ବୌଦ୍ଧ: ଜିଲ୍ଲାରେ ପୁଣି ଥରେ ଶକ୍ତି ସଂଗ୍ରହ କରୁଛି କେକେବିଏନ ମାଓ ସଂଗଠନ । ଗୋଟିଏ ମାସ ଭିତରେ ତିନି ତିନିଟି ଘଟଣାରୁ ଏହା ସ୍ପଷ୍ଟ ହୋଇଯାଇଛି । ସେପଟେ ସୋମବାର ବୌଦ୍ଧର ନୂତନ SP କାର୍ଯ୍ୟରେ ଯୋଗଦେବା ପରେ ପରେ କଣ୍ଟାମାଳ ଥାନା ଅଞ୍ଚଳରୁ ବେଆଇନ ଗଞ୍ଜେଇ ସହ ଦୁଇ ଜଣଙ୍କୁ ଗିରଫ କରାଯାଇଛି ।
ଜିଲ୍ଲାରେ ପୁଣିଥରେ ସକ୍ରିୟ ହେବାରେ ଲାଗିଛି କେକେବିଏନ ମାଓ ସଂଗଠନ । ବୌଦ୍ଧ ଜିଲ୍ଲାର ଆଭ୍ୟନ୍ତରୀଣ ଅଞ୍ଚଳରେ କନ୍ଧମାଳ, କଳାହାଣ୍ଡି, ବୌଦ୍ଧ ଓ ନୟାଗଡ଼ ମାଓ ଡିଭିଜନ ବା KBKN ପୁଣିଥରେ ଶକ୍ତି ସଂଗ୍ରହ କରୁଥିବା ଆଶଙ୍କା କରାଯାଇଛି । ଗତ ମାସକ ମଧ୍ୟରେ ବୌଦ୍ଧ ଜିଲ୍ଲା କଣ୍ଟାମାଳ ଥାନା ଅଞ୍ଚଳରେ ତିନି ତିନି ଥର ସୁରକ୍ଷାକର୍ମୀ ଓ ମାଓବାଦୀ ସଂଘର୍ଷରୁ ଏହା ସ୍ପଷ୍ଟ ହେବା ସହିତ ଜିଲ୍ଲାରେ ସେମାନଙ୍କ ଉପସ୍ଥିତି ଜାହିର ହୋଇଛି ।
ତେବେ ଏହି ସଂଗଠନ ବର୍ତ୍ତମାନ ସମୟରେ ଛତିଶଗଡ଼ର କ୍ୟାଡେଡ ଭୁକ୍ତ ମାଓ ନେତାଙ୍କ ତତ୍ତ୍ବାବଧାନରେ ବୌଦ୍ଧ ଜିଲ୍ଲାର ନାରାୟଣପ୍ରସାଦ, ଉମା,ବରଗାଁ, ଖୁଣ୍ଟିଗୋରା, ଲମ୍ବସରୀ ଭଳି କେତେକ ପଞ୍ଚାୟତର ସ୍ଥାନୀୟ କିଛି ଯୁବକଙ୍କ ସହଯୋଗରେ ପୁଣିଥରେ ସକ୍ରିୟ ହେଉଥିବା ଚର୍ଚ୍ଚା ହେଉଛି । ତେବେ ବୌଦ୍ଧ ଜିଲ୍ଲାକୁ ମାଓମୁକ୍ତ ଜିଲ୍ଲା ଭାବରେ କାହିଁକି ଘୋଷଣା କରାଗଲା ସେନେଇ ନାନା କଳ୍ପନା ଜଳ୍ପନା ପ୍ରକାଶ ପାଇଛି ।
ସେପଟେ ଏଭଳି ସମୟରେ ସୋମବାର ବୌଦ୍ଧ ଜିଲ୍ଲାର ନୂତନ ପୋଲିସ ଆରକ୍ଷୀ ଅଧିକ୍ଷକ ଭାବରେ ଜ୍ଞାନ ରଞ୍ଜନ ମହାନ୍ତି କାର୍ଯ୍ୟରେ ଯୋଗ ଦେଇଛନ୍ତି । ତେବେ ସେ କାର୍ଯ୍ୟରେ ଯୋଗ ଦେଉଦେଉ କଣ୍ଟାମାଳ ପୋଲିସ ଏକ କାର ସହିତ 77 କେଜି ବେଆଇନ ଗଞ୍ଜେଇ ଜବତ କରିଛି । ଏନେଇ ପୋଲିସ ଦୁଇ ଜଣକୁ ଗିରଫ କରିଥିବାବେଳେ ଜଣେ ଫେରାର ହୋଇଯାଇଛି । କଣ୍ଟାମାଳ ଥାନା ଅଞ୍ଚଳ ଅପରାଧୀଙ୍କ ଚରାଭୂଇଁ ପାଲଟି ଯାଇଥିବା ବେଳେ ଗଞ୍ଜେଇ ବ୍ୟବସାୟର ପେଣ୍ଠସ୍ଥଳ ମଧ୍ୟ ହୋଇଥିବା ଯୋଗୁଁ ଜିଲ୍ଲା ଏସପି ଏଥିପ୍ରତି ସ୍ବତନ୍ତ୍ର ଦୃଷ୍ଟି ଦେବାକୁ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
