ବୌଦ୍ଧ: ସ୍ବାଧିନତାକୁ 72 ବର୍ଷ ପୁରିଛି । ହେଲେ ଏବେବି ସବୁଦିନିଆ ରାସ୍ତା ଖଣ୍ଡେ ପାଇଁ ନାନା ହଇରାଣ ହରକତ ହେଉଛନ୍ତି ଲୋକେ । ଖରା ଦିନ ତ ଯେନତେନ କଟି ଯାଉଛି କିନ୍ତୁ ବର୍ଷା ଦିନ ହେଲେ ବିପଦ ମାଡି ଆସୁଛି । ଆମେ କହୁଛୁ ବୌଦ୍ଧ ଜିଲ୍ଲା ଲୁଣିବାହାଲ ପଞ୍ଚାୟତ କଥା ।
ପଞ୍ଚାୟତବାସୀଙ୍କୁ ପାଇଁ କଣ୍ଟା ସାଜିଛି ଡେଙ୍ଗା କେନ୍ଦୁନାଳ । କାରଣ ଝରଣାର ଅପର ପାର୍ଶ୍ଵରେ ଥିବା ଝାରକଟା, ଭାଲୁଗାଡିଆ,ବିଶିସାହି ଭଳି ଗାଁ ଗୁଡିକର ଅଧିବାସୀ ବର୍ଷ ତମାମ ଯାତାୟତର ସମସ୍ୟାକୁ ନେଇ ସଂଘର୍ଷ କରିଥାନ୍ତି । ପୋଲଟିଏ ନଥିବାରୁ କେଉଁ ସ୍ଥାନକୁ ଯିବାକୁ ହେଲେ ନାଳ ପାର କରି ଯିବାକୁ ପଡେ । ଅନ୍ୟ ଦିନମାନଙ୍କରେ ଯାତାୟତ ସମ୍ଭବ ହୁଏ ହେଲେ ବର୍ଷା ଋତୁ ଆସିଲେ ଲୋକଙ୍କ ଦୁଃଖ ଦ୍ବିଗୁଣା ବଢି ଯାଏ । କାରଣ ବର୍ଷା ଦିନ ନାଳରେ ଅଣ୍ଟାରୁ ଊର୍ଦ୍ଧ୍ବ ପାଣି ଜମୁଥିବାରୁ ଯାତାୟତ ସମ୍ଭବ ହୋଇପାରେନି । ଫଳରେ ଲୋକେ ଏକ ପ୍ରକାର ଘେରାବନ୍ଦୀ ହୋଇଯାଆନ୍ତି । ଛାତ୍ରଛାତ୍ରୀ ମାଧ୍ୟ ସ୍କୁଲ ଯିବାରେ ନାନା ଅସୁବିଧାର ସମ୍ମୁଖିନ ହେଉଥିବା କହିଛନ୍ତି । ଖୁବ ଶିଘ୍ର ନାଳ ଉପରେ ପୋଲଟିଏ ନିର୍ମାଣ ପାଇଁ ଲୋକେ ଦାବି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
