ବୌଦ୍ଧ: ଜିଲ୍ଲାରେ ତୃତୀୟ ପର୍ଯ୍ୟାୟରେ ଜିଲ୍ଲାରେ ୧୫ଟି ହାଇସ୍କୁଲ ୫ଟିରେ ରୂପାନ୍ତରିତ କରାଯିବ । ତେବେ ପ୍ରଥମଥର ପାଇଁ ଜିଲ୍ଲାର ତିନୋଟି ଆଦିବାସୀ ବିଦ୍ୟାଳୟକୁ(TRW) ଏଥିରେ ସାମିଲ କରାଯାଇଥିବାରୁ ବିଭିନ୍ନ ମହଲରେ ଆନନ୍ଦ ପ୍ରକାଶ ପାଇଛି ।
ସମୟ ସହ ବଦଳୁଛି ଶିକ୍ଷା ବ୍ୟବସ୍ଥାର ଚିତ୍ର । ସାଧାରଣ କଳାପଟାର ସ୍ଥାନ ନେଇଛି ସ୍ମାର୍ଟ ବୋର୍ଡ । ଶିକ୍ଷାଦାନ ବ୍ୟବସ୍ଥା ସହ ଆନୁସଙ୍ଗିକ ବିଧିବ୍ୟାବସ୍ଥାରେ ପରିବର୍ତ୍ତନ ଆସିଛି । ବୌଦ୍ଧ ଜିଲ୍ଲାରେ ପ୍ରଥମ ପର୍ଯ୍ୟାୟରେ ୧୦ଟି ଓ ଦ୍ବିତୀୟ ପର୍ଯ୍ୟାୟରେ ୩୪ଟି ହାଇସ୍କୁଲ 5tରେ ରୂପାନ୍ତରିତ ହୋଇସାରିଛି । ବର୍ତ୍ତମାନ ତୃତୀୟ ପର୍ଯ୍ୟାୟ ପାଇଁ ତିନୋଟି ବ୍ଲକର ପନ୍ଦରଟି ହାଇସ୍କୁଲ 5t ଅନ୍ତର୍ଗତ ହେବ । ଏସବୁ ବିଦ୍ୟାଳୟ ଗୁଡିକରେ ସାଧାରଣ କଳାପଟାର ସ୍ଥାନ ସ୍ମାର୍ଟ ବୋର୍ଡ ସ୍ଥାନ ନେବ । ଏହାଛଡା ଇ ଲାଇବ୍ରେରୀ ଠାରୁ ନେଇ ଖେଳପଡିଆ, ବଗିଚା, ଶୌଚାଳୟ, ପାନୀୟଜଳ ଓ ବିଦ୍ୟାଳୟର ପାରିପାର୍ଶ୍ବିକ ବିକାଶ ମଧ୍ୟ ଘଟିବ । ଏନେଇ ଖୋଦ ବୌଦ୍ଧ ଜିଲ୍ଲାପାଳ ବରିଷ୍ଠ ଅଧିକାରୀ, ବିଦ୍ୟାଳୟ ଶିକ୍ଷକ ଶିକ୍ଷୟିତ୍ରୀ, ଛାତ୍ରଛାତ୍ରୀଙ୍କ ସହିତ ଅଧିକ ଆଲୋଚନା କରିଛନ୍ତି ।
ଉପାନ୍ତ ଅଞ୍ଚଳର ବିଦ୍ୟାଳୟ ତଥା ବିଶେଷ ଭାବରେ ତିନୋଟି ଆଦିବାସୀ ବିଦ୍ୟାଳୟ 5tରେ ଅନ୍ତର୍ଗତ ହେବା ସୂଚନା ମିଳିବା ପରେ ଛାତ୍ରଛାତ୍ରୀଙ୍କ ମଧ୍ୟରେ ପ୍ରବଳ ଉତ୍ସାହ ଓ ଆନନ୍ଦ ପ୍ରକାଶ ପାଇଛି । ସେପଟେ ବୌଦ୍ଧ ଜିଲ୍ଲା ଖଟଖଟିଆ ସ୍ଥିତ ଶ୍ରୀଜଗନ୍ନାଥ ଉଚ୍ଚ ବିଦ୍ୟାଳୟର ଛାତ୍ରୀ ସୁଶ୍ରୀ ସ୍ବରୂପା ପଲିଆ ଜାତୀୟ ସ୍ତରରେ ଓ ତେତେଲେଙ୍ଗା ଆଦର୍ଶ ବିଦ୍ୟାଳୟର ଛାତ୍ର ସ୍ବସ୍ତିକ ସୁଚିନ୍ତନ ପ୍ରଧାନ ରାଜ୍ୟ ସ୍ତରରେ କୃତିତ୍ୱ ଅର୍ଜନ କରିଥିବାରୁ ଏନେଇ ବିଭିନ୍ନ ମହଲରେ ଆନନ୍ଦ ପ୍ରକାଶ ପାଇଛି ।
ଏନେଇ ମେଣ୍ଢିମାଳ ହାଇସ୍କୁଲର ଜଣେ ଛାତ୍ରୀ କହିଛନ୍ତି ଯେ," ଆମ ବୌଦ୍ଧ ଜିଲ୍ଲାରେ ପ୍ରଥମ ପର୍ଯ୍ୟାୟରେ ୧୦ଟି ଓ ଦ୍ବିତୀୟ ପର୍ଯ୍ୟାୟରେ ୩୪ ଟି ହାଇସ୍କୁଲ 5t ରେ ରୂପାନ୍ତରିତ ହୋଇଥିଲା । ବର୍ତ୍ତମାନ ଆଉ ୧୫ଟି ସ୍କୁଲ ୫ଟିରେ ରୂପାନ୍ତରିତ ହେବାକୁ ଯାଉଛି । ଆମକୁ ବହୁତ ଖୁସି ଲାଗୁଛି । ଖାସ କରି ଆଦିବାସୀ ସ୍କୁଲ ଏଥିରେ ରହିଥିବାରୁ ଆହୁରି ଅଧିକା ଖୁସି ଲାଗୁଛି । ଇ ଲାଇବ୍ରେରୀ, ସ୍ମାର୍ଟ ବୋର୍ଡ ଠାରୁ ନେଇ ଖେଳପଡିଆର ବିକାଶ ହୋଇପାରିବ । ଯାହା ଫଳରେ ଆମେ କମ୍ପ୍ୟୁଟର ଦ୍ବାରା ଅନେକ ବହି ପଢିପାରିବୁ । ଏହାସହ ସ୍କୁଲର ପାରିପାର୍ଶିକ ପରିବର୍ତ୍ତନ ମଧ୍ୟ ହୋଇପାରିବ ।
ଇଟିଭି ଭାରତ, ବୌଦ୍ଧ
