ବୌଦ୍ଧ: ଆଉ ମାତ୍ର କିଛି ଘଣ୍ଟା ପରେ ଅବସର ଗ୍ରହଣ କରିବେ ବୌଦ୍ଧ ଜିଲ୍ଲାପାଳ ସତ୍ୟ ରଞ୍ଜନ ସାହୁ । ତେବେ ତାଙ୍କ 10 ମାସର ଦାୟିତ୍ୱ ମଧ୍ୟରେ ରେଡକ୍ରସ ଅର୍ଥ ସଂଗ୍ରହ ଓ ଗରିବ ଅସହାୟଙ୍କୁ ସହାୟତା କ୍ଷେତ୍ରରେ ସାରା ରାଜ୍ୟରେ ରେକର୍ଡ ସୃଷ୍ଟି କରିଛି ବୌଦ୍ଧ ଜିଲ୍ଲା । ଜିଲ୍ଲାପାଳ ସତ୍ୟ ରଞ୍ଜନ ସାହୁ ଚଳିତ ମାସ ଶେଷରେ ଅବସର ଗ୍ରହଣ କରିବାକୁ ଥିବାବେଳେ ତାଙ୍କ ଶେଷ ଜନଶୁଣାଣିରେ ପହଞ୍ଚି ଶତାଧିକ ଗରିବ, ଅସହାୟ, ବୃଦ୍ଧ ବୃଦ୍ଧା, ଭିନ୍ନକ୍ଷମ, ରୋଗୀଙ୍କୁ ସରକାରୀ ସହାୟତା ଯୋଗାଇ ଦେଇଥିଲେ । ଏହାଛଡା 'ଗାଁକୁ ଚାଲ' ଅଭିଯାନ ମାଧ୍ୟମରେ ହିତାଧିକାରୀ ଓ ସରକାରଙ୍କ ବିଭିନ୍ନ ଯୋଜନାରେ ଥିବା ଅନ୍ତରାୟକୁ ହ୍ରାସ କରିବାରେ ପ୍ରଚେଷ୍ଟା କରିଥିଲେ ଜିଲ୍ଲାପାଳ ।
ବୌଦ୍ଧ ଜିଲ୍ଲାର ଜିଲ୍ଲାପାଳ ଭାବରେ ସତ୍ୟ ରଞ୍ଜନ ସାହୁ ଗତ ଅଗଷ୍ଟ ମାସ 14 ତାରିଖରେ ଦାୟିତ୍ୱ ଗ୍ରହଣ କରିଥିଲେ । ସେତେବେଳେ ବୌଦ୍ଧ ଜିଲ୍ଲାର ଅଧିକାଂଶ ଅଞ୍ଚଳ ବନ୍ୟା ଦ୍ବାରା ପ୍ରଭାବିତ ହୋଇଥିବାବେଳେ ପ୍ରଥମ ଦିନରୁ ହିଁ ଜିଲ୍ଲାପାଳ ପ୍ରଭାବିତ ଅଞ୍ଚଳରେ ପହଞ୍ଚି ଉଦ୍ଧାର ଓ ରିଲିଫ କାର୍ଯ୍ୟକୁ ତଦାରଖ କରିଥିଲେ । ସରକାରଙ୍କ ବିଭିନ୍ନ ଯୋଜନାର ସଫଳ ରୂପାୟନ ଉପରେ ସେ ବିଶେଷ ଗୁରୁତ୍ୱ ପ୍ରଦାନ କରିଥିବ ବେଳେ ବିଭିନ୍ନ ପ୍ରସଙ୍ଗରେ କଠୋର ନିଷ୍ପତ୍ତି ମଧ୍ୟ ଗ୍ରହଣ କରିଥିଲେ । ଜିଲ୍ଲାରେ ସାମାଜିକ ସୁରକ୍ଷା, ଉପାନ୍ତ ଅଞ୍ଚଳର ବିକାଶ, ଜୀବନ ଜୀବିକା, ଅସହାୟ ହିତାଧିକାରୀ ଏବଂ ରୋଗୀଙ୍କ ସହାୟତାକୁ ସେ ପ୍ରାଥମିକତା ଦେଇଥିଲେ ।
