ବୌଦ୍ଧ: ବିଭିନ୍ନ ଜଙ୍ଗଲରେ ବଢୁଛି ବେଆଇନ ଗଛକଟା । ଏଥିସହିତ ଲଘୁଖଣିଜ ସମ୍ପଦର ଚାଲିଛି ହରିଲୁଟ । ବୌଦ୍ଧ ବନଖଣ୍ଡ ଅଧିନରେ ଥିବା ପାଞ୍ଚ ଗୋଟି ବନାଞ୍ଚଳ, ଜଙ୍ଗଲ ସମ୍ପଦରେ ଭରପୁର । କିନ୍ତୁ ଚୋରା କାଠ ମାଫିଆଙ୍କ ଲୋଲୁପ ଦୃଷ୍ଟି ଏସବୁ ଜଙ୍ଗଲରେ ପଡିଥିବାରୁ ଗତ କିଛି ବର୍ଷ ହେଲା ଲଗାତାର ଭାବରେ ଜଙ୍ଗଲ କ୍ଷୟ ହେବାରେ ଲାଗିଛି । ଏହାଛଡା ଜଙ୍ଗଲରୁ ବେଆଇନ ଭାବରେ କାଠକାଟି କେତେକ ଦୁର୍ବୃତ୍ତ ଇଟାଭାଟି ପୋଡୁଛନ୍ତି ।
ବୌଦ୍ଧ ଜିଲ୍ଲାର ଆମ୍ବଝରୀ, ଟିକରପଡା, ତଳଗାଁ, ମହାଲିକପଡା, ଶଗଡା, ଉମା, ନାରାୟଣପ୍ରସାଦ ଭଳି ଅନେକ ପଞ୍ଚାୟତର ଜଙ୍ଗଲ ଅଞ୍ଚଳରେ ଏହା ଚାଲିଥିବା ନେଇ ଜଙ୍ଗଲ ଅଧିକାରୀଙ୍କୁ ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳୁନଥିବା ଅଭିଯୋଗ ହୋଇଛି । ଏଥିସହିତ ଜଙ୍ଗଲରୁ ମେଟାଲ, ମୋରମ ଚୋରି ସହିତ ବିଭିନ୍ନ ପାହାଡି ନଦୀନାଳରୁ ବେଆଇନ ଭାବରେ ବାଲି ଚୋରା ଚାଲାଣ ନେଇ ମଧ୍ୟ ଅଭିଯୋଗ ହୋଇଛି ।
ଏପଟେ ଏଭଳି କାର୍ଯ୍ୟରେ ଜଙ୍ଗଲ ବିଭାଗ ଓ ରାଜସ୍ବ ବିଭାଗର କିଛି ଅସାଧୁ କର୍ମଚାରୀଙ୍କ ସମ୍ପୃକ୍ତି ଥିବା ନେଇ ମଧ୍ୟ ଅଭିଯୋଗ ହୋଇଛି । ତୁରନ୍ତ ଏଦିଗରେ ଜିଲ୍ଲା ପ୍ରଶାସନ ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ଗ୍ରହଣ ପାଇଁ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
