ବୌଦ୍ଧ : ବିପର୍ଯ୍ୟସ୍ତ ହୋଇପଡିଛି ସ୍ବାସ୍ଥ୍ୟସେବା । ଶଯ୍ୟା ଅଭାବରୁ ପ୍ରସୂତୀ ଓ ନବଜାତ ଶିଶୁ ଡାକ୍ତରଖାନାର ବରଣ୍ଡାରେ ଚିକିତ୍ସିତ ହେଉଛନ୍ତି । ବୌଦ୍ଧ ଜିଲ୍ଲାର ମନମୁଣ୍ଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଏକଦା ଜିଲ୍ଲା ତଥା ପଡୋଶୀ ଜିଲ୍ଲାରେ ପ୍ରସୂତୀ ଚିକିତ୍ସା ପାଇଁ ବେଶ ନାଁ କରିଥିଲା । କିନ୍ତୁ ବର୍ତ୍ତମାନ ଶଯ୍ୟା ଅଭାବ ସାଙ୍ଗକୁ ସ୍ବାସ୍ଥ୍ୟ ସହାୟିକାଙ୍କ ଅଭାବ ଯୋଗୁଁ ପ୍ରସୂତୀଙ୍କ ଚିକିତ୍ସା ଠିକରେ ହୋଇପାରୁ ନଥିବା ଅଭିଯୋଗ ହୋଇଛି ।
ସେପଟେ ସରକାର ଏହି ଅସୁବିଧାର ନିରାକରଣ ପାଇଁ ଗତ ପ୍ରାୟ ଦୁଇ ବର୍ଷ ତଳେ ମନମୁଣ୍ଡା ଠାରେ 30 ଶଯ୍ୟା ବିଶିଷ୍ଟ କୋଠା ଓ ଲେବର ରୁମ ପାଇଁ ପଚାଶ ଲକ୍ଷ ଟଙ୍କା ବ୍ୟୟ ବରାଦ କରିଥିଲେ । ତେବେ ଏହାର ଅବଧି ପୁରିବାକୁ ବସିଥିବା ବେଳେ ଏହି କୋଠା କେବେ ସମ୍ପୂର୍ଣ୍ଣ ହେବ ସେନେଇ ଉଠିଛି ପ୍ରଶ୍ନବାଚୀ ।
ଶଯ୍ୟା ଅଭାବରୁ ପ୍ରସୂତୀ ଓ ନବଜାତ ଶିଶୁ ବାରଣ୍ଡାରେ ଚିକିତ୍ସିତ ହେବା ସମସ୍ତଙ୍କୁ ଦୁଃଖିତ କରିଥିବା ବେଳେ ତୁରନ୍ତ ଏଦିଗରେ ପଦକ୍ଷେପ ଗ୍ରହଣ କରିବାକୁ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