ବୌଦ୍ଧ ଜିଲ୍ଲା ହରଭଙ୍ଗା ବ୍ଲକର ଆଢେଣୀଗଡ ପଞ୍ଚାୟତରେ ତାଙ୍କ ପ୍ରଥମ ଜନଶୁଣାଣୀ ଅନୁଷ୍ଠିତ ହୋଇଥିବାବେଳେ ଗତ ସୋମବାର ତାଙ୍କ ଅବସର ଗ୍ରହଣର ଶେଷ ଜନଶୁଣାଣି ଲୁଣିବାହାଲ ପଞ୍ଚାୟତରେ ଅନୁଷ୍ଠିତ ହୋଇଥିଲା । ଜିଲ୍ଲାର କେତେକ ଦୁର୍ନୀତିଗ୍ରସ୍ତ ସରକାରୀ କର୍ମଚାରୀଙ୍କ ବିରୋଧରେ ଜିଲ୍ଲାପାଳ କାର୍ଯ୍ୟାନୁଷ୍ଠାନ ନେଇଥିଲେ । ଦୁଇ ଦିନ ତଳେ ମଧ୍ୟ ଜିଲ୍ଲାପାଳ କଣ୍ଟାମାଳ ବ୍ଲକର ଜଣେ ମହିଳା ଯନ୍ତ୍ରୀଙ୍କୁ ନିଲମ୍ବିତ କରିବା ସହିତ 33 ଜଣ ପିଇଓଙ୍କୁ ବିଭିନ୍ନ ପଞ୍ଚାୟତରୁ ବଦଳି କରି କାର୍ଯ୍ୟ କ୍ଷେତ୍ରରେ ସ୍ବଚ୍ଛତା ପାଇଁ ପ୍ରଚେଷ୍ଟା କରିଛନ୍ତି । ଯାହାକୁ ନେଇ ଜିଲ୍ଲାପାଳଙ୍କୁ ବିଭିନ୍ନ ମହଲରେ ପ୍ରଶଂସା କରାଯାଇଛି ।
ଏହା ମଧ୍ୟ ପଢନ୍ତୁ... ଜଟଣୀବାସୀଙ୍କୁ ଦେଇଥିବା ପ୍ରତିଶୃତି ପୂରଣ ପାଇଁ ଚାକିରି ଛାଡିଲି: ମନ୍ମଥ ରାଉତରାୟ
ଏହାସହ ଅସହାୟଙ୍କୁ ସରକାରୀ ସହାୟତା ଯୋଗାଇବା, ପାନୀୟଜଳ ଯୋଗାଣ, ସାମାଜିକ ସୁରକ୍ଷା, ମହିଳା ସଶକ୍ତିକରଣ, ରାସ୍ତାଘାଟର ଉନ୍ନତିକରଣ ଉପରେ ଜିଲ୍ଲାପାଳ ବିଶେଷ ଫୋକସ କରିଥିଲେ । ତେବେ ବୌଦ୍ଧ ଜିଲ୍ଲାର ବିଭିନ୍ନ ଅଞ୍ଚଳକୁ ଜଳସେଚନ, ଯୋଗାଯୋଗ ଓ କିଡନୀ ରୋଗର ସମସ୍ୟାକୁ ନେଇ ସେ ଚିନ୍ତା ପ୍ରକାଶ କରିଛନ୍ତି । ସେପଟେ ଗତ ଦୁଇ ଦିନ ଧରି ରାଜ୍ୟ ମହିଳା ଓ ଶିଶୁ କଲ୍ୟାଣ ମନ୍ତ୍ରୀ ବାସନ୍ତୀ ହେମ୍ବ୍ରମ, ପଞ୍ଚାୟତିରାଜ ମନ୍ତ୍ରୀ ପ୍ରଦୀପ କୁମାର ଅମାତ ଓ ଜିଲ୍ଲାପାଳ ସତ୍ୟ ରଞ୍ଜନ ସାହୁ ବିଭିନ୍ନ ସ୍ଥାନରେ ପହଞ୍ଚି ଉନ୍ନୟନମୂଳକ ପ୍ରକଳ୍ପର ଉଦଘାଟନ ତଥା ସମୀକ୍ଷା କରିଥିବା ଦେଖିବାକୁ ମିଳିଛି । ତେବେ ବୌଦ୍ଧ ଜିଲ୍ଲାପାଳଙ୍କ ଦଶ ମାସର ଦାୟିତ୍ୱ ମଧ୍ୟରେ ପ୍ରଶାସନିକ କ୍ଷେତ୍ରରେ ଅନେକ ସଂସ୍କାର ମୂଳକ ପଦକ୍ଷେପକୁ ବିଭିନ୍ନ ମହଲରେ ସ୍ବାଗତ କରାଯାଇଛି ।
ଇଟିଭି ଭାରତ, ବୌଦ୍ଧ
