ବୌଦ୍ଧ: ଜିଲ୍ଲାରେ କୋରୋନା ଗ୍ରାଫ ହ୍ରାସ ପାଉଥିବା ବେଳେ କିନ୍ତୁ ମୃତ୍ୟୁ ହାର ଉଦବେଗ ଜନକ ରହିଛି । ସେପଟେ କୋରୋନା ଜନିତ ମୃତ୍ୟୁରେ ସଂସ୍କାର ପରେ ଅସ୍ଥି ବିସର୍ଜନ ପାଇଁ ଅସୁବିଧାକୁ ଦୂର ପାଇଁ ପ୍ରଶାସନ ଦୃଷ୍ଟି ଦେବାକୁ ଜିଲ୍ଲା ବ୍ରାହ୍ମଣ ସମାଜ ଅନୁରୋଧ କରିଛି ।
ଗତ ତିନି ଦିନ ମଧ୍ୟରେ ବୌଦ୍ଧ ଜିଲ୍ଲା ତାଳସରଡାର ଜଣେ ସ୍ବେଚ୍ଛାସେବୀ, ମନମୁଣ୍ଡାର ଜଣେ ବ୍ୟବସାୟୀ, ଚାରିଛକର ଜଣେ ଶିକ୍ଷୟିତ୍ରୀ ଓ ଅନ୍ୟ ଯୁବ ବର୍ଗଙ୍କ ଅକାଳ ବିୟୋଗ ଯୋଗୁଁ ଅଞ୍ଚଳରେ ଶୋକର ଛାୟା ଖେଳିଯାଇଛି । ସେପଟେ ବୌଦ୍ଧ ସହରର ଏକମାତ୍ର ଶ୍ମଶାନ କେନ୍ଦ୍ର ବା ରାଜଘାଟ ଠାରେ କୋରୋନା ଜନିତ ମୃତକଙ୍କ ଶବ ସତ୍କାର କରାଯାଉଛି । ତେବେ ପ୍ରତ୍ୟେକ ଦିନ ଏକାଧିକ ଶବ ସତ୍କାର ଯୋଗୁଁ ହିନ୍ଦୁ ପରମ୍ପରା ମୁତାବକ ଅସ୍ଥି ସଂଗ୍ରହ ପାଇଁ ସମ୍ପର୍କୀୟଙ୍କୁ ଘୋର ଅସୁବିଧାର ସମ୍ମୁଖୀନ ହେବାକୁ ପଡୁଛି ।
ଏଣୁ ଜିଲ୍ଲା ବ୍ରାହ୍ମଣ ସମାଜ ପକ୍ଷରୁ ଏନେଇ ଜିଲ୍ଲା ପ୍ରଶାସନ ପଦକ୍ଷେପ ଗ୍ରହଣ ପାଇଁ ଅନୁରୋଧ କରାଯାଇଛି । ସେପଟେ ବୌଦ୍ଧ ରାଜଘାଟ ଠାରେ କୋରୋନା ମୃତକଙ୍କ ଦାହ ପରେ ପିପିଇ କିଟକୁ ଏଣେତେଣେ ଫିଙ୍ଗି ଦିଆଯାଉଥିବା ଦେଖିବାକୁ ମିଳିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
