ବୌଦ୍ଧ: ପାନୀୟଜଳ ପାଇଁ କାହିଁ କେଉଁ କାଳରୁ ବଞ୍ଚିତ ହୋଇ ଆସୁଛନ୍ତି ଅନେକ ପଞ୍ଚାୟତ । ମହାନଦୀ କୂଳରେ ଥାଇ ମଧ୍ୟ ପାନୀୟଜଳ ଏମାନଙ୍କ ପାଇଁ ଅପହଞ୍ଚ ହୋଇ ପଡିଛି । ବୌଦ୍ଧ ଜିଲ୍ଲାର ହରଭଙ୍ଗା ବ୍ଲକ ମହାନଦୀ କୂଳରେ ଥିବାରୁ ବନ୍ୟା ପାଣି ଆସିଲେ ନଦୀକୂଳରେ ଥିବା ପଞ୍ଚାୟତବାସୀଙ୍କ ଦୁଃଖ ବେଶ ବଢିଯାଇଥାଏ ।
ସେପଟେ ମହାନଦୀ କୂଳରେ ଥାଇ ମଧ୍ୟ ପାନୀୟଜଳ ପାଇଁ ହରଭଙ୍ଗା ବ୍ଲକର ଅନେକ ପଞ୍ଚାୟତରେ ଅଧିବାସୀ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ପ୍ରାୟ ସମସ୍ତ ପଞ୍ଚାୟତର ଅନେକ ଗାଁରେ ଓଭରହେଡ ଟାଙ୍କିରୁ ଜଳ ଯୋଗାଣ ପାଇଁ ବ୍ୟବସ୍ଥା ଥିଲେ ମଧ୍ୟ ଅଧିକାଂଶ ସ୍ଥାନରେ ଜଳଯୋଗାଣ ହେଉନଥିବା ଅଭିଯୋଗ ହୋଇଛି ।
ଅନ୍ୟପଟେ ପାନୀୟଜଳର ଉତ୍କଟ ସମସ୍ୟା ହେତୁ ସାଧାରଣ ଲୋକେ ବନ୍ଧ ଗାଡିଆର ଦୂଷିତ ପାଣି ବ୍ୟବହାର କରି କିଡନୀ ରୋଗରେ ପୀଡିତ ହେଉଛନ୍ତି । ବୁଦ୍ଧିଜୀବୀ ଏନେଇ ସିଧାସଳଖ ଗ୍ରାମ୍ୟ ଜଳଯୋଗାଣ ବିଭାଗର ବିଫଳତାକୁ ଦାୟୀ କରିଛନ୍ତି । ତୁରନ୍ତ ଏ ଦିଗରେ ଜିଲ୍ଲା ପ୍ରଶାସନ ଦୃଷ୍ଟି ଦେଇ ଉଚିତ୍ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
