ବୌଦ୍ଧ: ଜଙ୍ଗଲରେ ଦୀର୍ଘ ବର୍ଷରୁ ବସବାସ କରୁଥିବା ଗରିବ ହିତାଧିକାରୀଙ୍କୁ ଭୂମି ଅଧିକାର ଆଇନ ବଳରେ ପଟ୍ଟା ପ୍ରଦାନ କରାଯାଉଛି । ବୌଦ୍ଧ ଜିଲ୍ଲାରେ ଭୂମିହୀନ ପ୍ରଜାଙ୍କୁ ମଧ୍ୟ ଚିହ୍ନଟ କରାଯାଇ ବସୁନ୍ଧରା ଯୋଜନାରେ ପଟ୍ଟା ପ୍ରଦାନ ଆରମ୍ଭ ହୋଇଛି ।
ଜିଲ୍ଲାର ବିଭିନ୍ନ ଜଙ୍ଗଲ ଅଞ୍ଚଳରେ ପିଢ଼ି ପରେ ପିଢ଼ି ବସବାସ କରୁଥିବା ଗରିବ ହିତାଧିକାରୀଙ୍କୁ ଏଣିକି ଜମି ଅଧିକାର ଆଇନ ବଳରେ ପଟ୍ଟା ପ୍ରଦାନ କରାଯାଉଛି । ବୌଦ୍ଧ ଜିଲ୍ଲାର ବିଭିନ୍ନ ଜଙ୍ଗଲ ଜମିରେ ବସବାସ କରୁଥିବା ଗରିବ ପ୍ରଜାଙ୍କୁ ରାଜସ୍ବ ବିଭାଗ ଚିହ୍ନଟ କରି ପଟ୍ଟା ପ୍ରଦାନର ବ୍ୟବସ୍ଥା ଆରମ୍ଭ କରିଛି । ଶୁକ୍ରବାର ଦିନ ବୌଦ୍ଧ ନିର୍ବାଚନ ମଣ୍ଡଳୀର ବଘିଆପଡା ରାଜସ୍ବ ଅଧିନରେ ଥିବା ପାଞ୍ଚଟି ଗ୍ରାମର 86 ଜଣ ଜମି ଭୂମି ହୀନ ପ୍ରଜାଙ୍କୁ FRA ଯୋଜନାରେ ପଟ୍ଟା ପ୍ରଦାନ କରାଯାଇଥିଲା । ସେହିପରି ଶନିବାର ଦିନ କଣ୍ଟାମାଳ ନିର୍ବାଚନ ମଣ୍ଡଳୀର ବାଉଁଶୁଣୀ ରାଜସ୍ବ ମଣ୍ଡଳର 19 ଜଣ ହିତାଧିକାରୀଙ୍କୁ FRA ଯୋଜନାର ପଟ୍ଟା ବଣ୍ଟନ କରାଯାଇଥିଲା ।
ସେହିପରି ଜମିଭୂମି ହୀନ ପ୍ରଜାଙ୍କୁ ଚିହ୍ନଟ କରାଯାଇ ସରକାରଙ୍କ କଲ୍ୟାଣକାରୀ ବସୁନ୍ଧରା ଯୋଜନାରେ 21 ଜଣ ହିତାଧିକାରୀଙ୍କୁ ପଟ୍ଟା ବଣ୍ଟନ କରାଯାଇଥିଲା । ରାଜସ୍ବ ବିଭାଗ ଦ୍ବାରା ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମରେ କଣ୍ଟାମାଳ ବିଧାୟକ ମହିଧର ରଣା,ଏଡିଏମ ବବିତା ଦଳବେହେରା,ତହସିଲଦାର ଅବିନାଶ ପାଣ୍ଡିଆ ପ୍ରମୁଖ ଯୋଗ ଦେଇ ଗରିବ ହିତାଧିକାରୀଙ୍କୁ ପଟ୍ଟା ବଣ୍ଟନ କରିଥିଲେ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
