ବୌଦ୍ଧ: ଲକଡାଉନ ସମୟରେ ବି ବୌଦ୍ଧରେ ଛୁଟୁଛି ମଦର ବନ୍ୟା । ଚୋରା ମଦ କାରବାର ଏବେ ଜିଲ୍ଲାରେ ସୀମା ଲଙ୍ଘିଲାଣି । ଜିଲ୍ଲାର ବିଭିନ୍ନ ଦେଶୀ ମଦଭାଟିରୁ ରାତିରେ ପ୍ରବଳ ମାତ୍ରାରେ ମଦ ଚୋରା ଚାଲାଣ ହେଉଥିବା ନେଇ ସୂଚନା ମିଳୁଛି । ଏନେଇ ଚୋରାମଦ କାରବାର ଉପରେ ଲଗାମ ଲଗାଇବାକୁ ଯାଇ ସୋମବାର ବୌଦ୍ଧ ଅବକାରୀ ବିଭାଗ ଚଢାଉ କରି ଏକ ବିଦେଶୀ ମଦ ଦୋକାନର ଗୋଦାମକୁ ସିଲ କରିଛି । ହେଲେ ଜିଲ୍ଲାରେ ଚୋରା ମଦ କାରବାର ବଢୁଥିଲେ ମଧ୍ୟ ଆବଶ୍ୟକ ମାତ୍ରାରେ କାର୍ଯ୍ୟାନୁଷ୍ଠାନ ଅଭାବରୁ ଏବେ କାରବାର ବଢିବାରେ ଲାଗିଛି । ଏନେଇ ବାରମ୍ବାର ଅଭିଯୋଗ ହେଉଥିଲେ ମଧ୍ୟ ବିଭାଗ ଚୋରା ମଦ ବ୍ୟବସାୟକୁ କାବୁ କରିବାକୁ ସେମିତି କିଛି ବଡ ପଦକ୍ଷେପ ନେଉନଥିବା ଅଭିଯୋଗ ହେଉଛି ।
ଅନୁଗୁଳ ଜିଲ୍ଲାର ମଦ ମାଫିଆଙ୍କ ଚେର ବୌଦ୍ଧ ଜିଲ୍ଲାର ବିଭିନ୍ନ ସ୍ଥାନ ସହ ବାଉଁଶୁଣୀ ପର୍ଯ୍ୟନ୍ତ ଲମ୍ବିଥିବା ସୂଚନା ମିଳିଛି । ମଦ କାରବାରକୁ ଲଗାମ ଲଗାଇବାକୁ ଯାଇ ସୋମବାର ଅବକାରୀ ବିଭାଗ ବୌଦ୍ଧ ଏନଏସି ଛକ ଠାରେ ଥିବା ଏକ ବିଦେଶୀ ମଦ ଦୋକାନ ଗୋଦାମକୁ ସିଲ କରିବା ସହ 28 ପେଟି ଦାମୀ ମଦକୁ ଜବତ କରିଛି । ସେପଟେ ଲକଡାଉନର ପରେ ମଧ୍ୟ ଏପରି ଗୋଦାମ କିଭଳି ଚାଲୁଛି ଏନେଇ ସାଧାରଣରେ ଚର୍ଚ୍ଚା ହେଉଛି।
ବୌଦ୍ଧରୁ ସତ୍ୟ ନାରାୟଣ ପାଣି, ଈଟିଭି ଭାରତ
