ବୌଦ୍ଧ: ସରିଲା ସ୍ନାନ ପୂର୍ଣ୍ଣିମାର ବିଧି । ଏବେ ଚତୁର୍ଦ୍ଧା ବିଗ୍ରହଙ୍କୁ ହେବ ଜ୍ବର । ମଙ୍ଗଳବାର ଠାରୁ ଶ୍ରୀ ବିଗ୍ରହ ମାନେ ଅଣସର ଘରେ ପନ୍ଦର ଦିନ ଧରି ଷୋଡଶ ଉପଚାର ପରେ ନେତ୍ରୋତ୍ସବ ଦିନ ଭକ୍ତଙ୍କୁ ଦର୍ଶନ ଦେବେ । ଏଭଳି ସ୍ଥିତିରେ ବୌଦ୍ଧ ଶ୍ରୀ ଜଗନ୍ନାଥ ମନ୍ଦିରରେ ସୋମବାର ରାତି ପ୍ରାୟ ୧୦ ଟା ପର୍ଯ୍ୟନ୍ତ ଭକ୍ତମାନେ ମହାବାହୁଙ୍କୁ ଦର୍ଶନ କରିଥିଲେ ।
ପବିତ୍ର ସ୍ନାନ ପୂର୍ଣ୍ଣିମା ହେତୁ ବୌଦ୍ଧ ର ପ୍ରସିଦ୍ଧ ଶ୍ରୀ ଜଗନ୍ନାଥ ମନ୍ଦିରର ସ୍ନାନ ମଣ୍ଡପ ନିକଟରେ ଦିନ ତମାମ ଭିଡ ଲାଗି ରହିଥିଲା । ଶ୍ରୀ ବିଗ୍ରହଙ୍କ ସ୍ନାନ ବିଧି ପରେ ଗଜବେଶ ଦର୍ଶନ କରିବାକୁ ବହୁ ଶ୍ରଦ୍ଧାଳୁ ସ୍ନାନ ମଣ୍ଡପରେ ପହଞ୍ଚି ଥିଲେ । ସଂଧ୍ୟାରେ ସଂଗୀତାୟନ ସଂସ୍ଥା ପକ୍ଷରୁ ଆୟୋଜିତ ଭଜନ ସମାରୋହ ପରିବେଶକୁ ଆହୁରି ଆଧ୍ୟାତ୍ମିକମୟ କରିଥିଲା । ଯାହାକୁ ଶ୍ରଦ୍ଧାଳୁମାନେ ଅତ୍ୟନ୍ତ ଭାବର ସହକାରେ ଉପଭୋଗ କରିଥିଲେ । ପରେ ରାତି ପ୍ରାୟ ୧୦ ଟା ବେଳକୁ ଶ୍ରୀ ବିଗ୍ରହ ମାନଙ୍କୁ ମନ୍ଦିରର ଅଣସର ଗୃହକୁ ନିଆଯାଇଥିଲା ।
ବୌଦ୍ଧରୁ ସତ୍ୟ ନାରାୟଣ ପାଣି, ଈଟିଭି ଭାରତ
