ବୌଦ୍ଧ: ଜିଲ୍ଲାର ବିଭିନ୍ନ ପ୍ରାକୃତିକ ସୌନ୍ଦର୍ଯ୍ୟରେ ଭରପୂର ପର୍ଯ୍ୟଟନ ସ୍ଥଳ ମଧ୍ୟରୁ ଅନ୍ୟତମ ଖଣ୍ଡିକନପା । ଏଠାରେ ନୂଆବର୍ଷ ପୂର୍ବରୁ ପର୍ଯ୍ୟଟକଙ୍କ ସୁଅ ଛୁଟୁଥିବା ଦେଖିବାକୁ ମିଳିଥିବାବେଳେ ପ୍ରଶାସନ ପକ୍ଷରୁ କୌଣସି ଆନୁଷ୍ଠାନିକ ବ୍ୟବସ୍ଥା ଗ୍ରହଣ କରାଯାଇନାହିଁ । ତେବେ ଏଠାକୁ ରାସ୍ତା ସହିତ ପର୍ଯ୍ୟଟକଙ୍କ ରହଣି ଆଦି ଲାଗି ବ୍ୟବସ୍ଥା ପାଇଁ ସ୍ଥାନୀୟ ଅଞ୍ଚଳରେ ଦାବି ହୋଇଛି ।
ଜିଲ୍ଲାର ୨୨ଟି ପ୍ରାକୃତିକ ସୌନ୍ଦର୍ଯ୍ୟପୂର୍ଣ୍ଣ ସ୍ଥାନକୁ ଜିଲ୍ଲା ପ୍ରଶାସନ ଚିହ୍ନଟ କରି ଅକ୍ସି ଟୁରିଜିମ ମାଧ୍ୟମରେ ଏହାର ବିକାଶ ପାଇଁ ଯୋଜନା ପ୍ରସ୍ତୁତ କରିଛି । ଏଭଳି ଏକ ସ୍ଥାନ ହେଲା ଶଗଡା ପଞ୍ଚାୟତ ନିକଟରେ ଅବସ୍ଥିତ ଖଣ୍ଡିକନପା । ଏହି ସ୍ଥାନରେ ବାଘନଦୀ ବାଘଭଳି ଗର୍ଜନ କରି ପ୍ରବାହିତ ହେଉଥିଲେ ମଧ୍ୟ ଏଠାକାର ପରିବେଶ ବର୍ଷ ତମାମ ପର୍ଯ୍ୟଟକଙ୍କୁ ଆକର୍ଷଣ କରିଥାଏ । ବିଭିନ୍ନ ଦୁର୍ଲଭ ବୃକ୍ଷରାଜିରେ ପରିପୂର୍ଣ୍ଣ ଜଙ୍ଗଲ ସହିତ ଶାନ୍ତ ଶୀତଳ ପରିବେଶ ବଣଭୋଜି ପାଇଁ ଅତ୍ୟନ୍ତ ଉପଯୋଗୀ ଅଟେ ।
ବାଘନଦୀର ଅପର ପାର୍ଶ୍ଵରେ ଗୁପ୍ତେଶ୍ବର ନାମରେ ଏକ ଶୈବପୀଠ ରହିଥିବାବେଳେ ସେଠାକୁ ପହଞ୍ଚିବା ପାଇଁ ନଦୀ ଉପରେ ଏକ କାଠପୋଲ ସ୍ଥାନୀୟ ଲୋକଙ୍କ ସହଯୋଗରେ ପ୍ରତ୍ୟେକ ବର୍ଷ ନିର୍ମାଣ ହୋଇଥାଏ । ଏହି କାଠପୋଲ ଅନେକ ପର୍ଯ୍ୟଟକଙ୍କ ପ୍ରମୁଖ ଆକର୍ଷଣର କେନ୍ଦ୍ରବିନ୍ଦୁ । ନୂଆବର୍ଷ ଆସୁଥିବାରୁ ବର୍ତ୍ତମାନ ଜିଲ୍ଲା ସମେତ ରାଜ୍ୟ ତଥା ରାଜ୍ୟ ବାହାରର ପର୍ଯ୍ୟଟକ ତଥା ବଣଭୋଜି ପାଇଁ ପରିବାର ଭିଡ଼ ଜମାଉଛନ୍ତି ।
ତେବେ ପ୍ରାକୃତିକ ସୌନ୍ଦର୍ଯ୍ୟଭରା ଏହି ସ୍ଥାନକୁ କିନ୍ତୁ ଭଲ ରାସ୍ତା ଖଣ୍ଡେ ନାହିଁ । ଏହାସହିତ ପର୍ଯ୍ୟଟକଙ୍କ ରହିବା ତଥା ଶୌଚାଳୟର ମଧ୍ୟ ଆଦୌ ବ୍ୟବସ୍ଥା ନଥିବାରୁ ଏନେଇ ପ୍ରଶାସନ ଦୃଷ୍ଟି ଦେବାକୁ ସ୍ଥାନୀୟ ଅଞ୍ଚଳରେ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
