ବୌଦ୍ଧ: ବର୍ଷା ଦିନ ଆସିଲେ ବୌଦ୍ଧ ପୌରାଞ୍ଚଳର ଅବସ୍ଥା ଯିଏ ନ ଦେଖିଛି, ସେ ବିଶ୍ବାସ କରିପାରିବ ନାହିଁ ଯେ ନର୍ଦ୍ଦମା କେଉଁଟା ଓ ରାସ୍ତା କେଉଁଟା । ଜିଲ୍ଲାର ପୌରପରିଷଦ ଅନ୍ତର୍ଗତ ଅଧିକାଂଶ ବସ୍ତିରେ ଥିବା ନାଳକୁ ଅବରୋଧ କିମ୍ବା ଜବରଦଖଲ କରି ନାଳ ଉପରେ ବେଆଇନ ଗୃହ ନିର୍ମାଣ ଏକ ସାଧାରଣ କଥା ହୋଇଯାଇଥିଲା । ଏବେ ଏଭଳି ବେଆଇନ କାର୍ଯ୍ୟକୁ ପ୍ରଶ୍ରୟ ନଦେଇ ସବୁ ନାଳରୁ ଅବରୋଧ ହଟାଇବା ଲକ୍ଷ୍ୟରେ ଅଣ୍ଟା ଭିଡିଛି ପ୍ରଶାସନ ।
ତେବେ ଅଧିକାଂଶ ସ୍ଥାନରେ ଲୋକେ ଜାଣିଶୁଣି ନାଳକୁ ପୋତି ପକାଉଛନ୍ତି, ନଚେତ ନାଳ ଉପରେ ବେଆଇନ ଭାବେ ଘର ନିର୍ମାଣ କରିଦେଉଛନ୍ତି । ଫଳରେ ବସ୍ତିର ନର୍ଦ୍ଦମା ପାଣିରେ ହିଁ ଉବୁଟୁବୁ ହେବାକୁ ପଡୁଛି । ଆଉ ଏଭଳି ବେଆଇନ କାମକୁ ବରଦାସ୍ତ ନକରି ସିଧାସଳଖ ଜବରଦଖଲକାରୀଙ୍କ କବଳରୁ ନାଳନର୍ଦ୍ଦମାକୁ ମୁକ୍ତ କରିବାକୁ ପ୍ରଶାସନ ପକ୍ଷରୁ ନାଳ ଅବରୋଧ ହଟାଇବା ଅଭିଯାନ ଆରମ୍ଭ ହୋଇଯାଇଛି ।
ଏନେଇ ଶନିବାର ପ୍ରଥମ ପର୍ଯ୍ୟାୟରେ ବୁଟୁପାଲି ଠାରେ ଚଢାଉ କରାଯାଇ ନାଳକୁ ଜବରଦଖଲ ମୁକ୍ତ କରାଯାଇଛି । ଏଥିରେ ପୌରପରିଷଦ ସହିତ, ରାଜସ୍ବ, ପୋଲିସ ବିଭାଗର ଅଧିକାରୀମାନେ ଯୋଗ ଦେଇଥିଲେ ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
