ୍ରିଜ ନିର୍ମାଣ କାର୍ଯ୍ୟ ସରିବାର ଚାରି ବର୍ଷ ବିତିଗଲାଣି । ହେଲେ ବ୍ରିଜ ଦୁଇ ପାର୍ଶ୍ଵର ଆପ୍ରୋଚ ରୋଡ ନିମନ୍ତେ ଜମି ଅଧିଗ୍ରହଣ ହୋଇ ପାରୁ ନଥିବାରୁ କାର୍ଯ୍ୟକ୍ଷମ ହୋଇପାରୁନି ବ୍ରିଜ ।
କଣ୍ଟାମାଳ ନିକଟସ୍ଥ ଟିକ୍ରାପଡା ଘାଟ ନିକଟରେ ନିର୍ମିତ ଏହି ସେତୁ ସିଧାସଳଖ ବୌଦ୍ଧର କଣ୍ଟାମାଳ ଓ ବଲାଙ୍ଗୀର ଜିଲ୍ଲାର ତରଭା ସହରକୁ ଯୋଡିବ । ମାତ୍ର ଦୀର୍ଘଦିନ ହେଲା କଣ୍ଟାମାଳର ତେଲନଦୀ ସେତୁ ନିର୍ମାଣ ସରିଥିଲେ ମଧ୍ୟ ଆପ୍ରୋଚ ରୋଡ ହୋଇ ନପାରିବାରୁ ଆଶା ଆଶଙ୍କାରେ ଅଞ୍ଚଳବାସୀ ।
ପ୍ରାୟ ଅଧା କିଲୋମିଟର ବିଶିଷ୍ଟ ତଥା କୋଡିଏ କୋଟିରୁ ଉର୍ଦ୍ଧ୍ବ ଟଙ୍କା ବ୍ୟୟରେ ନିର୍ମିତ ଏହି ସେତୁର ଦୁଇ ପାର୍ଶ୍ଵରେ ଜମି ଅଧିଗ୍ରହଣ ହୋଇ ନଥିବାରୁ ରାସ୍ତା ନିର୍ମାଣ ନେଇ ସମସ୍ୟା ଉପୁଜିଛି । ତେବେ ଏହି ବ୍ରିଜ କାର୍ଯ୍ୟକାରୀ ହେଲେ ପ୍ରାୟ 50 କିଲୋମିଟର ବୁଲାଣି ରାସ୍ତାରୁ ଲୋକେ ମୁକ୍ତି ପାଇବେ ।
କିନ୍ତୁ ଦୀର୍ଘବର୍ଷ ହେଲା ଏହି ପ୍ରକ୍ରିୟା ଜାରି ଥିବାରୁ ଅଞ୍ଚଳବାସୀ ଏନେଇ ଅସନ୍ତୋଷ ପ୍ରକାଶ କରିଛନ୍ତି । ଅନ୍ୟପକ୍ଷରେ ତୁରନ୍ତ ଏହି କାର୍ଯ୍ୟ ସମାପନ ହେବ ବୋଲି ଗ୍ରାମ୍ୟ ଉନ୍ନୟନ ବିଭାଗ ସୂଚନା ଦେଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
