ବୌଦ୍ଧ:ରାଜ୍ୟରେ ସପ୍ତାହେ ତଳେ ଲାଗି ରହିଥିବା ବର୍ଷା ବନ୍ଦ ହେବା ପରେ ଟଳିଛି ମହାନଦୀରେ ବନ୍ୟା ବିପଦ । ଏବେ ମହାନଦୀର ଜଳସ୍ତର କମୁଛି ସତ ହେଲେ ବଢି ଯାଇଛି ଗରିବ ଗୁରୁବାଙ୍କ ଦୁଃଖ । ଲଗାଣ ବର୍ଷା ପ୍ରଭାବରେ ଅନେକ ଗରିବ ଲୋକଙ୍କ କଚ୍ଚା ଘର ଭୁଶୁଡି ପଡିଥିବା ବେଳେ ବନ୍ୟା ଜଳ ଯୋଗୁଁ ଶହ ଶହ ଏକର ଚାଷ ଜମି ନଷ୍ଟ ହୋଇଥିବା ଅଭିଯୋଗ ହୋଇଛି । ସେପଟେ ମହାନଦୀରେ ଧିରେ ଧିରେ ବନ୍ୟା ଜଳ ହ୍ରାସ ପାଇଛି । ଫଳରେ ଏବେ ମହାନଦୀ ବିପଦ ସଙ୍କେତ ତଳେ ପ୍ରବାହିତ ହେଉଥିବା ଦେଖାଯାଉଛି ।
ତେବେ ବନ୍ୟା ଆଶଙ୍କା ଟଳିଥିବା ବେଳେ ଚାଷୀ ଓ ଗରିବ ଏବେ ମୁଣ୍ଡରେ ହାତ ଦେଇ ବସିଛନ୍ତି । ଜିଲ୍ଲାର ବିଭିନ୍ନ ସ୍ଥାନରେ ବନ୍ୟା ଜଳ ପ୍ରବାହିତ ହୋଇ ହଜାର ହଜାର ଲୋକ ପ୍ରଭାବିତ ହୋଇଥିଲେ । ବିଶେଷ ଭାବରେ ହରଭଙ୍ଗା ବ୍ଲକର ଶତାଧିକ ଗାଁ ପାଣି ଘେରରେ ରହି ସବୁଠାରୁ ବେଶୀ ଅସୁବିଧାର ସମ୍ମୁଖୀନ ହୋଇଥିଲେ । ଏବେ ବନ୍ୟା ପାଣି ନାହିଁ ସତ କିନ୍ତୁ ଗରିବ ଲୋକ ଓ ଚାଷୀ ବନ୍ୟାର ପରବର୍ତ୍ତୀ କଷ୍ଟର ସମ୍ମୁଖୀନ ହୋଇଛନ୍ତି । ଅନେକ ଲୋକଙ୍କ କଚ୍ଚା ବାସ ଗୃହ ଭୁଷୁଡି ପଡିଥିବା ବେଳେ ହରଭଙ୍ଗା ତହସିଲ ଅଧିନରେ ଶହ ଶହ ଏକର ଚାଷ ଜମି ସମ୍ପୂର୍ଣ୍ଣ ଭାବେ ନଷ୍ଟ ହୋଇଯାଇଛି ।
ଅନେକ ଜମିରେ ବାଲି ମାଡି ଯାଇଥିବା ବେଳେ ଅଧିକାଂଶ ଜମିର ଧାନ ଫସଲ ପଚିଯାଇ ଉଜୁଡି ଯାଇଛି । ତେଣୁ ତୁରନ୍ତ ଜିଲ୍ଲା ପ୍ରଶାସନ ଓ ରାଜସ୍ବ ବିଭାଗ ଏସବୁର କ୍ଷୟକ୍ଷତିର ଆକଳନ କରି ସରକାରୀ ସହାୟତା ଯୋଗାଇ ଦେବାକୁ ତେଜିଛି ଦାବି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
