ବୌଦ୍ଧ: ଅଦିନିଆ ବର୍ଷା ଉଜାଡ଼ି ଦେଇଛି ଚାଷୀଙ୍କ ଫସଲ । ରାଜ୍ୟର ବିଭିନ୍ନ ଜିଲ୍ଲାରେ ବର୍ଷା ଜାରି ରହିଥିବା ଯୋଗୁଁ ଚାଷୀମାନେ ପ୍ରଭାବିତ ହୋଇଛନ୍ତି । ସେପଟେ ବୌଦ୍ଧ ଜିଲ୍ଲାରେ ଅଦିନିଆ ବର୍ଷା ଯୋଗୁଁ ଚାଷୀଙ୍କ ଫସଲରେ କ୍ଷୟକ୍ଷତି ଘଟିଛି । ଧାନଚାଷ ଠାରୁ ନେଇ ପନିପରିବା ଓ ରବି ଫସଲ ଅନେକ ଅଞ୍ଚଳରେ ଉଜୁଡ଼ି ଯାଇଥିବା ଅଭିଯୋଗ ହୋଇଛି ।
ବୌଦ୍ଧ ଜିଲ୍ଲାରେ ଗତ ଚାରି ଦିନ ଧରି ବିଭିନ୍ନ ସ୍ଥାନରେ ଝିପ ଝିପ ବର୍ଷା ଲାଗିରହିବା ସହ କୋହଲା ପାଗ ରହିଛି । ଜିଲ୍ଲାର ଆମ୍ବଝରୀ, ଗୁନ୍ଦୁଳିଆ, ଶଗଡା, ଲମ୍ବସରୀ ଭଳି କେତେକ ପଞ୍ଚାୟତର ଉପାନ୍ତ ଅଞ୍ଚଳରେ କରକାପାତ ହୋଇଥିବା ସୂଚନା ମିଳିଛି । ଜିଲ୍ଲାରେ ମଣ୍ଡି ସମସ୍ୟା ଦେଖାଦେଇଥିବାବେଳେ ଚାଷୀଙ୍କ ଧାନ ବାହାରେ ପଡ଼ି ରହିଛି । ଯାହାଫଳରେ ବ୍ୟାପକ ଧାନ ବର୍ଷାରେ ଓଦା ହୋଇ ନଷ୍ଟ ହୋଇଯାଇଛି ।
ସେହିପରି ପନିପରିବା ଚାଷୀଙ୍କ ପାଇଁ ବର୍ଷା ଚିନ୍ତାର କାରଣ ସାଜିଛି । ଏ ଦିଗରେ ପ୍ରଶାସନକୁ ତୁରନ୍ତ ଦୃଷ୍ଟି ଦେବା ପାଇଁ ଚାଷୀମାନେ ଦାବି କରିଛନ୍ତି । ଏଥିସହ ତୁରନ୍ତ ଏଥିପ୍ରତି ପଦକ୍ଷେପ ଗ୍ରହଣ ପାଇଁ ଚାଷୀ ଦାବି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
