ବୌଦ୍ଧ: ଅସହାୟ ଅବସ୍ଥାରେ ଗୋଟିଏ ପରିବାରର ତିନି ଜଣ ମଣିଷ । ସରକାର ହିତାଧିକାରୀଙ୍କ ପାଇଁ ଅନେକ ଯୋଜନା କରୁଛନ୍ତି ହେଲେ ସେଗୁଡିକ ସେମାନଙ୍କ ପାଖରେ ପହଁଚିବା ଆଗରୁ ବାଟମାରଣା ହୋଇଯାଉଛି । ସେମିତି ଏକ ଘଟଣା ଦେଖିବାକୁ ମିଳିଛି ବୌଦ୍ଧ ଜିଲ୍ଲା ବୀରନରସିଂପୁର ପଞ୍ଚାୟତ ମହାକୁଡପାଲି ଗ୍ରାମରେ ।
ଏହି ଗାଁରେ ରୁହନ୍ତି ସୁକାନ୍ତି ପ୍ରଧାନ, ତାଙ୍କ ଭଉଣୀ ଏବଂ ତାଙ୍କ କକା ଝରିଆ ପ୍ରଧାନ । ପିତାମାତାଙ୍କୁ ହରାଇବା ପରେ ଦୁଇ ଭଉଣୀ ବିବାହ କରିନପାରି ଅବିବାହିତ ଥିବାବେଳେ ସେପଟେ ନିଜ କକା ମଧ୍ୟ ବିବାହ କରିନପାରି ଦୀର୍ଘ ବର୍ଷ ହେଲା ଏକାକୀ ଜୀବନ କାଟୁଛନ୍ତି । ଏମାନଙ୍କ ପାଖରେ ସରକାରଙ୍କ ସବୁ ଯୋଜନା ଯେମିତି ଅପହଞ୍ଚ ପାଲଟିଛି । ସରକାର ବିଜୁ ପକ୍କାଘର ଯୋଜନାରେ ଅସହାୟଙ୍କୁ ଘର ଖଣ୍ଡେ ଯୋଗାଉଥିବାବେଳେ ଏମାନେ ଏଯାଏଁ ସେସବୁରୁ ବଞ୍ଚିତ ହୋଇଛନ୍ତି । ଦୈନିକ ମୂଲଲାଗି ପେଟ ପୋଷୁଥିବା ଏହି ଦୁଇ ଭଉଣୀ ଏନେଇ ସରପଞ୍ଚ ଓ ବିଡିଓଙ୍କୁ ବାରମ୍ବାର ଅଭିଯୋଗ କରିଥିଲେ ସୁଦ୍ଧା ନିରାଶ ହୋଇଛନ୍ତି । ଏକ ଭଙ୍ଗା ଦଦରା ଚାଳ ଘରେ ଏମାନଙ୍କ କଟୁଛି ଜୀବନ।
ଏହି ପରିବାରକୁ ଆଜି ପର୍ଯ୍ୟନ୍ତ ସରକାରୀ ଆବାସ ଯୋଜନାରେ ସାମିଲ କରାଯାଇ ପାରିନାହିଁ । ଫଳରେ ସେମାନେ ଅତ୍ୟନ୍ତ ଦୁର୍ବିସହ ଜୀବନ ଯାପନ କରୁଛନ୍ତି । ତେଣୁ ତୁରନ୍ତ ଏହି ପରିବାରକୁ ସରକାରୀ ସହାୟତା ଯୋଗାଇଦେବାକୁ ସାଧାରଣରେ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
